എറണാകുളം: രജനികാന്ത് അതിഥി വേഷത്തിലെത്തുന്ന ചിത്രം 'ലാല്‍ സലാം'ന്‍റെ ട്രെയിലര്‍ പുറത്ത്. ക്രിക്കറ്റ്, രാഷ്ട്രീയം, അധികാരം, വിശ്വാസം തുടങ്ങിയ വികാരങ്ങളിലൂടെ സഞ്ചരിച്ച് ചിത്രത്തിന്‍റെ പ്രമേയം സൂചിപ്പിക്കും വിധമുള്ളതാണ് ട്രെയിലര്‍. മിന്നിമറയുന്ന ഷോട്ടുകളിൽ തീ പാറുന്ന ദൃശ്യങ്ങളോടൊപ്പം വിക്രാന്തിന്‍റെയും വിഷ്‌ണു വിശാലിന്‍റെയും വമ്പൻ പോരാട്ടവും അത് കാണാനുള്ള ഒരു കൂട്ടം ജനങ്ങളെയും കാണാം. അതിനിടെ അപ്രതീക്ഷിതമായി സൂപ്പര്‍ താരം രജനീകാന്തിന്‍റെ മാസ് എന്‍ടിയുമാണ് ട്രെയിലറിലുള്ളത് (New Movie Lal Salaam).
ഫെബ്രുവരി 9ന് തിയേറ്റർ റിലീസ് ചെയ്യുന്ന ഈ ചിത്രം ശ്രീ ഗോകുലം മൂവീസിന്‍റെ ബാനറിൽ ശ്രീ ഗോകുലം ഗോപാലനാണ് കേരളത്തിൽ വിതരണത്തിനെത്തിക്കുന്നത്. ഡ്രീം ബിഗ് ഫിലിംസാണ് ഡിസ്ട്രിബ്യൂഷൻ പാർട്‌ണര്‍. ലൈക്ക പ്രൊഡക്ഷൻസിന്‍റെ ബാനറിൽ ഐശ്വര്യ രജനികാന്ത് സംവിധാനം ചെയ്‌ത ചിത്രത്തിന്‍റെ നിര്‍മാതാവ് സുബാസ്‌കരനാണ്.
തമിഴ്, തെലുഗ്, കന്നഡ, മലയാളം, ഹിന്ദി എന്നീ 5 ഭാഷകളിലായ് പ്രദർശനത്തിനെത്തുന്ന ചിത്രത്തിന് ഓസ്‌കാർ അവാർഡ് ജേതാവ് എ ആർ റഹ്മാനാണ് സംഗീതം പകരുന്നുണ്ട്. വിഷ്‌ണു രംഗസ്വാമി കഥയും സംഭാഷണങ്ങളും ഒരുക്കിയ ചിത്രത്തിൽ 'മൊയ്‌തീൻ ഭായ്' എന്ന കഥാപാത്രത്തെയാണ് രജനികാന്ത് അവതരിപ്പിക്കുന്നത്. വിഷ്‌ണു വിശാലും വിക്രാന്തുമാണ് ചിത്രത്തിലെ നായകന്മാർ. ചിത്രത്തിന്‍റെ പ്രമേയം ക്രിക്കറ്റാണെങ്കിലും അതിലുപരി മറ്റ് ചില വിഷയങ്ങൾകൂടി സംസാരിക്കുന്ന സിനിമയാണിത് ( Rajanikanth New Movie).