ସହଯୋଗୀଙ୍କ ଦେହାନ୍ତରେ ଦିଲ୍ଲୀ ଗସ୍ତ ବାତିଲ କଲେ ମୁଖ୍ୟମନ୍ତ୍ରୀ, ଶେଷ ଦର୍ଶନ ପାଇଁ ଯିବେ କେନ୍ଦୁଝର

ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦିଲ୍ଲୀ ଗସ୍ତ ବାତିଲ । ମୃତ ସହଯୋଗୀଙ୍କ ଶେଷ ଦର୍ଶନ ପାଇଁ କେନ୍ଦୁଝର ଯିବେ ।

ଭୁବନେଶ୍ବର/କେନ୍ଦୁଝର:ଜଣେ ସହଯୋଗୀଙ୍କ ଦେହାନ୍ତ କାରଣରୁ ଦିଲ୍ଲୀ ଗସ୍ତ ବାତିଲ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଆଜି (ସୋମବାର) ଅପରାହ୍ନରେ ମୁଖ୍ୟମନ୍ତ୍ରୀ ମୋହନ ଦିଲ୍ଲୀ ଗସ୍ତ କରିଥାଆନ୍ତେ । ରାଜନୈତିକ ସହଯୋଗୀ ତଥା କେନ୍ଦୁଝର ଜିଲ୍ଲାର ‘ଭାରତୀୟ ଜନତା ପାର୍ଟି’ ନଗର ମଣ୍ଡଳର ବରିଷ୍ଠ କାର୍ଯ୍ୟକର୍ତ୍ତା ନିରଞ୍ଜନ ଶତପଥୀଙ୍କ ଦେହାନ୍ତ କାରଣରୁ ମୁଖ୍ୟମନ୍ତ୍ରୀ ଗସ୍ତ ବାତିଲ କରିଛନ୍ତି । ସେ ନିରଞ୍ଜନଙ୍କ ଶେଷଦର୍ଶନ ଓ ଶେଷକୃତ୍ୟରେ ସାମିଲ ହେବା ପାଇଁ କେନ୍ଦୁଝର ଗସ୍ତ କରିବେ । ମୁଖ୍ୟମନ୍ତ୍ରୀ ଭୁବନେଶ୍ଵରରୁ ପ୍ରାୟ ସାଢ଼େ 1ଟାରେ ବାହାରି କେନ୍ଦୁଝରରେ ପହଞ୍ଚିବାର କାର୍ଯ୍ୟକ୍ରମ ରହିଛି । ନିରଞ୍ଜନ ଶତପଥୀ କେନ୍ଦୁଝର ବିଜେପିର ଜଣେ ବରିଷ୍ଠ କାର୍ଯ୍ୟକର୍ତ୍ତା ତଥା ମୁଖ୍ୟମନ୍ତ୍ରୀଙ୍କର ଘନିଷ୍ଠ ସହଯୋଗୀ ଭାବେ ବେଶ ଜଣାଶୁଣା ଥିଲେ ।

• କେନ୍ଦୁଝର ଗସ୍ତ କରି ଶେଷଦର୍ଶନ କରିବେ ମୁଖ୍ୟମନ୍ତ୍ରୀ:-

ଆଜି ଅପରାହ୍ନରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କର ଦିଲ୍ଲୀ ଗସ୍ତ କାର୍ଯ୍ୟକ୍ରମ ଥିଲା । ଏହା ପୂର୍ବରୁ ପୂର୍ବାହ୍ନରେ ଏକାଧିକ କାର୍ଯ୍ୟକ୍ରମରେ ସାମିଲ ହେବା ପରେ ବିଳମ୍ବିତ ଅପରାହ୍ନରେ ଦିଲ୍ଲୀ ଅଭିମୁଖେ ଯାତ୍ରା କରିଥାନ୍ତେ । ପୂର୍ବାହ୍ନରେ ବିଧାନସଭା ପରିସରରେ ବସିଥିବା ସର୍ବଦଳୀୟ ବୈଠକରେ ମୁଖ୍ୟମନ୍ତ୍ରୀ ମୋହନ ମାଝୀ ଅଂଶଗ୍ରହଣ କରିଥିଲେ । ବାଚସ୍ପତି ସୁରମା ପାଢୀଙ୍କ ଅଧ୍ୟକ୍ଷତାରେ ବସିଥିବା ଏହି ବୈଠକରେ ଉଭୟ ବିରୋଧୀ ଦଳ ବିଜେଡି ଓ କଂଗ୍ରେସର ନେତୃବୃନ୍ଦ ସାମିଲ ହୋଇଥିଲେ । ଗୃହକାର୍ଯ୍ୟରେ ସହଯୋଗ କରିବା ପାଇଁ ଆଲୋଚନା ହୋଇଥିଲା ।

ସୁନ୍ଦରଗଡ଼କୁ ବଡ଼ ଭେଟିଦେଲେ ମୁଖ୍ୟମନ୍ତ୍ରୀ ମୋହନ ମାଝୀ

• ବିଜେପି ବିଧାୟକ ଦଳ ବୈଠକରେ ମୁଖ୍ୟମନ୍ତ୍ରୀ:-

ଏହି ପରେ ଶାସକ ଦଳ ‘ଭାରତୀୟ ଜନତା ପାର୍ଟି’ର ବିଧାୟକ ଦଳ ବୈଠକ ଜାରି ରହିଛି । ଏଥିରେ ମୁଖ୍ୟମନ୍ତ୍ରୀ ଓ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ସହ ସମସ୍ତ ଦଳୀୟ ବିଧାୟକ ଉପସ୍ଥିତ ରହିଛନ୍ତି । କାର୍ଯ୍ୟକ୍ରମ ଶେଷ ହେବା ପରେ ମୁଖ୍ୟମନ୍ତ୍ରୀ ମୋହନ ମାଝୀ ପ୍ରାୟ ୧ଟା ବେଳେ କେନ୍ଦୁଝର ଅଭିମୁଖେ ବାହାରିବେ । କେନ୍ଦୁଝର ଜିଲ୍ଲା ବଡ଼ହଳ ସ୍ଥିତ ନିରଞ୍ଜନ ଶତପଥୀଙ୍କ ବାସଭବନରେ ପହଞ୍ଚି ମଖ୍ୟମନ୍ତ୍ରୀ ତାଙ୍କ ଶେଷ ଦର୍ଶନ କରିବାର କାର୍ଯ୍ୟକ୍ରମ ରହିଛି ।

ଏହା ମଧ୍ୟ ପଢ଼ନ୍ତୁ...୨୦ ଲକ୍ଷ ହିତାଧିକାରୀଙ୍କ ଆକାଉଣ୍ଟକୁ ଆସିଲା ସୁଭଦ୍ରା ଟଙ୍କା, ପାଇଲେ ପ୍ରଥମ କିସ୍ତିରୁ ବାଦ୍ ପଡ଼ିଥିବା ମହିଳା ଏହା ମଧ୍ୟ ପଢ଼ନ୍ତୁ...ଓଡ଼ିଶାର ଅଭିବୃଦ୍ଧି ଯାତ୍ରାକୁ ସମୃଦ୍ଧ କରିବାକୁ ସିଙ୍ଗାପୁର ଗସ୍ତ ବଡ଼ ସୁଯୋଗ: ମୁଖ୍ୟମନ୍ତ୍ରୀ ମୋହନ ମାଝୀ

ଇଟିଭି ଭାରତ, ଭୁବନେଶ୍ବର ଓ କେନ୍ଦୁଝର