ପୁରୀ:ବିଶ୍ବାସ ଓ ମାନ୍ୟତା ରହିଛି ପୁରୀ ସ୍ବର୍ଗଦ୍ବାରରେ ଶେଷକୃତ୍ୟ କଲେ ଦିବଙ୍ଗତ ଆତ୍ମାର ସଦଗତି ହୁଏ । ଏହି ବିଶ୍ବାସ ଆଧାରରେ ହିଁ ଅନେକ ଲୋକ ନିଜ ଆତ୍ମୀୟ ସ୍ବଜନଙ୍କ ଅନ୍ତିମ ସଂସ୍କାର ସ୍ବର୍ଗଦ୍ବାରରେ କରିବାକୁ ଇଚ୍ଛା ରଖିଥାଆନ୍ତି । ତେବେ ଏହାରି ମଧ୍ୟରେ ସ୍ବର୍ଗଦ୍ବାରରେ ବଢିବାରେ ଲାଗିଛି ମୃତଦେହ ସଂଖ୍ୟା । ଗତ କିଛି ବର୍ଷ ମଧ୍ୟରେ ଏହି ସଂଖ୍ୟାରେ ଆଖିଦୃଶିଆ ବୃଦ୍ଧି ଘଟିଛି । ମାତ୍ର ଏହି ବୃଦ୍ଧି ସହ ଏବେ ଏକ ନୂଆ ସମସ୍ୟା ମଧ୍ୟ ସାମ୍ନାକୁ ଆସିଲାଣି । ମୃତଦେହ ବଢୁଥିବା ବେଳେ ସେହି ଧାରାରେ ଆବଶ୍ୟକ ପରିମାଣର କାଠ ସ୍ବର୍ଗଦ୍ବାରକୁ ଆସୁନି । ଝାଉଁ ଜଙ୍ଗଲ ପରିମାଣ ଦିନକୁ ଦିନ ହ୍ରାସ ପାଇବା ମଧ୍ୟ ଏହି କାଠ ସଙ୍କଟର ଅନ୍ୟ ଏକ ପ୍ରମୁଖ କାରଣ । ଫଳରେ ସ୍ବର୍ଗଦ୍ବାରକୁ ଆବଶ୍ୟକ ପରିମାଣର କାଠ ଯୋଗାଣରେ ଅସହାୟ ପ୍ରକାଶ କଲାଣି ବନ ବିଭାଗ ।
- ଏବେ 100 ଛୁଇଁବାକୁ ବସିଲାଣି ଦୈନିକ ଦାହ ସଂଖ୍ୟା:-
ତଥ୍ୟ ଅନୁସାରେ, ତିନି ବର୍ଷ ପୂର୍ବରୁ ପ୍ରତିଦିନ ସ୍ବର୍ଗଦ୍ବାରରେ ମୃତଦେହ ଦାହ ସଂଖ୍ୟା ସର୍ବାଧିକ ୫୦ ମଧ୍ୟରେ ସୀମିତ ରହୁଥିଲା । ଏବେ ଦୈନିକ ୭୦ରୁ ୯୦ଟି ମୃତଦେହ ଦାହ ହେଉଛି । କେବେ କେବେ ସଂଖ୍ୟା 90 ମଧ୍ୟ ପାର କରୁଛି । ଶ୍ରୀମନ୍ଦିର ରୋଷ ଓ ଅନ୍ୟାନ୍ୟ କାର୍ଯ୍ୟ ସମେତ ସ୍ବର୍ଗଦ୍ବାର ଦାହ ପ୍ରକ୍ରିୟା ପାଇଁ କାଠ ଯୋଗାଣର ଦାୟିତ୍ବ ‘ଓଡିଶା ବନ ଉନ୍ନୟନ ନିଗମ’ କାନ୍ଧରେ ନ୍ୟସ୍ତ ରହିଛି । ଏବେ ଗୋଟିଏ ଦାହ ପିଛା ପ୍ରାୟ ଏକ କୁଇଣ୍ଟାଲ ୮୦ କିଲୋଗ୍ରାମ କାଠ ଯୋଗାଇ ଦିଆଯାଉଛି । ସେହିପରି କେତେକ ଦାହରେ ଅତିରିକ୍ତ କାଠର ମଧ୍ୟ ଆବଶ୍ୟକତା ପଡୁଛି । ସେହି ହିସାବରେ ଏବେ ସ୍ବର୍ଗଦ୍ବାରରେ ଦୈନିକ ୧୨ରୁ ୧୪ଟନ୍ କାଠର ଆବଶ୍ୟକ ପଡୁଛି । ସେହି ଅନୁପାତରେ ମାସକୁ ପ୍ରାୟ ୪ ଶହ ଟନ କାଠ ଆବଶ୍ୟକ ପଡୁଥିବା ବେଳେ ସେହି ପରିମାଣର କାଠ ଯୋଗାଇବା ସମ୍ଭବ ହେଉନି ।
ସ୍ବର୍ଗଦ୍ଵାରରେ ଦାହ ପାଇଁ ମିଳୁନି ଆବଶ୍ୟକ ପରିମାଣ କାଠ, ବିଦ୍ୟୁତ ଚୁଲା ପାଇଁ ଉଠିଲା ଦାବି (ETV Bharat Odisha) - ବିଦ୍ୟୁତ୍ ଚୁଲା କାର୍ଯ୍ୟକାରୀ କରିବାକୁ ଦାବି:-
ସେପଟେ ସ୍ବର୍ଗଦ୍ବାରର ଏହି କାଠ ସଙ୍କଟର ସମାଧାନ ପାଇଁ ବିକଳ୍ପ ବ୍ୟବସ୍ଥା ସହ ଦାବି ମଧ୍ୟ ସାମ୍ନାକୁ ଆସିଲାଣି । କାଠରେ ଦାହ ପରିବର୍ତ୍ତେ ବିଦ୍ୟୁତ୍ ଚୁଲା ବ୍ୟବସ୍ଥା କାର୍ଯ୍ୟକାରୀ କରିବାକୁ ପରିବେଶବିତ୍ ଓ ଶ୍ରୀମନ୍ଦିର ବରିଷ୍ଠ ସେବାୟତ ପ୍ରସ୍ତାବ ରଖିଛନ୍ତି । ଏହା କୌଣସି ପରମ୍ପରା ବିରୋଧୀ କାର୍ଯ୍ୟ ହେବ ନାହିଁ ବରଂ ଏହା ଫଳରେ କାଠ ସମସ୍ୟା ଦୂର ହୋଇପାରିବ ବୋଲି ସେମାନେ ଯୁକ୍ତି ବାଢିଛନ୍ତି । ଅନ୍ୟପଟେ ଏପରି ବିକଳ୍ପ ପ୍ରସ୍ତାବକୁ ଜିଲ୍ଲା ପ୍ରଶାସନ ସମ୍ପୂର୍ଣ୍ଣ ଅସ୍ବୀକାର ମଧ୍ୟ କରିନି । ଜିଲ୍ଲାପାଳ କହିଛନ୍ତି, ଦାହ ପାଇଁ ଆସୁଥିବା ଲୋକଙ୍କ ଫିଡବ୍ୟାକ ନିଆଯାଉଛି । ଆବଶ୍ୟକ ସ୍ଥଳେ ସେହି ଆଧାରରେ ଶ୍ରୀମନ୍ଦିର ପରିଚାଳନା କମିଟିରେ ମଧ୍ୟ ଏହି ବିଦ୍ୟୁତ ଚୁଲା କଥା ବିଚାର କରାଯାଇପାରେ ।
ସ୍ବର୍ଗଦ୍ଵାରରେ ଦାହ ପାଇଁ ମିଳୁନି ଆବଶ୍ୟକ ପରିମାଣ କାଠ, ବିଦ୍ୟୁତ ଚୁଲା ପାଇଁ ଉଠିଲା ଦାବି (ETV Bharat Odisha) - ଦାହରେ କେବଳ ଝାଉଁ କାଠର ବ୍ୟବହାର ପରମ୍ପରା ରହିଛି...
