ନିଆଳି: ରାଜଧାନୀ ଉପକଣ୍ଠରୁ ଜଣେ ମହିଳାଙ୍କୁ ମୁର୍ମୂଷୁ ଅବସ୍ଥାରେ ଉଦ୍ଧାର କରାଯାଇଛି । ଉଦ୍ଧାର ମହିଳା ଜଣକ ଛତିଶଗଡ଼ ରାଜ୍ୟର ହୋଇଥିବା ସୂଚନା ମିଳିଛି । ବାଲିପାଟଣା ଥାନା ପୁରଣ ପଧାନ ପଞ୍ଚାୟତ ଅନ୍ତର୍ଗତ ବିଶୁନିଆପଡ଼ା ଗ୍ରାମରୁ ଏହି ଘଟଣା ସାମ୍ନାକୁ ଆସିଛି । ତେବେ ଘଟଣାସ୍ଥଳରେ ବାଲିପାଟଣା ପୋଲିସ ପହଞ୍ଚି ଉକ୍ତ ମହିଳାଙ୍କୁ ଉଦ୍ଧାର କରିବା ସହ ତାଙ୍କ ପରିବାରକୁ ଖବର ଦେଇଛି । ଏହି ଘଟଣାରେ ଦୁଇ ଜଣଙ୍କୁ ଅଟକ ରଖିଛି ବାଲିପାଟଣା ପୋଲିସ ।
ସୂଚନାଯୋଗ୍ୟ, ଶନିବାର ସକାଳେ ବାଲିପାଟଣା ଥାନା ପୁରଣ ପଧାନ ପଞ୍ଚାୟତ ଅନ୍ତର୍ଗତ ବିଶୁନିଆପଡ଼ା ଗ୍ରାମର ଏକ ପରିତ୍ୟକ୍ତ ସ୍ଥାନରେ ଜଣେ ଅଚିହ୍ନା ମହିଳାଙ୍କୁ ସ୍ଥାନୀୟ ଲୋକମାନେ ଦେଖିବାକୁ ପାଇଥିଲେ । ଏହାପରେ ଲୋକେ ୧୧୨ କଣ୍ଟ୍ରୋଲ ରୁମକୁ ଫୋନ୍ କରିଥିଲେ । କିଛି ଘଣ୍ଟା ପରେ ପିସିଆର୍ ଭ୍ୟାନ ଘଟଣାସ୍ଥଳରେ ପହଞ୍ଚିଥିଲା । ପୋଲିସ ପହଞ୍ଚିବା ପୂର୍ବରୁ ଉକ୍ତ ମହିଳାଙ୍କୁ ନେବା ପାଇଁ ଜଣେ ମହିଳା ଓ ଜଣେ ପୁରୁଷ ଏକ ଅଟୋରେ ପହଞ୍ଚିଥିଲେ । ଆଉ ଅଟୋ ସାହାଯ୍ୟରେ ସେହି ମହଳାଙ୍କୁ ନେବା ପାଇଁଁ ଚେଷ୍ଟା କରୁଥିଲେ । ଏହି ସମୟରେ କିଛି ଗ୍ରାମବାସୀ ବିରୋଧ କରିଥିଲେ । ଉକ୍ତ ମହିଳାଙ୍କୁ ପୋଲିସ ଜିମା ଦିଆଯିବ ବୋଲି ଅଡ଼ି ବସିଥିଲେ ।
ସେପଟେ ଆସିଥିବା ଦୁଇ ବ୍ୟକ୍ତିଙ୍କ ଭୂମିକାକୁ ନେଇ ସନ୍ଦେହ ସୃଷ୍ଟି ହୋଇଥିଲା । ଏହା ପରେ ପୋଲିସରେ ଖବର ଦେଇଥିଲେ ସ୍ଥାନୀୟ ଲୋକେ । ଘଟଣାସ୍ଥଳରେ ପୋଲିସ ପହଞ୍ଚି ମହିଳାଙ୍କୁ ଉଦ୍ଧାର କରିବା ସହ ଦୁଇ ଜଣ ବ୍ୟକ୍ତିଙ୍କୁ ନିଜ ହେପାଜତକୁ ନେଇଥିଲା । ତେବେ ଉଦ୍ଧାର ହୋଇଥିବା ମହିଳା ଜଣଙ୍କ ଛତିଶଗଡ଼ ରାଜ୍ୟର ବୋଲି ବାଲିପାଟଣା ଥାନା ଆଇଆଇସି କହିଛନ୍ତି । ତାଙ୍କ ସ୍ବାମୀଙ୍କୁ ଫୋନ ଯୋଗେ ଘଟଣା ସମ୍ପର୍କରେ ସୂଚନା ଦିଆଯାଇଛି ।