Body Of Minor Boy Recovered From River ରାଇରଙ୍ଗପୁର:ରାଇରଙ୍ଗପୁରର ଖଡଖାଇ ନଦୀରେ ଅଘଟଣ । ନଦୀକୁ ଗାଧୋଇବାକୁ ଯାଇ ପାଣିରେ ବୁଡି ନାବାଳକଙ୍କ ମୃତ୍ୟୁ । ମୃତ ନାବାଳକ ଜଣକ ହେଲେ ରାଇରଙ୍ଗପୁର ଟାଉନ ଥାନା ଅର୍ନ୍ତଗତ ୧୨ ନଂ ୱାର୍ଡ଼ ଇଚିଣ୍ଡାର ସେକ ଉସମାନ ଅଲି ଓ ସାଇଦା ବିବିଙ୍କ ପୁଅ ସେକ ଆଲମ । ଅନ୍ୟପଟେ ପୁଅକୁ ହତ୍ୟା କରାଯାଇଥିବା ନେଇ ଥାନାରେ ଅଭିଯୋଗ କରିଛନ୍ତି ପରିବାର ଲୋକେ ।
ଅଭିଯୋଗ ଅନୁଯାୟୀ, ରାଇରଙ୍ଗପୁର ଟାଉନ ଥାନା ଅର୍ନ୍ତଗତ ଇଚିଣ୍ଡାର ସେକ ଉସମାନ ଅଲି ଓ ସାଇଦା ବିବିଙ୍କ ୮ ବର୍ଷର ସାନ ପୁଅ ସେକ ଆଲମ ଗତ ରବିବାର ଦିନ ସକାଳ ପ୍ରାୟ ୧୦.୩୦ ସମୟରେ ଘର ପାଖ ପିଲାଙ୍କ ସହିତ ନିକଟସ୍ଥ ଖଡଖାଇ ନଦୀକୁ ଗାଧୋଇବା ପାଇଁ ଯାଇଥିଲେ । ଘର ପାଖର ଦୁଇ ଜଣ ନାବାଳକ ଆଲମକୁ ନଦୀ ଗାଧୋଇ ଯିବା କହି ଘରୁ ଡାକି ନେଇଯାଇଥିବା କହିଛନ୍ତି ମୃତ ଆଲମର ମାଆ ସାଇଦା ବିବି । ହେଲେ ରବିବାର ଦିନ ଗାଧୋଇବାକୁ ଯାଇ ଆଲମ ଘରକୁ ଫେରି ନଥିଲେ । ଏନେଇ ଆଲମର ପରିବାର ଲୋକେ ପୁଅକୁ ବହୁତ ଖୋଜାଖୋଜି କରି ମଧ୍ୟ ପାଇ ନଥିଲେ । ସେପଟେ ଯେଉଁ ପିଲାମାନଙ୍କ ସହିତ ଆଲମ ଗାଧୋଇବାକୁ ଯାଇଥିଲା, ସେହି ପିଲାମାନଙ୍କ ପରିବାର ଲୋକେ ଆଲମ ବିଷୟରେ ପଚାରିବାରୁ ସେମାନେ ସନ୍ତୋଷଜନକ ଉତ୍ତର ଦେଇନଥିଲେ ।
ଏହା ମଧ୍ୟ ପଢନ୍ତୁ-ଜଗି ଥିଲା ଯମ, ଟାଣିନେଲା ନଦୀକୁ ! ଅଗ୍ନିଶମ ବିଭାଗ ପକ୍ଷରୁ ମୃତଦେହ ଉଦ୍ଧାର
ତେବେ ବହୁ ଖୋଜାଖୋଜି ପରେ ଗତକାଲି(ସୋମବାର) ସକାଳ ସମୟରେ ଖଡଖାଇ ନଦୀରୁ ଆଲମର ମୃତଦେହ ଉଦ୍ଧାର କରିଛି ରାଇରଙ୍ଗପୁର ଟାଉନ ଥାନା ପୋଲିସ । ତେବେ ପାରିପାର୍ଶ୍ବିକ ସ୍ଥିତିରୁ ଆଲମକୁ ହତ୍ୟା କରାଯାଇଥିବା ଆଲମର ପରିବାର ଲୋକେ ଅନୁମାନ କରି ଥାନାରେ ଅଭିଯୋଗ କରିଛନ୍ତି । ଆଲମର ଶରୀରରେ କ୍ଷତ ଚିହ୍ନ ରହିଥିବା ସହିତ ବେକରେ ଦାଗ ମଧ୍ୟ ରହିଥିବା କହିଛନ୍ତି ଆଲମର ମାଆ । ଘଟଣାସ୍ଥଳରେ ପୋଲିସ ତଦନ୍ତ ଆରମ୍ଭ କରିବା ସହିତ ଅଧିକ ତଦନ୍ତ ପାଇଁ ବାରିପଦାରୁ ସାଇଣ୍ଟିଫିକ ଟିମ୍କୁ ଡ଼କାଇଥିଲେ । ଉଭୟ ପୋଲିସ ଓ ସାଇଣ୍ଟିଫିକ ଟିମର ତଦନ୍ତ ପରେ ମୃତଦେହକୁ ବ୍ୟବଚ୍ଛେଦ ନିମନ୍ତେ ରାଇରଙ୍ଗପୁର ମେଡିକାଲକୁ ପଠାଯାଇଛି । ଆଜି ବ୍ୟବଚ୍ଛେଦ ପରେ ଆଲମର ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି ।
ସେପଟେ ଆଲମ ସହିତ ଗାଧୋଇବାକୁ ଯାଇଥିବା ଦୁଇ ଜଣ ନାବାଳକଙ୍କୁ ଥାନାକୁ ଡ଼ାକି ଅଧିକ ପଚରାଉଚରା ଜାରି ରଖିଛି ପୋଲିସ । ତେବେ ପୋଲିସ ଓ ସାଇଣ୍ଟିଫିକ ଟିମର ତଦନ୍ତ ରିପୋର୍ଟ ଓ ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ଘଟଣାର ସତ୍ୟାସତ୍ୟ ଜଣାପଡ଼ିବ ବୋଲି ସାଧାରଣରେ ଚର୍ଚ୍ଚା ହେଉଛି । ଏଥି ସହିତ କେଉଁ ପରିସ୍ଥିତିରେ ନାବାଳକ ଜଣକ ମୃତ୍ୟୁବରଣ କରିଛନ୍ତି ତାହା ମଧ୍ୟ ସ୍ପଷ୍ଟ ହୋଇପାରିବ ।
ଇଟିଭି ଭାରତ, ରାଇରଙ୍ଗପୁର
