भारताचा डी गुकेश बनला बुद्धिबळाचा जगज्जेता; गुगलनं बनवलं अप्रतिम डूडल

आजचं गुगल डूडल हे बुद्धिबळ आणि गुकेश सारख्या खेळाडूंच्या अतुलनीय कामगिरीचा आनंद साजरा करण्याचा एक मजेदार आणि सर्जनशील मार्ग आहे.

सिंगापूर Google Doodle Chess Celebration : गुगलनं 25 नोव्हेंबर ते 13 डिसेंबर या कालावधीत सिंगापूर इथं आयोजित 2024 FIDE वर्ल्ड चेस चॅम्पियनशिपचा अंतिम दिवस साजरा केला. या चॅम्पियनशिपमध्ये चीनचा डिंग लिरेन आणि युवा भारतीय खेळाडू गुकेश यांच्यात रोमांचक लढत पाहायला मिळाली.

काय आहे डूडलचा अर्थ :गुगलनं या प्रसंगी चिन्हांकित करण्यासाठी पिवळ्या, लाल, निळ्या आणि पांढऱ्या रंगाच्या बुद्धिबळाच्या सोंगट्यांचं अनोखं ॲनिमेशन तयार केलं आहे. जेव्हा वापरकर्ते या डूडलवर क्लिक करतात तेव्हा त्यांना "सेलिब्रेटिंग चेस" आणि बुद्धीबळ बद्दलचं वर्णन सांगणाऱ्या एका विशेष पृष्ठावर नेलं जातं. "हे डूडल बुद्धिबळ साजरे करतं, ज्यामध्ये 64 कृष्णधवल आणि चौरसांवर खेळला जाणारा दोन-खेळाडूंचा रणनीतिक खेळ आहे."

जागतिक बुद्धिबळ स्पर्धा कशी होती : स्पर्धेत 14 तीव्र शास्त्रीय खेळांचा समावेश होता, प्रत्येक चार तासांपेक्षा जास्त काळ टिकला होता. प्रतिष्ठित विजेतेपद जिंकण्यासाठी खेळाडूंनी 7.5 गुण मिळवण्यासाठी स्पर्धा केली. भारतीय युवा गुकेश डोम्माराजूनं जगातील सर्वात तरुण जागतिक बुद्धिबळ चॅम्पियन बनून इतिहास रचला. त्यानं गुरुवारी खेळल्या गेलेल्या रोमहर्षक लढतीत विद्यमान चॅम्पियन चीनच्या डिंग लिरेनचा पराभव केला.

बुद्धिबळ खेळ प्रेरणादायी :आजचं गुगल डूडल हे बुद्धिबळ आणि गुकेश सारख्या खेळाडूंच्या अतुलनीय कामगिरीचा आनंद साजरा करण्याचा एक मजेदार आणि सर्जनशील मार्ग आहे. बुद्धिबळ हा खेळ जगभरातील लोकांना कशा प्रकारे प्रेरणा देत आहे आणि जोडत आहे हे दाखवते.

चुरशीची लढत : सिंगापूरमध्ये गेल्या अनेक दिवसांपासून सुरू असलेल्या जागतिक अजिंक्यपद स्पर्धेत चीनचा डिंग आणि भारताचा गुकेश यांच्यात चुरशीची लढत होती. डिंगनं गेल्या वर्षी ही स्पर्धा जिंकली होती. अशा परिस्थितीत त्यानं गतविजेता म्हणून या स्पर्धेत प्रवेश केला होता. तर गुकेशनं या वर्षाच्या सुरुवातीला झालेल्या उमेदवारांची स्पर्धा जिंकून या चॅम्पियनशिपमध्ये चॅलेंजर म्हणून प्रवेश केला होता. विश्व चॅम्पियनशिपमध्ये पोहोचणारा तो विश्वनाथन आनंदनंतरचा दुसरा भारतीय आणि जगातील सर्वात तरुण खेळाडू ठरला.

कसा झाला सामना : भारतीय ग्रँडमास्टर डी गुकेशनं 13 गेमनंतर त्याचा चिनी प्रतिस्पर्धी डिंग लिरेनसोबत 6.5-6.5 अशी बरोबरी साधली. 14व्या गेममध्ये डिंग लिरेन पांढऱ्या मोहऱ्यांसह खेळत होता. अशा स्थितीत त्यांचा वरचष्मा मानला जात होता. पण डी गुकेशनं सर्व अंदाज धुडकावून लावत सामना जिंकलाच शिवाय सर्वात तरुण विश्वविजेता बनण्याचा पराक्रमही केला.

हेही वाचा :