ପୁରୀ:ଟଳି ଯାଇଛି ବାତ୍ୟା । କିଛି ସମୟପାଇଁ ଠପ୍ ହୋଇଯାଇଥିବା ବ୍ୟସ୍ତ ବହୁଳ ଜୀବନ ପୁଣି ସ୍ବାଭାବିକ ହୋଇଛି। ଫନି ବାତ୍ୟାକୁ ଅଙ୍ଗେ ନିଭାଇଥିବା ପୁରୀବାସୀ ‘ଦାନା’ର ପ୍ରଭାବ ଶୂନ୍ୟ ହେବା ପରେ ଆଶ୍ବସ୍ତ ହୋଇଛନ୍ତି । ତେବେ ପୂର୍ବରୁ ପର୍ଯ୍ୟଟନକ୍ଷେତ୍ରରେ କଟକଣା ଯୋଗୁ ଆଜି ବି ପର୍ଯ୍ୟଟନ କ୍ଷେତ୍ର ମାନ୍ଦା ରହିଛି । ବାତ୍ୟାକୁ ଦୃଷ୍ଟିରେ ରଖି ଦୁଇଦିନ ପର୍ଯ୍ୟଟକଙ୍କୁ ପୁରୀ ଆସିବା ନେଇ କଟକଣା ଲଗାଯାଇଥିବା ବେଳେ ଏହାକୁ ଜିଲ୍ଲା ପ୍ରଶାସନ ପ୍ରତ୍ୟାହୃତ କରିନେଇଛି । ପର୍ଯ୍ୟଟକଙ୍କୁ ପୁରୀ ଆସି ମହାପ୍ରଭୁଙ୍କ ଦର୍ଶନ କରିବା ସହ ବେଳାଭୂମି ବୁଲିବା ପାଇଁ ଆମନ୍ତ୍ରଣ କରାଯାଇଛି ।
ପୂର୍ବରୁ ଅଣ୍ଟା ଭାଙ୍ଗିଥିଲା ଫନି:
ଗତ 2019 ମେ 3 ତାରିଖ ଫନି ବାତ୍ୟାରେ ପୁରୀର ପର୍ଯ୍ୟଟନ ଶିଳ୍ପ ଶକ୍ତ ଧକ୍କା ପାଇଥିଲା । ପର୍ଯ୍ୟଟନ ଶିଳ୍ପକୁ ଅଣ୍ଟା ସଳଖିବାକୁ ଢେର ଶ୍ରମ ଓ ଅର୍ଥର ଆବଶ୍ୟକ ପଡ଼ିଥିଲା । ଅନ୍ୟପକ୍ଷରେ ଅକ୍ଟୋବର ମାସ ଆସିଲେ ଏବଂ ବାତ୍ୟାର ଆଶଙ୍କା ସୃଷ୍ଟି ହେଲେ ପୁରୀର ପର୍ଯ୍ୟଟନ ଶିଳ୍ପ ସହ ଜଡ଼ିତ ବ୍ୟକ୍ତିବିଶେଷ ଚିନ୍ତାରେ ପଡିଥାନ୍ତି । ବାତ୍ୟା ‘ଦାନା’ଏଥର ପୁରୀରୁ ଦୂରେଇ ରହିଥିବାରୁ ହୋଟେଲ୍ ଶିଳ୍ପ ସହ ଜଡ଼ିତ ବ୍ୟକ୍ତିବିଶେଷ ଆଶ୍ଵସ୍ତ ହୋଇଛନ୍ତି । ତେବେ ଟୁର୍ରେ ଆସିଥିବା ବହୁ ପର୍ଯ୍ୟଟକ ବାତ୍ୟା ଭୟରେ ବୁକିଂ ବାତିଲ କରି ଫେରି ଯାଇଥିବାରୁ କ୍ଷତି ସହିବାକୁ ପଡ଼ିଛି ପୁରୀ ହୋଟେଲିୟରଙ୍କୁ ।
ହ୍ରାସ ପାଇଲେ ପର୍ଯ୍ୟଟକ:
ହୋଟେଲ ଗୋଲ୍ଡେନ ପ୍ୟାଲେସ୍ର ମାଲିକ କେଦାରନାଥ ଖୁଣ୍ଟିଆ କହିଛନ୍ତି, ‘ବାତ୍ୟା ଦାନା ଯୋଗୁ ଲମ୍ବା ଟୁର୍ରେ ଆସିଥିବା ବହୁ ପର୍ଯ୍ୟଟକ ଫେରିଯାଇଛନ୍ତି । ବାତ୍ୟା ହେବା ନେଇ ଘୋଷଣା ହେବା ପରଠୁ ଆଡ଼ଭାନ୍ସ ରୁମ୍ ବୁକିଂ ବାତିଲ ହେବା ସହ ଯେଉଁମାନେ ହୋଟେଲ୍ରେ ଥିଲେ ସେମାନଙ୍କ ମଧ୍ୟରୁ ୮୦ ପ୍ରତିଶତ ଫେରି ଯାଇଛନ୍ତି । ମାତ୍ର ୧୦-୧୨ ପ୍ରତିଶତ ପର୍ଯ୍ୟଟକ ହୋଟେଲ୍ରେ ରହିଛନ୍ତି। ତେବେ ଏହା ସ୍ବାଭାବିକ ହେବାକୁ ଆହୁରି ଏକ ସପ୍ତାହ ଲାଗିବ । ବର୍ଷ ତମାମ ପୁରୀର ପ୍ରମୁଖ ହୋଟେଲ୍ ଗୁଡିକରେ ରୁମ ଗୁଡ଼ିକ ଶତପ୍ରତିଶତ ବୁକିଂ ରହୁଥିଲେ ମଧ୍ୟ ଦାନା ବାତ୍ୟା ପ୍ରଭାବରେ ୨-୩ ଦିନ ହେଲା ପର୍ଯ୍ୟଟକଙ୍କ ସଂଖ୍ୟା ହ୍ରାସ ପାଇଛି ।’