ହାଇଦ୍ରାବାଦ:ଭାରତର ଷ୍ଟାର କ୍ରିକେଟର ବିରାଟ କୋହଲିଙ୍କୁ ଅପେକ୍ଷା କରିଛି ବିରଳ ରେକର୍ଡ । ଇଂଲଣ୍ଡ ବିପକ୍ଷ କ୍ରିକେଟ ସିରିଜରେ ଅନେକ ବଡ ବଡ ଖେଳାଳିଙ୍କୁ ପଛରେ ପକାଇ ବିରାଟ ହାସଲ କରିପାରନ୍ତି ଅନେକ ରେକର୍ଡ । ଫେବୃଆରୀ ୬ ତାରିଖରୁ ଆରମ୍ଭ ହେବାକୁ ଯାଉଥିବା ଇଂଲଣ୍ଡ- ଇଣ୍ଡିଆ ଦିନିକିଆ ସିରିଜରେ ନୂଆ ରେକର୍ଡ କରିବା ପାଇଁ ସୁଯୋଗ ରହିଛି କୋହଲିଙ୍କ ନିକଟରେ । କିଛି ଦିନ ହେବ ବିରାଟଙ୍କ ପ୍ରଦର୍ଶନ ସେତେଟା ଭଲ ନଥିବା ବେଳେ ଇଂଲଣ୍ଡ ବିପକ୍ଷ ମ୍ୟାଚରେ ତାଙ୍କର ପ୍ରଦର୍ଶନ କିଭଳି ରହିବ ତାହା ଉପରେ ଫ୍ୟାନ୍ସଙ୍କ ନିଜର ରହିଛି ?
ସଚିନଙ୍କ ରେକର୍ଡ ଭାଙ୍ଗି ପାରିବେ କି କୋହଲି ?
ବର୍ତ୍ତମାନ ବିରାଟ କୋହଲି, ୫୦ ଓଭରିଆ ବା ଦିନିକିଆ ଅନ୍ତର୍ଜାତୀୟ ମ୍ୟାଚରେ ସର୍ବାଧିକ ରନ ସଂଗ୍ରହକାରୀ ଖେଳାଳିଙ୍କ ମଧ୍ୟରେ ତୃତୀୟ ସ୍ଥାନରେ ରହିଛନ୍ତି । ଦିନିକିଆ କ୍ରିକେଟରେ ଦ୍ରୁତତମ ୧୪ ହଜାର ରନ ସଂଗ୍ରହକାରୀ ଖେଳାଳିଙ୍କ ମଧ୍ୟରେ ନମ୍ବର ଓ୍ବାନରେ ରହିବାକୁ କୋହଲିଙ୍କୁ ଆଉ ଆବଶ୍ୟକ ମାତ୍ର ୯୪ ରନ । ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ୩୫୯ ମ୍ୟାଚ ଖେଳି ୧୪ ହଜାର ରନ ସଂଗ୍ରହ କରିଥିବା ବେଳେ ଶ୍ରୀଲଙ୍କାର ଓ୍ବିକେଟ କିପର-ବ୍ୟାଟର ତଥା ପୂର୍ବତନ କ୍ୟାପଟେନ କୁମାର ସାଙ୍ଗାକରା ୪୦୨ଟି ମ୍ୟାଚ ଖେଳି ୧୪ ହଜାର ରନ କ୍ଲବରେ ସାମିଲ ହୋଇଥିଲେ । କୋହଲି ବର୍ତ୍ତମାନ ସୁଦ୍ଧା ୨୯୫ଟି ମ୍ୟାଚ ଖେଳିଥିବା ବେଳେ ତୃତୀୟ ଖେଳାଳି ଭାବେ ଏଭଳି ବଡ ଉପଲବ୍ଧି ହାସଲ କରିବାକୁ ଯାଉଛନ୍ତି । ଇଂଲଣ୍ଡ ବିପକ୍ଷ ମ୍ୟାଚରେ ଯଦି ସେ ଭଲ ପ୍ରଦର୍ଶନ କରନ୍ତି ତେବେ ଏହି ରେକର୍ଡ ହାସଲ କରିବାକୁ ତାଙ୍କୁ ବେଶ ସମୟ ଲାଗିବ ନାହିଁ ।
