ଦେବଗଡ଼:ଲୋକସଭା ନିର୍ବାଚନ ପାଇଁ ସରଗରମ ରହିଛି ଦେବଗଡ଼ ରାଜନୀତି । ନିର୍ବାଚନ ବୈତରଣୀ ପାର୍ ହେବାକୁ ତିନି ପ୍ରମୁଖଃ ରାଜନୈତିକ ଦଳ ବିଜେପି, ବିଜେଡି ଓ କଂଗ୍ରେସ ପ୍ରଚାର ଅଭିଯାନକୁ ଜୋରଦାର କରିଛନ୍ତି । କିଏ ଘର ଘର ବୁଲି ଭୋଟ ମାଗୁଛି ତ ଆଉ କେହି ମାଳ ମାଳ ସଭା ସମ୍ମିଳନୀ କରୁଛି । ଏହି କ୍ରମରେ ଦେବଗଡ଼ ବିଧାନସଭା ଏବଂ ସମ୍ବଲପୁର ଲୋକସଭା ଆସନ ହାତେଇବା ପାଇଁ ବିଜେଡି ବିଭିନ୍ନ ରାଜନୈତିକ କାର୍ଯ୍ୟକ୍ରମ କରି ଭୋଟରଙ୍କୁ ପ୍ରଭାବିତ କରିବାକୁ ରଣକୌଶଳ ଆପଣାଉଛି । ଏହି ପରିପ୍ରେକ୍ଷୀରେ ରିଆମାଳ ବ୍ଲକ ପଳସମା ହାଇସ୍କୁଲ ପଡ଼ିଆରେ ବିଜେଡି ପକ୍ଷରୁ ଏକ ବିଶାଳ ନିର୍ବାଚନୀ ସଭା ଆୟୋଜିତ ହୋଇଯାଇଛି । ଏଥିରେ ଲୋକସଭା ପ୍ରାର୍ଥୀ ପ୍ରଣବ ପ୍ରକାଶ ଦାସ ଏବଂ ଦେବଗଡ ବିଧାନସଭା ପ୍ରାର୍ଥିନୀ ଅରୁନ୍ଧତୀ ଦେବୀ ଯୋଗ ଦେଇ ଜନସାଧରଣଙ୍କୁ ଉଦବୋଧନ ଦେଇଛନ୍ତି ।
ପ୍ରଣବ ସଭା ସମ୍ବୋଧିତ କରି ଦେବଗଡ଼ ଜିଲ୍ଲା ଗଠନରେ ସ୍ବର୍ଗତ ବିଜୁବାବୁଙ୍କ ଅବଦାନ କଥା କହିଛନ୍ତି । ସେ କହିଛନ୍ତି, ''ଦେବଗଡ଼ ଜିଲ୍ଲା ଅବିଭକ୍ତ ସମ୍ବଲପୁର ଜିଲ୍ଲାର ଗୋଟିଏ ଉପଖଣ୍ଡ ଏବଂ ଗୋଟିଏ ମାତ୍ର ବିଧାନସଭା ନିର୍ବାଚନ କ୍ଷେତ୍ର ହୋଇଥିବା ବେଳେ ଏହାର ବିକାଶ ଓ ଏହାର ସର୍ବାଙ୍ଗୀନ ଉନ୍ନତି ପାଇଁ ବିଜୁବାବୁ ଏହାକୁ ସ୍ୱତନ୍ତ୍ର ଜିଲ୍ଲାର ମାନ୍ୟତା ଦେଇଥିଲେ । ତାଙ୍କର ପୁଅ ନବୀନ ପଟ୍ଟନାୟକଙ୍କ ମଧ୍ୟ ଏହି ଜିଲ୍ଲା ପ୍ରତି ସ୍ୱତନ୍ତ୍ର ଆକର୍ଷଣ ରହିଛି । ଦେବଗଡ଼ ଜିଲ୍ଲାର ସର୍ବାଙ୍ଗୀନ ଉନ୍ନତି ପାଇଁ ନବୀନ ସରକାର ପ୍ରତିଶ୍ରୁତିବଦ୍ଧ ଏବଂ ସର୍ବଦା ଯତ୍ନଶୀଳ । ଜିଲ୍ଲାର ବିକାଶ ପ୍ରକ୍ରିୟା ଆଗକୁ ନେବାକୁ ସେ ଆମକୁ ତାଙ୍କ ପ୍ରତିନିଧି ଭାବରେ ଚଳିତ ନିର୍ବାଚନରେ ପ୍ରାର୍ଥୀ ଘୋଷଣା କରିଛନ୍ତି । ଦେବଗଡ଼ ଜିଲ୍ଲାରେ ବିଜେଡି ଆସିଲେ ଏଠାରେ ବିକାଶ ଧାରା ପୁଣିଥରେ ଆଗେଇ ଚାଲିବ ଓ ଜିଲ୍ଲାବାସୀଙ୍କ ସ୍ୱପ୍ନ ସାକାର ହେବ ।'' ତେଣୁ ଜନସାଧାରଣ ଚଳିତ ନିର୍ବାଚନରେ ଉଭୟ ବିଧାନସଭା ଓ ଲୋକସଭା ପ୍ରାର୍ଥୀଙ୍କୁ ବହୁମତରେ ବିଜୟୀ କରିବାକୁ ନିବେଦନ କରିଥିଲେ ପ୍ରଣବ।