सैफ अलीवरील हल्ल्यानंतर विरोधकांचा सरकारवर निशाणा, पोलिसांनी तपासाबाबत दिली महत्त्वाची माहिती

अभिनेता सैफ अली खानवर त्याच्या वांद्रेतील घरात चोरट्यानं हल्ला केल्यानंतर विरोधकांकडून कायदा आणि सुव्यवस्थेबाबत प्रश्न उपस्थित करण्यात आले आहेत. जाणून घ्या, विविध राजकीय नेत्यांच्या प्रतिक्रिया

मुंबई- अभिनेता सैफ अली खानवर झालेल्या चाकू हल्ल्यानंतर मुंबईसह बॉलीवुडमध्ये खळबळ उडाली आहे. विरोधी पक्षांचे नेते मुंबईतील सामान्यांसह सेलिब्रिटींच्या सुरक्षेचा प्रश्न उपस्थित करत आहेत. दुसरीकडं भाजपा नेते राम कदम यांनी कोणालाही सोडले जाणार नाही, अशी ग्वाही दिली.

अभिनेता सैफ अली खानवरील चाकू हल्ल्याची सखोल चौकशी करण्याची ऑल इंडियन सिने वर्कर्स असोसिएशननं (AICWA) मागणी केली आहे. संघटनेचे अध्यक्ष सुरेश श्यामलाल गुप्ता म्हणाले, "बॉलिवूड अभिनेता सैफ अली खान यांच्या घरी दरोड्याच्या प्रयत्नानंतर त्यांच्यावर धक्कादायक पद्धतीनं हल्ला झाला. त्यामुळे इंडस्ट्रीमध्ये भीतीचं वातावरण निर्माण झालं आहे. बाबा सिद्दीकींच्या हत्येनंतर ही घटना घडली आहे. त्यामुळे मुंबईत उच्चपदस्थ व्यक्तींना लक्ष्य करून होणाऱ्या वाढणाऱ्या गुन्ह्यांबाबत चिंता निर्माण झाली आहे".

देवेंद्र फडणवीस यांनी दखल घ्यावी-सैफ अलीवरील हल्ल्याबाबत शिवसेनेचे (यूबीटी) नेते आनंद दुबे म्हणाले, " या देशात सेलिब्रिटी आणि व्हीआयपी सुरक्षित नसतील, तर सामान्य लोकांचे काय होणार आहे? यापूर्वी सलमान खानच्या निवासस्थानाबाहेर गोळीबार झाला होता. त्यानंतर बाबा सिद्दीकींची हत्या झाली. आता सैफ अली खानवर चाकूनं वार करण्यात आलेत. ही दुर्दैवी घटना आहे. मुंबईत कायदा-सुव्यवस्था आहे की नाही? गृहमंत्री देवेंद्र फडणवीस यांनी या प्रकरणाची दखल घ्यावी."

कायद्याचा कमी झाला धाक-राष्ट्रवादी काँग्रेसचे प्रवक्त्या क्लाईड क्रॅस्टो यांनी या हल्ल्यावरून चिंता व्यक्त केली. ते म्हणाले, "अभिनेता सैफ अली खानवरील हल्ला हा चिंतेचा विषय आहे. जर त्याच्यासारख्या सेलेब्रिटी आणि कडक सुरक्षा असलेल्या लोकांवर त्यांच्याच घरात हल्ला होऊ शकतो, तर सामान्य नागरिकांनादेखील काळजी करावी लागेल. गेल्या २-३ वर्षांत महाराष्ट्रात कायद्याचा आणि पोलिसांचा धाक कमी झालेला दिसतो. कारण गुन्हे करणाऱ्यांवर उदारता दाखविली जात आहे. या हल्ल्याकडं राज्याच्या गृह विभागानं खूप गांभीर्यानं पाहण्याची गरज आहे. गृह विभागानं मुंबई आणि राज्यातील लोकांच्या सुरक्षिततेची हमी दिली पाहिजे."