| ଅନ୍ତର୍ଜାତୀୟ ଦିନିକିଆରେ ଦ୍ରୁତତମ ୧୪ ହଜାର ରନ ସଂଗ୍ରହକାରୀ ଖେଳାଳି |
| ଖେଳାଳି | ମ୍ୟାଚ୍ | ଇନିଂସ |
| ସଚିନ ତେନ୍ଦୁଲକର (ଭାରତ) | ୩୫୯ | ୩୫୦ |
| କୁମାର ସାଙ୍ଗାକରା (ଶ୍ରୀଲଙ୍କା) | ୪୦୨ | ୩୭୮ |
୧୪ ହଜାର ରନ କ୍ଲବରେ ସାମିଲ ହେବାର ସୁଯୋଗ:
ସେହିଭଳି ଦିନିକିଆ କ୍ରିକେଟରେ ସର୍ବାଧିକ ରନ ସଂଗ୍ରହକାରୀ ଖେଳାଳିଙ୍କ ମଧ୍ୟରେ କୋହଲିଙ୍କ ସ୍ଥାନ ତୃତୀୟରେ ରହିଛି । ୩୬ ବର୍ଷୀୟ ବିରାଟ କୋହଲିଙ୍କ ନାଁରେ ୫୦ଟି ଶତକ ରହିଛି ଯାହା ୫୦ ଓଭର ବିଶିଷ୍ଟ ମ୍ୟାଚରେ ସବୁଠୁ ଅଧିକ । ଆଉ ମଧ୍ୟ ତାଙ୍କ ନାଁରେ ୭୨ଟି ଅର୍ଦ୍ଧଶତକ ମଧ୍ୟ ରହିଛି । କୋହଲିଙ୍କ ପାଖରେ ଇଂଲଣ୍ଡ ବିପକ୍ଷ ମ୍ୟାଚରେ ୧୪ ହଜାର ରନ କ୍ଲବରେ ସାମିଲ ହେବା ପାଇଁ ଏକ ସୁବର୍ଣ୍ଣ ସୁଯୋଗ ରହିଛି ।
| ଦିନିକିଆ କ୍ରିକେଟରେ ସର୍ବାଧିକ ରନ ସଂଗ୍ରହାକାରୀ ଖେଳାଳି |
| ଖେଳାଳି | ମ୍ୟାଚ୍ | ଇନିଂସ | ରନ୍ | ଶତକ | ଅର୍ଦ୍ଧଶତକ | ଆଭରେଜ୍ |
| ସଚିନ ତେନ୍ଦୁଲକର (ଭାରତ) | ୪୬୩ | ୪୫୨ | ୧୮୪୨୬ | ୪୯ | ୯୬ | ୪୪.୮୩ |
| କୁମାର ସାଙ୍ଗାକାରା (ଶ୍ରୀଲଙ୍କା) | ୪୦୪ | ୩୮୦ | ୧୪୨୩୪ | ୨୫ | ୯୩ | ୪୧.୯୮ |
| ବିରାଟ କୋହଲି (ଭାରତ) | ୨୯୫ | ୨୮୩ | ୧୩୯୦୬ | ୫୦ | ୭୨ | ୫୮.୧୮ |
| ରିକି ପଏଣ୍ଟିଂ (ଅଷ୍ଟ୍ରେଲିଆ) | ୩୭୫ | ୩୬୫ | ୧୩୭୦୪ | ୩୦ | ୮୨ | ୪୨.୦୩ |
| ସନଥ ଜୟସୂରିୟା (ଶ୍ରୀଲଙ୍କା) | ୪୪୫ | ୪୩୩ | ୧୩୪୩୦ | ୨୮ | ୬୮ | ୩୨.୩୬ |
ଇଂଲଣ୍ଡ ବିପକ୍ଷରେ ଭାରତୀୟ ଖେଳାଳିଙ୍କ ରେକର୍ଡ ଭାଙ୍ଗିବାର ସୁଯୋଗ:
