କୋରାପୁଟ:ରାଜ୍ୟରେ କଫି ଚାଷକୁ ସଂପ୍ରସାରଣ କରିବା ପାଇଁ ଆସିଥିବା ପ୍ରସ୍ତାବକୁ ସୋମବାର ଓଡିଶା ସରକାରଙ୍କ କ୍ୟାବିନେଟ ମଞ୍ଜୁରୀ ଦେବା ପରେ କୋରାପୁଟରେ କଫିର ବ୍ୟାପକତାକୁ ନେଇ ନୂତନ ଆଶା ସଂଚାରିତ ହୋଇଛି । ରାଜ୍ୟରେ କଫି ଚାଷ ୧୦ ହଜାର ଏକର ଜମିରୁ ୧ ଲକ୍ଷ ଏକରକୁ ସଂପ୍ରସାରଣ କରାଯିବ । କୋରାପୁଟରେ ବହୁ ପରିମାଣରେ କଫି ଚାଷ କରାଯାଉଥିବାରୁ ରାଜ୍ୟ କ୍ୟାବିନେଟର ଏଭଳି ନିଷ୍ପତ୍ତି କଫି ଉତ୍ପାଦନକୁ ଆହୁରି ବୃଦ୍ଧି କରିବ । ରାଜ୍ୟ ସରକାରଙ୍କ ଏହି ଭଳି ଯୋଜନାକୁ କୋରାପୁଟ ଜିଲ୍ଲାର କଫି ଚାଷୀ ସ୍ବାଗତ କରିଛନ୍ତି ।
ତେବେ ରାଜ୍ୟରେ ଆସନ୍ତା 10 ବର୍ଷରେ 10 ଗୁଣା କଫି ଚାଷ ବଢ଼ିବ । ବର୍ତ୍ତମାନ ରାଜ୍ୟରେ 10 ହଜାର ଏକର ଜମିରେ କଫି ଚାଷ କରାଯାଉଛି । ସ୍ଥାୟୀ ଜୀବିକା ପାଇଁ ରାଜ୍ୟ ସରକାର କଫି ଚାଷ ଯୋଜନା ଆରମ୍ଭ କରିଛନ୍ତି । ଏହି ଯୋଜନା ଓଡ଼ିଶାର 6 ଟି ଜିଲ୍ଲା ଯଥା କୋରାପୁଟ, ରାୟଗଡା, କଳାହାଣ୍ଡି, କନ୍ଧମାଳ,କେନ୍ଦୁଝର, ଗଜପତି ଜ଼ିଲ୍ଲା ଅନ୍ତର୍ଭୁକ୍ତ ରହିଛି । କଫି ଚାରା ପ୍ରସ୍ତୁତ କରିବା ପାଇଁ ସ୍ବୟଂ ସହାୟକ ଗୋଷ୍ଠିମାନଙ୍କୁ ସାମିଲ କରାଯିବ । ଏହି ଯୋଜନା ନିମନ୍ତେ 2026-27 ସୁଦ୍ଧା 1144 କୋଟି ଟଙ୍କା ଖର୍ଚ୍ଚ ହେବ ।
ଏହା ମଧ୍ୟ ପଢ଼ନ୍ତୁ.....କ୍ୟାବିନେଟ ନିଷ୍ପତ୍ତି; ୬ ଜିଲ୍ଲାରେ ୧ ଲକ୍ଷ ଏକରକୁ ସଂପ୍ରସାରଣ ହେବ କଫି ଚାଷ, ଖର୍ଚ୍ଚ ହେବ ୧୧୪୪ କୋଟି