शिवसेनेचं बैठकीनंतर ठरलं! महायुतीसोबतच लढणार मुंबई महापालिका निवडणुका

शिवसेना पुढील वर्षी होणाऱ्या बृहन्मुंबई महानगरपालिका (बीएमसी) निवडणुका महायुतीसह लढणार आहे, असे उपमुख्यमंत्री एकनाथ शिंदे यांनी गुरुवारी उशिरा रात्री सांगितले. ते मुंबईत माध्यमांशी बोलत होते.

मुंबई- विधानसभा निवडणुकीतील यशानंतर महायुतीनं आगामी बृहन्मुंबई महानगरपालिका निवडणुकीवर (BMC Election) लक्ष्य केंद्रित केलं आहे. या पार्श्वभूमीवर आणि गेल्या अडीच वर्षात महायुती सरकारनं केलेल्या कामांबाबत चर्चा करण्यासाठी उपमुख्यमंत्री एकनाथ शिंदे यांनी पक्षाच्या नेत्यांची गुरुवारी बैठक घेतली. रात्री उशिरा पक्षाचे नेते दीपक केसरकर यांच्या निवासस्थानी झालेल्या बैठकीला शिवसेनेचे आजी-माजी खासदार, आमदार आणि माजी नगरसेवक उपस्थित राहीले.

बैठकीनंतर माध्यमांशी बोलताना उपमुख्यमंत्री शिंदे म्हणाले, "आम्हाला सर्व मुंबईकरांचे स्वप्न असलेली मुंबई विकसित करायची आहे. ही अत्यंत महत्त्वाची बैठक मुंबई महापालिका निवडणुकीबाबत होती. आमच्या सरकारनं गेल्या अडीच वर्षात केलेल्या सर्व कामांचा थेट फायदा राज्यातील जनतेला होणार आहे. या निवडणुकांसाठी महायुतीनं पूर्ण तयारी केली आहे. तमाम मुंबईकरांचे स्वप्न असलेली मुंबई आम्ही घडविणार आहोत. मुंबईकरांसाठी आम्ही कोस्टल रोडचे काम केले. 'हिंदूह्रदयसम्राट बाळासाहेब ठाकरे आपला दवाखाना' सुरू केला. यासह आणखी अनेक प्रकल्प आहेत. हे सर्व महानगरपालिकेचे प्रकल्प आहेत. याचा थेट मुंबईकरांना फायदा होत आहे".

स्थानिक स्वराज्य संस्था निवडणुका प्रलंबित-स्थानिक स्वराज्य संस्थांच्या शेवटच्या निवडणुका 2017 मध्ये झाल्या होत्या. त्या निवडणुका 2023 मध्ये होणे अपेक्षित होते. परंतु कोविड-19 महामारीच्या काळात या निवडणुका घेणं शक्य झालं नाही. सध्या राज्य सरकारनं भूषण गगराणी यांची महापालिका आयुक्तपदी नियुक्ती केली आहे. महापालिकेत महापौर, उपमहापौर, पदाधिकारी नसल्यानं आयुक्त प्रशासक म्हणून कामकाज पाहत आहेत. सध्या पालिकेत एकूण 227 प्रभाग आहेत. यात महाविकास आघाडी सरकारच्या काळात दहा प्रभागांची वाढ करण्यात आली होती. सध्या हे प्रकरण सर्वोच्च न्यायालयात प्रलंबित आहे. यावर निर्णय झाल्यानंतरच महानगरपालिकेच्या निवडणुका होतील, असा अंदाज व्यक्त करण्यात येत आहे. मागील वीस वर्षांपासून अधिक काळ बृहन्मुंबई महानगरपालिकेवर शिवसेनेची (यूबीटी) सत्ता आहे. निवडणूक आयोग जानेवारी अखेर किंवा फेब्रुवारी महिन्यात मुंबई महापालिका निवडणुकांची तारखा जाहीर करेल, अशी शक्यता व्यक्त करण्यात येत आहे. त्यापूर्वी महायुतीकडून मोर्चे बांधणी करण्यास सुरुवात झाली आहे.

हेही वाचा-