ଇଂଲଣ୍ଡ ବିପକ୍ଷରେ ଭାରତୀୟ ଖେଳାଳିଙ୍କ ରେକର୍ଡ ଭାଙ୍ଗିପାରନ୍ତି ବିରାଟ କୋହଲି । ସେ ବର୍ତ୍ତମାନ ସୁଦ୍ଧା ଇଂଲଣ୍ଡ ବିପକ୍ଷରେ ୩୬ଟି ମ୍ୟାଚ ଖେଳି ୧,୩୪୦ ରନ କରି ତାଲିକାର ଚତୁର୍ଥ ସ୍ଥାନରେ ରହିଛନ୍ତି । ତେନ୍ଦୁଲକର ୩୭ ମ୍ୟାଚ ଖେଳି ୧,୪୫୫ ରନ ସଂଗ୍ରହ କରି ତୃତୀୟ ସ୍ଥାନରେ, ଯୁବରାଜ ସିଂହ ୩୬ଟି ମ୍ୟାଚ ଖେଳି ୧,୫୨୩ ରନ୍ ସଂଗ୍ରହ କରି ଦ୍ୱିତୀୟ ଓ ମହେନ୍ଦ୍ର ସିଂହ ଧୋନି ୪୪ଟି ମ୍ୟାଚ ଖେଳି ୧,୫୪୬ ରନ ସଂଗ୍ରହ କରି ପ୍ରଥମରେ ରହିଛନ୍ତି । ଯଦି ବିରାଟ କୋହଲି ତିନୋଟି ମ୍ୟାଚ ବିଶିଷ୍ଟ ଏହି ସିରିଜରେ ୨ଟି ଶତକ ହାସଲ କରିବାରେ ସଫଳ ହୁଅନ୍ତି ତେବେ ସେ ଇଂଲଣ୍ଡ ବିପକ୍ଷରେ ସବୁଠୁ ଅଧିକ ରନ ସଂଗ୍ରହକାରୀ ଖେଳାଳି ହୋଇପାରିବେ ଆଉମଧ୍ୟ ସବୁଠୁ ଅଧିକ ଶତକ ହାସଲକାରୀ ଖେଳାଳି ମଧ୍ୟ ହୋଇପାରିବେ ।
| ଇଂଲଣ୍ଡ ବିପକ୍ଷ ଦିନିକିଆରେ ସର୍ବାଧିକ ରନ ସଂଗ୍ରହକାରୀ ଭାରତୀୟ ଖେଳାଳି |
| ଖେଳାଳି | ମ୍ୟାଚ୍ | ଇନିଂସ | ନମ୍ବର | ରନ୍ | ସର୍ବାଧିକ ସ୍କୋର | ଆଭରେଜ୍ | ଷ୍ଟ୍ରାଇକ ରେଟ୍ | ଶତକ | ଅର୍ଦ୍ଧଶତକ | ଶୂନ | ଚଉକା | ଛକା |
| ମହେନ୍ଦ୍ର ସିଂହ ଧୋନି | ୪୮ | ୪୪ | ୧୧ | ୧୫୪୬ | ୧୩୪ | ୪୬.୮୪ | ୮୭.୯୪ | ୧ | ୧୦ | ୧ | ୧୨୯ | ୩୪ |
| ଯୁବରାଜ ସିଂହ | ୩୭ | ୩୬ | ୬ | ୧୫୨୩ | ୧୫୦ | ୫୦.୭୬ | ୧୦୧.୬ | ୪ | ୭ | ୨ | ୧୭୩ | ୨୯ |
| ସଚିନ ତେନ୍ଦୁଲକର | ୩୭ | ୩୭ | ୪ | ୧୪୫୫ | ୧୨୦ | ୪୪.୦୯ | ୮୯.୨ | ୨ | ୧୦ | ୦ | ୧୭୩ | ୧୭ |
| ବିରାଟ କୋହଲି | ୩୬ | ୩୬ | ୪ | ୧୩୪୦ | ୧୨୨ | ୪୧.୮୭ | ୮୮.୧୫ | ୩ | ୯ | ୪ | ୧୨୭ | ୧୨ |
| ସୁରେଶ ରୈନା | ୩୭ | ୩୨ | ୩ | ୧୨୦୭ | ୧୦୦ | ୪୧.୬୨ | ୯୨.୦୬ | ୧ | ୧୧ | ୨ | ୧୦୮ | ୨୫ |
ବ୍ୟୁରୋ ରିପୋର୍ଟ, ଇଟିଭି ଭାରତ
