അയോധ്യ : പ്രതിഷ്‌ഠാ ചടങ്ങുകള്‍ പൂര്‍ത്തിയായ അയോധ്യ രാമക്ഷേത്രത്തില്‍ ഭക്തരുടെ വന്‍ തിരക്ക്(Pran Pratishtha). പുലര്‍ച്ചെ മൂന്ന് മണി മുതല്‍ തന്നെ ക്ഷേത്രത്തിന്‍റെ പ്രധാന കവാടത്തില്‍ ഭക്തരുടെ നീണ്ട നിര പ്രത്യക്ഷപ്പെട്ടു. പ്രതിഷ്‌ഠ കഴിഞ്ഞുള്ള ആദ്യ പ്രഭാതത്തില്‍ തന്നെ രാംലല്ല ദര്‍ശനം നടത്താന്‍ രാജ്യത്തിന്‍റെ വിവിധ ഭാഗങ്ങളില്‍ നിന്നുള്ള ഭക്തരാണ് ക്ഷേത്രനഗരിയില്‍ എത്തിച്ചേര്‍ന്നിരിക്കുന്നത്.
ഇന്ന് മുതലാണ് പൊതുജനങ്ങള്‍ക്ക് ക്ഷേത്രത്തില്‍ ദര്‍ശനം നടത്താന്‍ അനുമതിയുള്ളത് (Ayodhya Temple).വലിയ ആഘോഷമായാണ് കഴിഞ്ഞ ദിവസം ക്ഷേത്രത്തില്‍ പ്രതിഷ്‌ഠാ ചടങ്ങുകള്‍ നടന്നത്. പ്രധാനമന്ത്രി നരേന്ദ്രമോദിയുടെ നേതൃത്വത്തിലായിരുന്നു പൂജാരിമാര്‍ ചടങ്ങുകള്‍ നിര്‍വഹിച്ചത്. രാമക്ഷേത്രാ പ്രതിഷ്‌ഠയോട് അനുബന്ധിച്ച് രാജ്യമെങ്ങും ആഘോഷങ്ങള്‍ സംഘടിപ്പിച്ചിരുന്നു.
അയോധ്യയിലും വലിയ ആഘോഷങ്ങളാണ് നടന്നത്. വീഥികളും വീടുകളും എല്ലാം മണ്‍ചെരാതുകളാല്‍ ദീപാലംകൃതമായി. രാത്രി മുഴുവന്‍ പടക്കം പൊട്ടിച്ചും ആഘോഷങ്ങള്‍ക്ക് ഭക്തര്‍ മാറ്റുകൂട്ടി. സരയൂ നദിയെയും ദീപാലംകൃതമാക്കി ഭക്തര്‍ രാം ലല്ലയോടുള്ള തങ്ങളുടെ ആദരവ് പ്രകടിപ്പിച്ചു.
തിങ്കളാഴ്ച ഉച്ചയ്ക്ക് പന്ത്രണ്ടരയ്ക്കായിരുന്നു പ്രാണപ്രതിഷ്‌ഠാ ചടങ്ങുകള്‍. യജ്ഞത്തിന്‍റെ മുഖ്യ യജമാനന്‍ പ്രധാനമന്ത്രി നരേന്ദ്രമോദിയായിരുന്നു. ഏഴ് ദിവസം നീണ്ട പൂജകള്‍ക്കും ചടങ്ങുകള്‍ക്കും ശേഷമാണ് ഇന്നലെ ഉച്ചയോടെ പ്രാണപ്രതിഷ്‌ഠ നടന്നത്. രാജ്യമെമ്പാടുമുള്ള വിവിധ മതവിഭാഗങ്ങളില്‍ സന്യാസിശ്രേഷ്‌ഠരും നേതാക്കളും ചടങ്ങിന്‍റെ ഭാഗമായി.