ସ୍ବର୍ଗଦ୍ବାରରେ ମୃତଦେହ ଦାହ ପାଇଁ କେବଳ ଝାଉଁ କାଠ ବ୍ୟବହାରର ପରମ୍ପରା ରହିଆସିଛି । ତେବେ ସୂଚନା ଅନୁସାରେ ‘ଓଡିଶା ବନ ଉନ୍ନୟନ ନିଗମ’ ଅଧିନରେ ଅସ୍ତରଙ୍ଗର କାଜୁରୀନି କୂପରେ ପାଞ୍ଚ ହଜାର ଝାଉଁ ଗଛ ଥିଲା । ସେଥିମଧ୍ୟରୁ ଏବେ ଆଉ ମାତ୍ର ଦୁଇ ହଜାର ଗଛ ଅଛି । କାଜୁରୀନା କୂପରୁ ଝାଉଁ ଗଛ ପରିମାଣ ହ୍ରାସ ପାଇବା ଫଳରେ କାଠ ଯୋଗାଣ ପ୍ରଭାବିତ ହୋଇଛି ।
ସ୍ବର୍ଗଦ୍ଵାରରେ ଦାହ ପାଇଁ ମିଳୁନି ଆବଶ୍ୟକ ପରିମାଣ କାଠ, ବିଦ୍ୟୁତ ଚୁଲା ପାଇଁ ଉଠିଲା ଦାବି (ETV Bharat Odisha) - ପରିବେଶର ସୁରକ୍ଷା ସହ ପରମ୍ପରା ଅକ୍ଷୂର୍ଣ୍ଣ ରଖିବାକୁ ପଦକ୍ଷେପ ନିଅ: ପରିବେଶବିତ
ଜଣେ ସ୍ଥାନୀୟ ପରିବେଶବିତ ସରୋଜ କୁମାର ଜେନା କହିଛନ୍ତି,‘‘ ସ୍ୱର୍ଗଦ୍ଵାରରେ ଯେଉଁ କାଠ ସଙ୍କଟ ସୃଷ୍ଟି ହୋଇଛି, ତାର ସମାଧାନ ପାଇଁ ପୁରୀ ଜିଲ୍ଲାପାଳ ପଦକ୍ଷେପ ନେବା ଉଚିତ୍ । ସଂସ୍କୃତି ଓ ପରମ୍ପରାକୁ ନେଇ ପରିବେଶକୁ କ୍ଷତି ପହଞ୍ଚାଯିବା ଉଠିତ ନୁହେଁ । ପରିବେଶ ଠିକ୍ ରହିଲେ, ହିଁ ପରମ୍ପରା ବଞ୍ଚି ରହିବ । ଅନେକ ସ୍ଥାନରେ ବିଦ୍ୟୁତ ଚୁଲା ବ୍ୟବସ୍ଥାରେ ମୃତଦେହ ଦାହ କରାଯାଉଛି । ସେହିପରି ବ୍ୟବସ୍ଥା ଏଠାରେ ମଧ୍ୟ କରାଯାଇ ପାରିବ । ତେବେ ଗୋବରରୁ ପ୍ରସ୍ତୁତ ଘଷିରେ ମୃତଦେହ ଦାହ କରିବାକୁ ମତ୍ସ୍ୟ ଓ ପଶୁସମ୍ପଦ ମନ୍ତ୍ରୀ ଯେଉଁ ପ୍ରସ୍ତାବ ଦେଇଛନ୍ତି, ତାହା ସ୍ବାଗତଯୋଗ୍ୟ । ଏହା ଦ୍ବାରା ଗ୍ରାମାଞ୍ଚଳରେ ଥିବା ମହିଳା ସ୍ବୟଂ ସହାୟିକା ଗୋଷ୍ଠୀର ମହିଳାମାନେ ମଧ୍ୟ ରୋଜଗାରକ୍ଷମ ହୋଇପାରିବେ । ଦିନକୁ ଦିନ ଗଛ ସଂଖ୍ୟା କମି ଚାଲିଥିବା ବେଳେ ସେହି ଆଧାରରେ ବୃକ୍ଷ ରୋପଣ ହେଉନାହିଁ । କିନ୍ତୁ ସ୍ବର୍ଗଦ୍ବାରରେ ମୃତଦେହ ସଂଖ୍ୟା ବଢିବାରେ ଲାଗିଛି । ତେବେ ସମୟ ଥାଉ ଥାଉ ଆମକୁ ଚିନ୍ତା କରିବାକୁ ହେବ । ସ୍ବର୍ଗଦ୍ଵାରରେ କିଭଳି କାଠର ବିକଳ୍ପ ବ୍ୟବସ୍ଥା କରାଯାଇ ଆମ ପରମ୍ପରାକୁ ଅକ୍ଷୂର୍ଣ୍ଣ ରଖି ହେବ, ତାହା ଚିନ୍ତା କରିବା ଦରକାର ।’’
ସ୍ବର୍ଗଦ୍ଵାରରେ ଦାହ ପାଇଁ ମିଳୁନି ଆବଶ୍ୟକ ପରିମାଣ କାଠ, ବିଦ୍ୟୁତ ଚୁଲା ପାଇଁ ଉଠିଲା ଦାବି (ETV Bharat Odisha) - ବିଦ୍ୟୁତ ଚୁଲା ପରମ୍ପରା ବିରୋଧୀ ହେବନାହଁ, ବରଂ ଗ୍ରହଣୀୟ ହେବ : ବରିଷ୍ଠ ସେବାୟତ
