ବଲାଙ୍ଗୀର:ଏଣିକି କଲେଜ ଛାତ୍ରଛାତ୍ରୀଙ୍କୁ ଦିଆଯିବ ମାଓ ମୁକାବିଲା ଟ୍ରେନିଂ । ଯାହା ମାଓ ମୁକାବିଲାରେ ସହାୟକ ହେବ ବୋଲି ଲକ୍ଷ୍ୟ ରଖିଛନ୍ତି ସରକାର । ତେବେ ଏହି ଟ୍ରେନିଂକୁ ସମସ୍ତେ ସ୍ୱାଗତ କରିଥିବା ବେଳେ ସେପଟେ ଶିକ୍ଷାର ଭିତ୍ତିଭୂମିକୁ ନେଇ ପ୍ରଶ୍ନ ଉଠାଇଛନ୍ତି କିଛି ଛାତ୍ରଛାତ୍ରୀ । ସେମାନେ ରାଜ୍ୟରେ ନିଯୁକ୍ତିକୁ ଅଧିକ ପ୍ରାଧ୍ୟାନ୍ୟ ଦେବା ପାଇଁ ଦାବି କରିଛନ୍ତି ।
ଏମିତି କହିଥିଲେ ମନ୍ତ୍ରୀ:
ରାଜ୍ୟ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି,"ଖୁବଶୀଘ୍ର ମାଓ ପ୍ରଭାବିତ ଅଞ୍ଚଳରେ ଏଣିକି ଛାତ୍ରଛାତ୍ରୀ ମାନଙ୍କୁ ଟ୍ରେନିଂ ଦିଆଯିବ ।ବିଶେଷ କରି ଯୁକ୍ତ ନୀତି ଛାତ୍ରଛାତ୍ରୀକୁ ଏହି ଟ୍ରେନିଂ ଦିଆଯିବ । ଯାହା ଦ୍ୱାରା ମାଓ ମୁକାବିଲାରେ ସହାୟତା ହେବ ।"ତେବେ ସରକାରଙ୍କ ଏହି ଯୋଜନାକୁ ଛାତ୍ରଛାତ୍ରୀ ସ୍ୱାଗତ କରିଥିବାବେଳେ କିଛି ଛାତ୍ରଛାତ୍ରୀ କହିଛନ୍ତି ନିଯୁକ୍ତି ସୃଷ୍ଟି କରିବା ଓ ଶିକ୍ଷାର ଭିତ୍ତିଭୂମି ସୁଧାରିଲେ ଆପେ ମାଓ କାର୍ଯ୍ୟକଳାପ ହ୍ରାସ ପାଇବ ।"
'ରାଜ୍ୟ ସରକାର ନିଯୁକ୍ତି ସୃଷ୍ଟି କରନ୍ତୁ':
ସୁମନ ନନ୍ଦ ନାମକ ଜଣେ ଛାତ୍ର କହିଛନ୍ତି,"କେବଳ ଯୁକ୍ତ ତିନି ଛାତ୍ରଛାତ୍ରୀଙ୍କ ପାଇଁ ସୀମିତ ନରଖି ସମସ୍ତ ଛାତ୍ରଛାତ୍ରୀଙ୍କୁ ଏହି ଟ୍ରେନିଂ ଦିଆଯାଉ । ବଲାଙ୍ଗୀର ମାଓ ପ୍ରଭାବିତ ଅଞ୍ଚଳ ହୋଇଥିବା ବେଳେ ଦାଦନ ପ୍ରବଣ ଜିଲ୍ଲା ଭାବରେ ଜଣାଶୁଣା । ଏଠାରେ କଳକାରଖାନା ଅଭାବ, ଜଳ ସେଚନ ବହୁ ଅସୁବିଧା ରହିଛି । ନିଯୁକ୍ତି ସୃଷ୍ଟି ହୋଇ ପାରୁନାହିଁ । କାମ ଧନ୍ଦା ପାଇଁ ଲକ୍ଷାଧିକ ଲୋକ ଦାଦନ ଖଟିବାକୁ ଯାଉଛନ୍ତି । ମାଓ ଅଞ୍ଚଳରେ ଯୁବକ ମାଓବାଦୀଙ୍କ ସହିତ ସାମିଲ ହୋଉଥିବାର ଅଭିଯୋଗ ଆସୁଛି । ତେଣୁ ରାଜ୍ୟ ସରକାର ନିଯୁକ୍ତି ସୃଷ୍ଟି କରନ୍ତୁ ।"ସେପଟେ କିଛି ଛାତ୍ରଛାତ୍ରୀ ଏଥିରେ ବାଛ ବିଚାର ନକରି ସବୁ କଲେଜ ଛାତ୍ରଛାତ୍ରୀଙ୍କୁ ଏହି ପ୍ରଶିକ୍ଷଣ ଦିଆ ଯାଉ ବୋଲି ଦାବି କରିଛନ୍ତି ।