ന്യൂഡൽഹി : ഫണ്ട് തിരിമറി ആരോപിച്ച് ഓഹരി വിപണിയില്‍ നിന്ന് വിലക്കും പിഴയും ഏര്‍പ്പെടുത്തിയ സെബിയുടെ ഉത്തരവ് അനിൽ അംബാനി അവലോകനം ചെയ്യുകയാണെന്നും നിയമോപദേശം അനുസരിച്ച് ഉചിതമായ നടപടികൾ സ്വീകരിക്കുമെന്നും അദ്ദേഹത്തിന്‍റെ വക്താവ് അറിയിച്ചു. റിലയൻസ് ഹോം ഫിനാൻസ് ലിമിറ്റഡുമായി ബന്ധപ്പെട്ട വിഷയത്തിൽ 2022 ഫെബ്രുവരി 11ന് സെബി പുറപ്പെടുവിച്ച ഇടക്കാല ഉത്തരവനുസരിച്ച് റിലയൻസ് ഇൻഫ്രാസ്ട്രക്‌ചർ ലിമിറ്റഡിന്‍റെയും റിലയൻസ് പവർ ലിമിറ്റഡിന്‍റെയും ബോർഡിൽ നിന്ന് അനില്‍ അംബാനി രാജിവച്ചിരുന്നതായും വക്താവ് പ്രസ്‌താവനയിൽ അറിയിച്ചു. കഴിഞ്ഞ രണ്ടര വർഷമായി ഇടക്കാല ഉത്തരവ് അനില്‍ അംബാനി പാലിക്കുന്നുണ്ടെന്നും പ്രസ്‌താവനയിൽ പറയുന്നു.
ഫണ്ട് തിരിമറി നടത്തിയെന്നാരോപിച്ച് അനില്‍ അംബാനിയേയും കമ്പനിയിലെ മറ്റ് 24 പേരെയും കഴിഞ്ഞ 22-ന് ആണ് ഓഹരി വിപണിയില്‍ നിന്ന് അഞ്ച് വർഷത്തേക്ക് സെബി വിലക്കിയത്. അനില്‍ അംബാനി ചെയർമാനായ റിലയൻസ് ഗ്രൂപ്പിന്‍റെ ലിസ്റ്റഡ് സബ്‌സിഡിയറിയായ റിലയൻസ് ഹോം ഫിനാൻസിൽ നിന്ന് പണം തട്ടിയെടുക്കാന്‍ പദ്ധതി ആസൂത്രണം ചെയ്‌തെന്നാണ് സെബിയുടെ കണ്ടെത്തല്‍. വിലക്കിന് പുറമേ അംബാനിക്ക് 25 കോടി രൂപ പിഴയും സെബി ചുമത്തിയിരുന്നു.