ദുബായ്: വനിതാ ടി20 ലോകകപ്പിന് ഒക്‌ടോബര്‍ മൂന്നിന് യുഎഇ ആതിഥേയത്വം വഹിക്കും. ദുബായ്, ഷാര്‍ജ എന്നിവിടങ്ങളിലായാണ് മത്സരങ്ങള്‍ നടക്കുന്നത്. 20നാണ് ഫൈനല്‍ പോരാട്ടം. രാഷ്ട്രീയ അനിശ്ചിതത്വത്തെ തുടര്‍ന്ന് ബംഗ്ലാദേശില്‍ നിന്ന് വേദി യുഎഇയിലേക്ക് മാറ്റുകയായിരുന്നു. ഒന്‍പതാം പതിപ്പാണ് നടക്കാന്‍ പോകുന്നത്. ഇതുവരേ കിരീടം സ്വന്തമാക്കാത്ത ഇന്ത്യ ഇത്തവണ ഏതുവിധേനയും കപ്പ് നേടണമെന്ന ഉറച്ച ലക്ഷ്യത്തിലാണ്.
2020ൽ ഇന്ത്യ ആദ്യമായി ടി20 ലോകകപ്പ് ഫൈനലിലെത്തി. എന്നാൽ അപ്രതീക്ഷിതമായി ഓസ്‌ട്രേലിയയോട് തോറ്റു. ക്രിക്കറ്റിൽ മികവ് പുലർത്തുന്ന ഓസീസ് വനിതാ ടീം ഇതുവരെ ആറ് തവണ ലോക ചാമ്പ്യൻഷിപ്പ് നേടി. ഓൾറൗണ്ട് കഴിവുകളോടെ എന്നത്തേക്കാളും ശക്തമായി ഇന്ത്യൻ ടീമും രംഗത്തിറങ്ങുകയാണ്.
ഇതുവരെ 8 തവണ വനിതാ ടി20 ലോകകപ്പ് നടന്നിട്ടുണ്ട്. 2010, 2012, 2014, 2018, 2020, 2023 എന്നിങ്ങനെ ആറ് തവണ ഓസ്‌ട്രേലിയ വിജയിച്ചു. 2009ൽ ഇംഗ്ലണ്ടും 2016ൽ വെസ്റ്റ് ഇൻഡീസും കിരീടം നേടിയിരുന്നു.