पुणे - देशभरात लॉकडाऊन जाहीर करण्यात आला आहे. अशा परिस्थितीत हातावर पोट असणाऱ्या अनेक कामगारांना उपासमारीला सामोरे जावे लागत आहे. अशात दौंड तालुक्याचे आमदार राहूल कुल यांच्या पुढाकारातून सुमारे ६ हजार अन्नधान्य कीटचे वितरण करण्यात आले आहे . यामुळे, लॉकडाऊनच्या काळात हातवार पोट असलेल्या कुटुंबाना आधार मिळाला आहे .
कोरोनाचा सामना करत असताना संचारबंदीमुळे रोजगाराचे कुठलेही साधन उपलब्ध नसल्याने हातावर पोट असलेल्या कामगारांचे हाल होत आहेत. त्यांच्यासमोर प्रपंच चालवायचा कसा हा मोठा प्रश्न उभा राहिला आहे. शिधापत्रिका धारकांना धान्याचे वाटप होत असले, तरीही अनेक कुटुंबांना रेशनिंग किंवा इतर कुठल्याही प्रकारे मदत मिळत नाही. अशा गरजू नागरिकांना आमदार राहूल कुल यांनी त्यांच्या सहकाऱ्यांच्या माध्यमातून मदत पोहोचवण्याचा प्रयत्न केला आहे.