തിരുവനന്തപുരം: ക്രമസമാധാന ചുമതയിലിരിക്കെ എഡിജിപി എംആര്‍ അജിത്കുമാര്‍ ആര്എസ്എസ് നേതാക്കളെ കണ്ടതിൻ്റെ കാരണം വ്യക്തമല്ലെന്ന് സംസ്ഥാന പൊലീസ് മേധാവി ഷേക്ക് ദര്വേഷ് സാഹിബിൻ്റെ നേതൃത്വത്തിലുള്ള അന്വേഷണ സംഘത്തിൻ്റെ റിപ്പോര്‍ട്ട്. സന്ദര്‍ശനം ഇരുവരും തമ്മില്‍ അടച്ചിട്ട മുറിക്കുള്ളില്‍ വച്ചായതിനാല്‍ സന്ദര്‍ശനോദ്ദേശ്യം നിര്‍ണയിക്കുക സാധ്യമില്ലെന്ന് റിപ്പോര്‍ട്ട് വ്യക്തമാക്കുന്നു.
അതേസമയം ആര്എസ്എസ് ദേശീയ നേതാക്കളായ ദത്താത്രേയ ഹൊസബാലെയേയും റാം മാധാവിനെയും കണ്ട കാര്യം അജിത്കുമാര്‍ അന്വേഷണ സംഘത്തോട് സ്ഥിരീകരിച്ചതായി റിപ്പോര്‍ട്ടിലുണ്ട്. അന്വേഷണ റിപ്പോര്‍ട്ട് മുഖ്യമന്ത്രി പിണറായി വിജയന്‍ ഇന്ന് (ഒക്‌ടേബർ 15) നിയമസഭയുടെ മേശപ്പുറത്ത് വച്ചു.
സംസ്ഥാനത്തെത്തുന്ന എല്ലാ ദേശീയ നേതാക്കളെയും താന്‍ സന്ദര്‍ശിക്കാറുണ്ടെന്നും അത്തരത്തില്‍ സൗഹൃദ സന്ദര്‍ശനമാണ് ദത്താത്രേയ ഹൊസബാലേയുമായും റാംമാധവുമായും നടത്തിയതെന്നുമാണ് അജിത്കുമാര്‍ അന്വേഷണ സംഘത്തിന് നല്‍കിയ മൊഴി. ഇക്കാര്യവും റിപ്പോര്‍ട്ടില്‍ പറയുന്നു. എന്നാല്‍ ഇത് ഒരു സൗഹൃദ സന്ദര്‍ശനമാണെന്ന് ഉറപ്പിക്കുന്ന തെളിവുകളില്ലെന്നും ഉദ്ദേശ്യം വ്യക്തമല്ലെന്നും റിപ്പോര്‍ട്ട് പറയുന്നു.
അന്വേഷണ റിപ്പോര്‍ട്ടിൻ്റെ കണ്ടെത്തലുകള്‍:
2023 ഏപ്രിലില്‍ തൃശൂര്‍ പാറമേക്കാവ് വിദ്യാമന്ദിര്‍ സ്‌കൂളില്‍ നടന്ന ആര്എസ്എസ് ക്യാമ്പില്‍ വച്ച് സ്വകാര്യമായണ് അജിത്കുമാര്‍ സന്ദര്‍ശനം നടത്തിയതെന്ന് അദ്ദേഹം മൊഴി നല്‍കി. എന്നാല്‍ സന്ദര്‍ശന കാരണം അവ്യക്തമാണ്. സൗഹൃദ സന്ദര്‍ശനമെന്ന് എഡിജിപി നല്‍കിയ മൊഴി യഥാര്‍ത്ഥമാണെന്ന് തീരുമാനിക്കാനാകില്ല. കാരണം അദ്ദേഹം അടച്ചിട്ട മുറിയില്‍ വച്ചാണ് ആര്എസ്എസ് നേതാവുമായി കൂടിക്കാഴ്‌ച നടത്തിയത്.
അടച്ചിട്ട മുറിയില്‍ നടന്ന കൂടിക്കാഴ്‌ചയില്‍ സാക്ഷികളൊന്നുമില്ലാത്തതിനാല്‍ ഇരുവരും തമ്മില്‍ നടത്തിയ ചര്‍ച്ച എന്തെന്ന് വ്യക്തമല്ല. അങ്ങനെയുള്ള ഒരു സന്ദര്‍ശനത്തെ സൗഹൃദ സന്ദര്‍ശനമെന്ന് വിലയിരുത്താനും കഴിയില്ല. പ്രസിഡൻ്റില്‍ നിന്ന് സ്‌തുത്യര്‍ഹ സേവന മെഡല്‍ നേടുന്നതിന് ശുപാര്‍ശ ചെയ്യണമെന്ന അപേക്ഷയുമായും യുപിഎസ്‌സിയുടെ സെലക്‌ട് ലിസ്റ്റില്‍ അദ്ദേഹത്തെ സംസ്ഥാനത്തെ ഡിജിപിയും പൊലീസ് മേധാവിയുമായി ഉള്‍പ്പടുത്തുന്നതിന് കൂടിയായിരുന്നു സന്ദര്‍ശനമെന്ന വാദവും ചിലര്‍ ഉയര്‍ത്തുന്നുണ്ട്.
എന്നാല്‍ അതിനും തെളിവില്ലെന്ന് മാത്രമല്ല, അങ്ങനെ ചെയ്‌തിട്ടുണ്ടെങ്കില്‍ അത് സിവില്‍ സര്‍വ്വീസ് ഉദ്യോഗസ്ഥരുടെ അഖിലേന്ത്യാ സര്‍വ്വീസ് ചട്ടങ്ങള്‍ക്ക് വിരുദ്ധമാണെന്നും റിപ്പോര്‍ട്ട് പറയുന്നു.