ଶ୍ରୀମନ୍ଦିର ବରିଷ୍ଠ ସେବାୟତ ଗୌରହରି ପ୍ରଧାନ କହିଛନ୍ତି,‘‘ କେବଳ ପୁରୀ ନୁହେଁ, ଆମ ରାଜ୍ୟ ଓ ବାହାର ରାଜ୍ୟରୁ ବି ଅନେକ ମୃତଦେହ ଅଣାଯାଇ ଦାହ କରଯାଉଛି । ଦିନକୁ ଦିନ ସଂଖ୍ୟା ବଢ଼ି ଚାଲିଥିଵାରୁ କାଠ ଯୋଗାଣରେ ସଙ୍କଟ ଦେଖାଦେଲାଣି । ଏଣୁ ଏହାର ବିକଳ୍ପ ସ୍ୱରୂପ ବିଦ୍ୟୁତ ଦାହ ଚୁଲା କାର୍ଯ୍ୟକାରୀ କରାଯିବାର ଆବଶ୍ୟକତା ରହିଛି । ଦୀର୍ଘ ସମୟ ଧରି କାଠରେ ଶବ ଦାହ କରିବା ପାଇଁ ଅନେକ ଲୋକଙ୍କ ପାଖରେ ସମୟ ମଧ୍ୟ ନାହିଁ । ତେବେ ସ୍ବର୍ଗଦ୍ଵାରରେ କୌଣସି ବିକଳ୍ପ ନଥିବାରୁ ସମସ୍ତେ କାଠ ଉପରେ ନିର୍ଭର କରୁଛନ୍ତି । ତେବେ ପରିବେଶ ଯେଭଳି ନଷ୍ଟ ହେବାକୁ ବସିଲାଣି, କାଠ ସଙ୍କଟ ଦେଖା ଦେଲାଣି, ସ୍ବର୍ଗଦ୍ବାରରେ ବିଦ୍ୟୁତ ଚୂଲା କାର୍ଯ୍ୟକାରୀ ହେବାର ଆବଶ୍ୟକତା ରହିଛି । ଏହା ପରମ୍ପରା ବିରୋଧୀ ହେବନାହିଁ । ଅନେକ ସ୍ଥାନରେ ଏହା କାର୍ଯ୍ୟକାରୀ ହେଲାଣି । ସ୍ବର୍ଗଦ୍ବାରର ପବିତ୍ରତା ରହିଛି । ବିଦ୍ୟୁତ୍ ଚୂଲା ବ୍ୟବସ୍ଥା କାର୍ଯ୍ୟକାରୀ ହେଲେ ଲୋକମାନେ ଏହାକୁ ଗ୍ରହଣ କରିବେ ।’’
ସ୍ବର୍ଗଦ୍ଵାରରେ ଦାହ ପାଇଁ ମିଳୁନି ଆବଶ୍ୟକ ପରିମାଣ କାଠ, ବିଦ୍ୟୁତ ଚୁଲା ପାଇଁ ଉଠିଲା ଦାବି (ETV Bharat Odisha) - ଫିଡବ୍ୟାକ୍ ଆଧାରରେ ନିଷ୍ପତ୍ତି: ଜିଲ୍ଲାପାଳ
ସେପଟେ ସ୍ବର୍ଗଦ୍ବାରରେ କାଠ ସମସ୍ୟାକୁ ନେଇ ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ କହିଛନ୍ତି,‘‘ କାଠ ସଙ୍କଟ ଦୂର ପାଇଁ ‘ବନ ଉନ୍ନୟନ ନିଗମ’ ସହ ଆଲୋଚନା କରାଯାଇ ପଦକ୍ଷେପ ନିଆଯିବ । ତେବେ କାଠର ବିକଳ୍ପ ଭାବେ ବିଦ୍ୟୁତ ଚୁଲା କାର୍ଯ୍ୟକାରୀ କରିବା ପାଇଁ ଲୋକଙ୍କଠାରୁ ମତାମତ ନିଆଯାଉଛି । ଯଦି ଏହା ସମ୍ପର୍କରେ ଲୋକଙ୍କଠାରୁ ଅନୁକୂଳ ମତାମତ ଆସେ, ତେବେ ସ୍ବର୍ଗଦ୍ବାରରେ ଆଗାମୀ ଦିନରେ ବିଦ୍ୟୁତ୍ ଚୁଲାରେ ଦାହ ପ୍ରକ୍ରିୟା କାର୍ଯ୍ୟକାରୀ କରାଯିବ । ଏହା ସହ କାଠ ସଙ୍କଟ ଦୂର ନେଇ ମଧ୍ୟ ପଦକ୍ଷେପ ନିଆଯିବ ।’’
ଇଟିଭି ଭାରତ, ପୁରୀ
