ଭବାନୀପାଟଣା: କଳାହାଣ୍ଡି ଜିଲ୍ଲାରେ ବୃଦ୍ଧି ପାଇବାରେ ଲାଗିଛି ହାତୀ ଆତଙ୍କ । ଗତକାଲି(ଶନିବାର) ବିଳମ୍ବିତ ରାତିରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ହାତୀ ଆକ୍ରମଣରେ ବୃଦ୍ଧ ଦମ୍ପତିଙ୍କ ମୃତ୍ୟୁ ଘଟିଛି । ସେପଟେ ବାରାମ୍ବାର ହାତୀ ଆକ୍ରମଣ ଫଳରେ ଧନଜୀବନ ନଷ୍ଟ ହେଉଥିବାରୁ ବନ ବିଭାଗକୁ ଦାୟୀ କରିଛନ୍ତି ଗ୍ରାମବାସୀ ।
ଦଳିଦେଲା ଦନ୍ତା:
କଳାହାଣ୍ଡି ଜିଲ୍ଲାର ଦକ୍ଷିଣ ବନଖଣ୍ଡ ଅନ୍ତର୍ଗତ ବିଶ୍ବନାଥପୂର ରେଞ୍ଜ ଅନ୍ତର୍ଗତ ଲାଞ୍ଜିଗଡ ସେକ୍ସନର କାଦୋମାଳି ଗାଁ ଭିତରକୁ ବିଳମ୍ବିତ ରାତିରେ ହାତୀପଲ ପଶି ଆସିଥିଲେ । ଗାଁରେ ଅନେକ ଚାଷ ନଷ୍ଟ କରିବା ସହିତ ମୁଗାନ ମାଝୀଙ୍କ ଘର ବାହାରେ ରଖା ଯାଇଥିବା ହରଡ ଡ଼ାଲିକୁ ଖାଇବା ସହିତ ଘର ଭାଙ୍ଗି ଦେଇଥିଲେ । ଭୟରେ ମୁଗାନ ମାଝୀ ଓ ତାଙ୍କ ସ୍ତ୍ରୀ ଗାଦ ମାଝୀ ଘର ଛାଡ଼ି ଯାଉଥିବା ଵେଳେ ହାତୀଙ୍କ ହାବୁଡରେ ପଡ଼ିଯାଇଥିଲେ । ହାତୀ ବୃଦ୍ଧ ଦମ୍ପତିଙ୍କୁ ଦଳି ଦେଇଥିବା ବେଳେ ଶରୀରକୁ ଖଣ୍ଡ ବିଖଣ୍ଡ କରି ଫିଙ୍ଗି ଦେଇଥିଲା । ସକାଳୁ ସକାଳୁ ଗ୍ରାମବାସୀଙ୍କଠାରୁ ଖବର ପାଇ ବିଜେପୁର ଫରେଷ୍ଟର ପଦ୍ମଲୋଚନ ଶବର ଓ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି ।
ବନ ବିଭାଗକୁ ଦାୟୀ କଲେ ଗ୍ରାମବାସୀ:
ଏନେଇ ସ୍ଥାନୀୟ ବାସିନ୍ଦା ବ୍ରିଟିଶ କୁମାର କହିଛନ୍ତି, "ଆଜି କଳାହାଣ୍ଡି ଜିଲ୍ଲାରେ ହେଉ ଅବା ଯେଉଁ ଜାଗାରେ ହାତୀ ଆକ୍ରମଣ କରିଛି ସେଥିପାଇଁ ସମ୍ପୂର୍ଣ୍ଣ ଭାବରେ ବନ ବିଭାଗ ଦାୟୀ । ବନ ବିଭାଗ କର୍ମଚାରୀ ହାତୀଙ୍କ ଚଳ ପ୍ରଚଳକୁ ନେଇ ସୂଚନା ଦେଉନାହାନ୍ତି । ଯେଉଁଭଳି ଭାବରେ ହାତୀ ଲୋକଙ୍କ ଜୀବନ ନେଇଛି ତାହା ପରେ କ୍ଷତିପୂରଣ ଦେଇଦେବା ବଡ଼ କଥା ନୁହେଁ । ଆଦିବାସୀଙ୍କ ଜୀବନକୁ କ'ଣ ଟଙ୍କା ସହିତ ତୁଳନା କରୁଛନ୍ତି କି ? ବନଖଣ୍ଡ ଅଧିକାର ଠିକ୍ ଭାଵରେ ନିଜ ଦାୟିତ୍ବ ତୁଲାଉ ନାହାନ୍ତି । ହାତୀ କେଉଁ ବିଟ ଅଞ୍ଚଳରୁ କେଉଁ ବିଟ ଅଞ୍ଚଳକୁ ଯାଉଛି ସେନେଇ ସ୍ଥାନୀୟ ବାସିନ୍ଦାମାନଙ୍କୁ ସୂଚନା ଦେବାକଥା । କିନ୍ତୁ ତାହା କରାଯାଉ ନାହିଁ ।"