कायदा आणि सुव्यवस्थेची परिस्थिती बिघडली-मुंबईत पत्रकार परिषदेत बोलताना शिवसेनेचे (यूबीटी) खासदार, नेते संजय राऊत यांनी पुन्हा एकदा कायदा आणि सुव्यवस्थेवरून महायुती सरकारवर निशाणा साधला. खासदार राऊत म्हमाले, "सैफ अली खान हा पद्मश्रीनं सन्मानित करण्यात आलेला कलाकार आहे. तो आणि त्याचे कुटुंब पंतप्रधान मोदींना भेटले होते. त्याच्यावर चाकू हल्ला होताना पंतप्रधान मोदी मुंबईत होते. हा हल्ला पंंतप्रधानांसाठी धक्का आहे. या राज्यात कायदा आणि सुव्यवस्थेची परिस्थिती बिघडली आहे. मुंबई आणि बीडमध्ये काय घडत आहे? राज्यातील सामान्य जनता सुरक्षित नाही. अशा घटना दररोज घडत आहेत."

• भाजपा नेते राम कदम म्हणाले, "पोलिसांच्या मते, एक माणूस लुटण्याच्या उद्देशानं अभिनेत्याच्या घरात घुसला. त्या माणसाशी झालेल्या झटापटीत अभिनेता सैफ अली खान जखमी झाला. पोलीस या घटनेची चौकशी करत आहेत. या प्रकरणात कोणालाही सोडले जाणार नाही. अशी घटना पुन्हा घडू नये, याची खात्री करण्याची पोलिसांची जबाबदारी आहे."

हल्लेखोर आधीपासूनच होता घरात-"आताच कोणत्याही निष्कर्षावर पोहोचता येणार नाही. यात अजूनही कोणता कट, कोणती योजना किंवा कुठल्या गँगचा सहभाग असल्याचं समोर आलेलं नाही. आजच्या घटनेला आधीच्या दोन घटनांशी जोडणं योग्य होणार नाही. जखमी झालेली एक महिला आधीपासूनच घरात होती. हल्लेखोर आधीपासूनच घरात असल्याचं दिसत आहे. या प्रकरणी तपास सुरू आहे. मुंबई पोलिसांच्या वेगवेगळ्या पथकांतर्फे तपास करण्यात येत आहे. तपास झाल्यानंतरच याबाबत सविस्तर बोलता येईल," अशी माहिती राज्याचे गृहराज्यमंत्री योगेश कदम यांनी दिली.

• राष्ट्रवादी काँग्रेसच्या (एसपी) खासदार सुप्रिया सुळे यांनी ही घटना धक्कादायक असल्याचं म्हटलं. त्यांनी सैफची मेहुणी, अभिनेत्री करिश्मा कपूर यांच्याशी फोनवरून संवाद साधत अभिनेता सैफ आणि त्याची पत्नी, अभिनेत्री करीना कपूर यांच्या तब्येतीची विचारपूस केली.

मुंबईला जाणूनबुजून कमजोर करण्याचा प्रयत्न-शिवसेनेच्या (यूबीटी) खासदार प्रियंका चतुर्वेदी यांनीदेखील राज्य सरकारवर जोरदार टीका केली. त्यांनी एक्स मीडियातील पोस्टमध्ये म्हटले, "जर सेलिब्रिटी सुरक्षित नसतील तर मुंबईत कोण सुरक्षित आहे? या हल्ल्यानं पुन्हा एकदा मुंबई पोलीस आणि गृहमंत्र्यांवर प्रश्नचिन्ह उपस्थित केले आहेत. मुंबईला जाणूनबुजून कमजोर करण्याचा प्रयत्न केला जात आहे. बाबा सिद्दीकी धक्कादायक हत्येनंतर त्यांचं कुटुंब अजूनही न्यायाच्या प्रतीक्षेत आहेत. सलमान खानला बुलेटप्रूफ घरात राहण्यास भाग पाडलं आहे. वांद्रे भागात सेलिब्रिटींची संख्या सर्वाधिक असताना तिथे पुरेशी सुरक्षा असायला हवी."

• राष्ट्रवादी काँग्रेसचे (एसपी) अध्यक्ष शरद पवार म्हणाले, "अभिनेता सैफ अली खानवरील हल्ला हा मुंबईतील कायदा आणि सुव्यवस्था किती बिघडली आहे, दाखवून देणारं लक्षण आहे. बाबा सिद्दीकींची हत्या झालेल्या भागात आज आणखी एका व्यक्तीवर हल्ला झाला. हे सर्व चिंताजनक आहे. राज्य सरकारने, विशेषतः मुख्यमंत्री तथा गृहमंत्री देवेंद्र फडणवीस यांनी प्रकरणाकडे गांभीर्यानं पाहिलं पाहिजे.

