ଭୁବନେଶ୍ବର: ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ୟା ଏବଂ କୁସଂସ୍କାରକୁ ସମାଜରୁ ଦୂର କରିବାପାଇଁ ଜଣେ ରୋଗୀକୁ ସ୍ନେହ, ଶ୍ରଦ୍ଧା, ଯତ୍ନ ଓ ସହଯୋଗର ଆବଶ୍ୟକତା ରହିଛି । ଏ ସମ୍ପର୍କରେ ସ୍ୱାସ୍ଥ୍ୟ ବିଭାଗର ଅଧିକାରୀ, କର୍ମଚାରୀ ଏବଂ ଛାତ୍ର-ଛାତ୍ରୀମାନଙ୍କ ମାଧ୍ୟମରେ ଲୋକମାନଙ୍କୁ ସଚେତନ କରିବା ଉଦ୍ଦେଶ୍ୟରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଦୁଇଟି ଜାତୀୟ ପୁରସ୍କାର ପ୍ରାପ୍ତ ଚଳଚ୍ଚିତ୍ର 'କାସଭ' ଓ 'ନିଆଲ' ପ୍ରଦର୍ଶିତ ହୋଇଛି ।
ଚଳଚ୍ଚିତ୍ର ଯୋଗାଯୋଗର ଶ୍ରେଷ୍ଠ ମାଧ୍ୟମ:
ଏହି ଅବସରରେ ପ୍ରଖ୍ୟାତ ମାନସିକ ରୋଗ ବିଶେଷଜ୍ଞ ତଥା ଅଭିନେତା ପଦ୍ମଶ୍ରୀ ଡ. ମୋହନ ଆଗସେକହିଛନ୍ତି, "ମଣିଷ ଶରୀରକୁ ବାଦ୍ୟଯନ୍ତ୍ର ଏବଂ ମନକୁ ବାଦ୍ୟଯନ୍ତ୍ରରୁ ନିସୃତ ସଙ୍ଗୀତ ଭାବରେ ଅନେକ ସମୟରେ ଅବିହିତ କରିଆସିଛି । ବାସ୍ତବରେ ମନୁଷ୍ୟ ଶରୀର ଏକ ଚିତ୍ରକରର କ୍ୟାନଭାସ ଭଳି । କାରଣ ଏହା ମାଧ୍ୟମରେ ଅନ୍ତରର ଭାବନା ପ୍ରକାଶିତ ହୋଇଥାଏ । ଚଳଚ୍ଚିତ୍ର ହେଉଛି ଯୋଗାଯୋଗର ଅନ୍ୟତମ ଶ୍ରେଷ୍ଠ ମାଧ୍ୟମ । କାରଣ ଶବ୍ଦ ଅଥବା ପୁସ୍ତକ ମାଧ୍ୟମରେ ଯେଉଁ ଜଟିଳ ଭାବନାକୁ ପ୍ରକାଶ କରାଯାଇପାରେ ନାହିଁ, ସେହି ସମାନ ଭାବନାକୁ ଚଳଚ୍ଚିତ୍ର ମାଧ୍ୟମରେ ବେଶ ସହଜରେ ପ୍ରକାଶ କରାଯାଇପାରେ ।"
ମାନସିକ ଅବସାଦ ବଡ଼ ସମସ୍ୟା:
ଅଭିନେତା ପଦ୍ମଶ୍ରୀ ଡ. ମୋହନ ଆଗସେ ଏହା ମଧ୍ୟ କହିଛନ୍ତି, "'କାସଭ' (କଇଁଛ) ପ୍ରକୃତିର ଏକ ଅଭିନ୍ନ ଅଙ୍ଗ, ତେଣୁ ପ୍ରାକୃତିକ ସନ୍ତୁଳନ ବଜାୟ ରଖିବା ପାଇଁ ସେମାନଙ୍କର ସଂରକ୍ଷଣ ଆବଶ୍ୟକ । ଅଣ୍ଡା ଦେବା ପାଇଁ ସମୁଦ୍ର କୂଳକୁ ଆସୁଥିବା ଏହି କଇଁଛ ସୁରକ୍ଷା ଓ ମାନସିକ ରୋଗରେ ପ୍ରପୀଡ଼ିତ ରୋଗୀମାନଙ୍କୁ ଆତ୍ମିକ ସହଯୋଗ ଏହି ଚଳଚ୍ଚିତ୍ରର ପ୍ରମୁଖ ବିଷୟବସ୍ତୁ । ଆଧୁନିକ ସମାଜରେ ମାନସିକ ଅବସାଦ ଏକ ବଡ଼ ସମସ୍ୟା ରୂପେ ଦେଖା ଦେଇଛି । ପ୍ରଗତିଶୀଳ ଦୁନିଆ ସହ ତାଳଦେଇ ଚାଲିବାରେ ଅସମର୍ଥତା ଏବଂ ପରିବାର ଓ ସାମାଜିକ ବନ୍ଧନରେ ଅବକ୍ଷୟ ଯୋଗୁଁ ଲୋକମାନଙ୍କ ମଧ୍ୟରେ ନିଃସଙ୍ଗତା କ୍ରମଶଃ ବୃଦ୍ଧି ପାଉଛି । ପ୍ରକୃତିକୁ ନିଖୁଣ ଭାବରେ ଅନୁଧ୍ୟାନ କଲେ ନିଃସଙ୍ଗତା ବା ଅବସାଦରୁ ମୁକ୍ତି ମିଳିପାରିବ, ଯାହାକୁ କଇଁଛର ଜୀବନ ଚକ୍ର ମାଧ୍ୟମରେ ଏହି ଚଳଚ୍ଚିତ୍ରରେ ପ୍ରଦର୍ଶିତ କରାଯାଇଛି ।"