पंढरपूर -‘मानव सेवा हीच ईश्वर सेवा आहे’, साजेसे कार्य स्वेरीच्या माध्यमातून घडत आलेले आहे. स्वेरी आणि रोंगे कुटुंबीय म्हणजे एक वेगळेपण, आपुलकी, तळमळ आणि विनम्रता यांचा मिलाप आहे. आणि हेच गुण स्वेरी परिवारातील प्रत्येक सदस्यात रुजलेले आहेत. त्यामुळे, भविष्यकाळात स्वेरीकडून केली जाणारी आरोग्याची अथवा शिक्षणाची सेवा ही अल्पावधीत लोकाभिमुख ठरेल. डॉ. रोंगे सरांनी सामाजिक जाणीवेतून हे आधुनिक पद्धतीचे कोविड केअर सेंटर उभे केले आहे. भविष्यात हा आजार कमी होवून पुन्हा या ठिकाणी विद्यार्थी येतील आणि सर्व काही सुरळीत सुरू होईल, असे प्रतिपादन माढा लोकसभा मतदारसंघाचे खासदार रणजितसिंह नाईक-निंबाळकर यांनी केले.
हेही वाचा -आदर्श समुहाकडून ग्रामीण रुग्णालयाला 21ऑक्सिजन सिलेंडर
गोपाळपूर (ता. पंढरपूर) येथील श्री विठ्ठल एज्युकेशन अँड रिसर्च इन्स्टिट्यूट (स्वेरी) कॅम्पसमधील मुलांचे वसतिगृह ‘स्वेरी डेडिकेटेड कोविड हेल्थ केअर सेंटर’चे माढा लोकसभा मतदारसंघाचे खासदार रणजितसिंह नाईक-निंबाळकर यांच्या हस्ते उद्घाटन करण्यात आले. याप्रसंगी उपस्थितांना ते मार्गदर्शन करत होते. यावेळी कार्यक्रमाच्या अध्यक्षस्थानी भाजपचे सोलापूर जिल्हाध्यक्ष श्रीकांत देशमुख होते.
स्वेरी डेडिकेटेड कोविड हेल्थ केअर सेंटर
कोविड रुग्णांची दररोजची वाढती संख्या पाहता उपचारासाठी रुग्णांची हेळसांड होऊ नये व कमी लक्षणे असलेल्या रुग्णांना उपचार मिळण्याची सोय व्हावी या हेतूने सर्व सोयींनी युक्त अशा ‘स्वेरी डेडिकेटेड कोविड हेल्थ केअर सेंटर’ची रचना केलेली असून यामध्ये ऑक्सिजनचे १५ बेड व साधे २०० बेड, असे मिळून एकूण २१५ बेडची सोय या सेंटरमध्ये करण्यात आली. या सेंटरचा फायदा पंढरपूर तालुक्यातील रुग्णांसह आसपासच्या तालुक्यातील रुग्णांनाही होणार आहे.