ऑस्ट्रेलियाकडून दोन तासांत दुसऱ्यांदा भारताचा पराभव

ब्रिस्बेनमध्ये खेळल्या गेलेल्या भारत आणि ऑस्ट्रेलिया महिला संघ यांच्यातील दुसऱ्या वनडे सामन्यात भारतीय संघाची अत्यंत लाजिरवाणी कामगिरी पाहायला मिळाली.

ब्रिस्बेन AUSW Beat INDW by 122 Runs : रविवार, 8 डिसेंबर हा दिवस भारतीय क्रिकेट चाहत्यांसाठी चांगला ठरला नाही आणि याचं कारण ऑस्ट्रेलियानं भारतीय संघांना 2 तासांच्या आत दोनदा पराभूत केलं. एकीकडे ॲडलेडमध्ये खेळल्या गेलेल्या दिवस-रात्र कसोटी सामन्याच्या तिसऱ्या दिवशी ऑस्ट्रेलियानं भारतीय संघाचा 10 धावांनी पराभव केला, तर अवघ्या 2 तासांनंतर ऑस्ट्रेलियन महिला संघानं दुसऱ्या वनडे सामन्यात भारतीय महिला क्रिकेट संघाचा वाईट पद्धतीनं पराभव केला. ॲडलेडपासून सुमारे 2000 किलोमीटर दूर खेळल्या गेलेल्या या सामन्यात एलिस पेरी आणि जॉर्जिया वॉल यांच्या शानदार शतकांच्या जोरावर ऑस्ट्रेलियानं 371 धावा केल्या आणि त्यानंतर भारताचा 122 धावांच्या मोठ्या फरकानं पराभव केला.

भारताचा पराभव : भारत आणि ऑस्ट्रेलिया महिला क्रिकेट संघ यांच्यातील वनडे मालिकेतील दुसरा सामना रविवारी सकाळी ब्रिस्बेनमधील ॲलन बॉर्डर मैदानावर खेळला गेला. यजमान ऑस्ट्रेलियानं याआधीच विजयानं मालिकेची सुरुवात केली होती. भारतीय संघ दुसऱ्या सामन्यात पुनरागमन करेल अशी अपेक्षा होती पण त्यांच्यावर घरच्या मैदानावर मात करणं अजिबात सोपं नाही हे वर्ल्ड चॅम्पियन संघानं दाखवून दिलं. नियमित कर्णधार ॲलिसा हिलीशिवाय या मालिकेत खेळणाऱ्या ऑस्ट्रेलियन संघानं आपल्या स्फोटक फलंदाजीनं भारतीय संघाचा पराभव केला.

कांगारुंची आक्रमक सुरुवात : ऑस्ट्रेलियासाठी, फोबी लिचफिल्ड आणि जॉर्जिया वॉल या युवा सलामी जोडीनं जबरदस्त सुरुवात केली आणि अवघ्या 19 षटकांत 130 धावा जोडल्या. लिचफिल्ड 60 धावा करुन बाद झाली, परंतु वॉल, केवळ दुसरा वनडे सामना खेळत असताना, शानदार शतक झळकावल्यानंतर ती आउट झाली. या 21 वर्षीय फलंदाजानं केवळ 87 चेंडूत 12 चौकारांसह 101 धावांची खेळी केली. बाद होण्यापूर्वी वॉलनं अनुभवी अष्टपैलू एलिस पेरीसोबत दुसऱ्या विकेटसाठी 92 धावांची जलद भागीदारी केली. लिचफिल्ड आणि वॉलला वेगवान गोलंदाज सायमा ठाकोरनं बाद केलं.

पेरीचं वादळी शतक : दुसरीकडे पेरीनं भारतीय गोलंदाजांची चांगलीच फटकेबाजी केली. या महान फलंदाजानं अवघ्या 72 चेंडूत आपलं शतक पूर्ण केलं आणि 75 चेंडूत 7 चौकार आणि 6 षटकारांसह 105 धावा केल्या. तिच्याशिवाय अनुभवी यष्टीरक्षक फलंदाज बेथ मुनीनंही 56 धावा करत संघाला 371 धावांपर्यंत पोहोचवलं. भारताकडून सायमानं 3 तर फिरकीपटू मिन्नू मणीनं 2 बळी घेतले.

हरमनप्रीत आणि स्मृती मानधना फ्लॉप : या सामन्यात भारतीय महिला संघ 372 धावांचा पाठलाग करण्यासाठी मैदानात उतरला तेव्हा त्याची सुरुवात खूपच खराब झाली. स्मृती मानधना आणि हरलीन देओल या दोघी 45 धावा करुन पॅव्हेलियनमध्ये परतल्या. मानधनाच्या बॅटमधून फक्त 9 धावा दिसत असताना, हरलीन 12 धावा करुन बाद झाली. यानंतर कर्णधार हरमनप्रीत कौर केवळ 38 धावाच करु शकली. रिचा घोषनं 54 धावांची खेळी केली तर मीनू मणीनं 46 धावा केल्या. ऑस्ट्रेलियाकडून ॲनाबेल सदरलँडनं गोलंदाजीत सर्वाधिक 4 बळी घेतले.

हेही वाचा :