सोलापूर - शेतकरी कुटुंबात जन्माला आलेल्या कृषी कन्येला आपल्या बापाचं दु:ख पहावले नाही. त्याच दुःखाच्या वेदनेने बचत गटाच्या माध्यमातून देशातल्या पहिल्या महिला ऍग्रो प्रोड्युसर फार्मर कंपनीला जन्म दिला. आज त्या कंपनीचा आवाका एवढा वाढला की सर्वच घटकातील महिलांच्या हजारो हातांना बळ देण्याचे काम उभे राहिले. ती कृषी कन्या आहे, सोलापूर जिल्ह्यातील बोरामणीच्या अनिता माळगे. यशस्विनी ऍग्रो प्रोड्युसर फार्मर कंपनीच्या अध्यक्षा. देशाचे पंतप्रधान नरेंद्र मोदी यांनी आपल्या 'मन की बात' कार्यक्रमांत थेट अनितांशी संवाद साधला. त्याच अनितांच्या कामाचा आजच्या महिला दिनी आढावा सांगणारी ही यशोगाथा.
अनिता माळगे यांची यशोगाथा अनिता यांचे सासर आणि माहेर हे बोरामणीचे. पण कमी पाण्यामुळे दोन्ही शेतकरी कुटुंबांची वाताहत झालेली. त्याच वेळी बचत गटाची चळवळ सुरु झाली. तेव्हा नेतृत्व गुण असलेल्या अनिता माळगे यांनी महिला आणि शेतकरी गटाची स्थापना करून कामाला सुरुवात केली. बचत गटाच्या गरजवंत महिला जोडत गेल्या आणि त्यातून महिला सक्षमीकरणाचे जाळ तयार झाले. पुढे चूल आणि मूल या व्यवस्थेच्या ग्रामीण समाजजीवनांत जगताना शेतकरी वर्गाच्या शोषणाला समर्थ पर्याय देण्याची खूनगाठ बांधून त्यांनी यशश्विनी ऍग्रो प्रोड्युसर फार्मर कंपनीची स्थापना केली. आज या कंपनीचा व्ययसाय 5 कोटींच्या घरात आहे, तर शेतकरी केंद्रित प्रक्रिया उद्योगातून त्यांनी स्वतःच मार्केट उभ केले आहे. ज्यातून पारधी, बंजारा अशा दुर्लक्षित घटकांना हक्काचा रोजगार तर मिळाला आहेच, पण निरनिराळ्या 36 उत्पादनांनी मल्टी नॅशनल कंपन्यांना ग्रामीण उत्पादनांकडे आकृष्ट केले आहे.
हेही वाचा -महिला दिन विशेष: मराठी भाषेच्या उन्नतीसाठी बंगाली महिलेचा पुढाकार; काय केलं ते वाचा सविस्तर....
त्यांच्या या कामाला बोरामणी आणि परिसरातील 16 गावातील 1300 कष्टकरी महिला आणि शेतकऱ्यांनी मोलाची साथ दिली आहे. त्यामुळे या भागाचा आर्थिक कायापालट झाला आहे. अशिक्षित महिलांना जगाचे भान यावे म्हणून अनिता त्यांना निरनिराळ्या शासकीय विभागांच्या मदतीने आपला माल विकण्यासाठी आणि नवी बाजारपेठ पाहण्यासाठी राज्यासह देशभरातील प्रदर्शनांना पाठवितात. त्याचबरोबर त्यांच्यासाठी सहली, अभ्यास दौरे आयोजित करतात. यामागे 'स्त्री' सक्षमीकरण हेच उद्दीष्ट आहे.
हेही वाचा -#WomensDay: वेल्डिंगच्या व्यवसायात 'ति'ने उमटविला आपला वेगळा ठसा
