परभणी -आपल्या नेत्याला मतदान करताना त्याचा गुपचूप फोटो काढून तो व्हायरल करण्याचा प्रताप परभणीतील चार तरुणांना महागात पडला आहे. या चारही तरुणांवर नवा मोंढा पोलीस ठाण्यात गुन्हा दाखल करण्यात आला आहे.
परभणी लोकसभा मतदार संघात गुरुवारी मतदान पार पडले. या दरम्यान, परभणी शहरात शिवसेनेच्या तीन आणि राष्ट्रवादीच्या एका कार्यकर्त्याने मतदान केंद्रावर प्रत्यक्ष मतदान केल्याचा फोटो गुपचुप मोबाईलमध्ये काढून तो समाज माध्यमांमध्ये व्हायरल केला आहे. शिवाय 'मी अमुक उमेदवाराला मतदान केले असून तुम्ही देखील करा, असे आवाहन त्यांनी केले.
यामुळे याची दखल निवडणूक विभागाने घेऊन त्यांच्यावर नवा मोंढा पोलीस ठाण्यात आचारसंहिता भंग केल्याप्रकरणी गुन्हे दाखल केले आहेत. प्रकाश लाखरा, विलास पाटील व मनोज धस पाटील अशी शिवसेना कार्यकर्त्यांची नावे असून अजित जयस्वाल असे राष्ट्रवादी काँग्रेसच्या कार्यकर्त्याचे नाव आहे. त्यांच्यावर निवडणूक विभागाने दिलेल्या फिर्यादीवरून आचारसंहितेचा भंग झाला म्हणून गुन्हा दाखल करण्यात आला आहे. या प्रकरणी रात्री उशिरापर्यंत पोलिसांनी कोणालाही ताब्यात घेतले नव्हते. आज मतदान पेट्या गोळा करून कस्टडित ठेवण्याच्या कामात पोलीस व्यस्त असून त्यांच्यावर उद्या कारवाई होण्याची शक्यता आहे.