राज्यात लोकप्रतिनिधी, हाय प्रोफाईल व्यक्ती, सेलिब्रेटी यापैकी कोणीही सुरक्षित नाही. त्यामुळं राज्यातील सर्वसामान्य व्यक्तींच्या सुरक्षिततेबद्दल बोलायलाच नको. महाराष्ट्रातील सुरक्षा कायदा आणि सुरक्षा व्यवस्थेचे धिंडवडे निघाले आहेत. त्यामुळं राज्याचे मुख्यमंत्री आणि गृहमंत्री देवेंद्र फडणवीस यांनी याबाबत स्वतःला प्रश्न विचारायला हवा. - वर्षा गायकवाड, खासदार

मुंबईत दहशतीचं वातावरण : "पद्मश्री पुरस्कार विजेते अभिनेते सैफ अली खानच्या वांद्रे येथील घरात घुसून त्यांच्यावर चाकू हल्ला केला जातो, ही अत्यंत धक्कादायक घटना आहे. वांद्रे येथे काही दिवसापूर्वी माजी मंत्री बाबा सिद्दिकी यांच्यावर भरस्त्यात गोळीबार करून त्यांची हत्या केली गेली. अभिनेता सलमान खानच्या घरावर गोळीबार करण्यात आला. त्यांना उघडपणे धमक्या दिल्या जात आहेत. या सर्व घटना म्हणजे मुंबईत दहशतीचं वातावरण पसरवण्याचे प्रकार आहेत. त्यामुळं मुख्यमंत्री देवेंद्र फडणवीस यांनी या प्रकारची गंभीर गांभीर्यानं दखल घेत कडक कारवाई करण्याची गरज आहे", अशी प्रतिक्रिया गायकवाड यांनी व्यक्त केली.

पोलिसांचे मानसिक खच्चीकरण : "मुंबई पोलीस हे स्कॉटलंड यार्ड नंतर दुसऱ्या क्रमांकाचं पोलीस समजलं जातं. मात्र, मुंबई पोलिसांचे मानसिक खच्चीकरण केलं जात आहे. त्यांच्या पत्नींवर अभद्र टीका केली जात आहे. पोलीस अधिकारी कर्मचाऱ्यांच्या राज्यात कुठेही बदल्या केल्या जातील,अशी धमकी दिली जाते. त्यामुळं त्यांचं मानसिक खचकरण होत आहे. परभणी प्रकरण, बीड प्रकरण, जे जे रुग्णालयाबाहेरील गोळीबार प्रकरण, अशा विविध घटनांमुळं दहशतीचं प्रमाण वाढू लागलं आहे. मुंबई पोलिसांना आणि गृहमंत्र्यांना याचं उत्तर द्यावं लागेल. अभिनेता सैफ अली खानकडं पोलीस संरक्षण आहे. तसेच त्यांची खाजगी सुरक्षा यंत्रणा देखील आहे. असं असतानाही सुरक्षित सोसायटीमध्ये त्यांच्या थेट घरात घुसून चाकू हल्ला होतो हे अत्यंत गंभीर प्रकरण आहे. मुंबईतील कायदा आणि सुव्यवस्था बदल आम्हाला जो विश्वास होता तो विश्वास या प्रकरणामुळं तुटू लागला आहे" असं गायकवाड म्हणाल्या.

पोलीस तपासात काय आलं समोर?

• सैफ अली खानवर हल्ल्यामागे नेमकं कारण काय आहे, याचा मुंबई पोलिसांकडून तपास सुरू आहे. मुंबई गुन्हे शाखेचे अधिकारी दया नायक आणि पोलीस उपायुक्त विशाल ठाकूर यांनी अभिनेता सैफ अली खानच्या वांद्रे येथील 'सतगुरु शरण' अपार्टमेंटमधून जाऊन तपास केला. पोलिसांकडून घरातील नोकरांची चौकशीदेखील सुरू आहे.
• "सैफ अली खानवरील हल्ल्यातील संशयितांचे डिटेल्स पोलिसांच्या हाती आले आहेत. एक आरोपी जिन्यावरून दिसला आहे. त्याचा शोध सुरू आहे. आरोपी चोरीच्या प्रयत्नात सैफच्या घरी शिरला असल्याचे प्राथमिक तपासात माहिती समोर आले आहे, अशी माहिती पोलीस उपायुक्त गेडाम यांनी माध्यमांशी बोलताना दिली.

हेही वाचा-