മുംബൈ (മഹാരാഷ്ട്ര): ബിജെപിയുടെ നേതൃത്വത്തിലുള്ള മഹാരാഷ്ട്ര മഹായുതി സർക്കാരിലെ മന്ത്രിമാർക്കുള്ള ചുമതലകൾ പ്രഖ്യാപിച്ചു. മുഖ്യമന്ത്രി ദേവേന്ദ്ര ഫഡ്‌നാവിസിന് ആഭ്യന്തരം, നിയമം, നിയമനിർമാണം എന്നീ വകുപ്പും ഉപമുഖ്യമന്ത്രി ഏകനാഥ് ഷിൻഡെയ്ക്ക് നഗര വികസനം, പാർപ്പിടം, പൊതു പ്രവർത്തനം എന്നിവയ്ക്കുള്ള ചുമതലയാണ് നൽകിയത്. എൻസിപി നേതാവും ഉപമുഖ്യമന്ത്രിയുമായ അജിത് പവാറിന് ധനകാര്യം, ആസൂത്രണം, എക്സൈസ് എന്നീ വകുപ്പുകളാണ് നൽകിയത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
നിയമസഭാ തെരഞ്ഞെടുപ്പ് ഫലം വന്നതിന് ഏകദേശം ഒരു മാസത്തിന് ശേഷമാണ് ഓരോരുത്തർക്കും ചുമതലകൾ പ്രഖ്യാപിച്ചത്. ഊർജം (റിന്യൂവബിൾ എനർജി ഒഴികെ), ജനറൽ അഡ്‌മിനിസ്‌ട്രേഷൻ, ഇൻഫർമേഷൻ ആൻഡ് പബ്ലിസിറ്റി, വകുപ്പുകൾ എന്നിവ ഫഡ്‌നാവിസ് നിലനിർത്തി. പങ്കജ മുണ്ടെക്ക് പരിസ്ഥിതി, കാലാവസ്ഥാ വ്യതിയാനം, മൃഗസംരക്ഷണം എന്നിവ നൽകി. മഹാരാഷ്‌ട്രയിൽ മുഖ്യമന്ത്രിയും ആറ് സഹമന്ത്രിമാരുമുൾപ്പെടെ 36 ക്യാബിനറ്റ് മന്ത്രിമാരാണുള്ളത്.
മറ്റ് നേതാക്കളിൽ, ചന്ദ്രശേഖർ പ്രഭാവതി കൃഷ്‌ണറാവു ബവൻകുലെ - റവന്യു, ഹസൻ സക്കീന മിയാലാൽ മുഷ്‌രിഫ് - മെഡിക്കൽ വിദ്യാഭ്യാസം, ചന്ദ്രകാന്ത് സരസ്വതി ബച്ചു പട്ടീൽ - ഉന്നത, സാങ്കേതിക വിദ്യാഭ്യാസം, പാർലമെൻ്ററികാര്യം എന്നിവ അനുവദിച്ചു.
ഗിരീഷ് ഗീത ദത്താത്രയ മഹാജൻ - ജലവിഭവം (വിധർഭ, താപി, കൊങ്കൺ വികസന കോർപ്പറേഷൻ), ദുരന്തനിവാരണ വകുപ്പ് എന്നിവ നൽകി. ദാദാജി രേഷ്‌മാഭായി ദഗദുജി ഭൂസെ - സ്‌കൂൾ വിദ്യാഭ്യാസ മേഖല, അദിതി വരദ സുനിൽ തത്‌കരെയ്ക്ക് വനിതാ - ശിശു വികസനം, മണിക്‌ റാവു സരസ്വതി ശിവാജി കൊക്കാട്ടെക്ക് കൃഷി വകുപ്പും അനുവദിച്ചു.