जालना - मुख्यमंत्रीपदी शिवसेना पक्षप्रमुख उध्दव ठाकरे यांची निवड झाल्याबद्दल बदनापूर येथे तालुक्यातील शिवसेना, काँग्रेस आणि राष्ट्रवादी काँग्रेस पक्षाच्या कार्यकर्त्यांनी छत्रपती शिवाजी महाराज चौकात जल्लोष साजरा केला. यावेळी फटाक्यांची आतषबाजी करत पेढे वाटून आनंद साजरा करण्यात आला.
बदनापुरात शिवसेना, राष्ट्रवादीसह काँग्रेस कार्यकर्त्यांचा जल्लोष मुख्यमंत्री देवेंद्र फडणवीस आणि उपमुख्यमंत्री अजित पवार यांनी मंगळवारी दुपारी राजीनामा दिल्याने महाविकास आघाडीचा सत्तेचा मार्ग मोकळा झाला आहे. सर्वांच्या संमतीने उध्दव ठाकरे यांचे नाव मुख्यंमत्रीपदासाठी जाहिर करण्यात आले आहे. उद्या उध्दव ठाकरे मुख्यमंत्रीपदाची शपथ घेणार आहेत.
हेही वाचा -उद्धव ठाकरे होणार मुख्यमंत्री; यवतमाळामध्ये शिवसैनिकांचा जल्लोष
यावेळी माजी आमदार संतोष सांबरे यांनी "राज्यघटनेचे उल्लंघन करून भाजपने लोकशाहीची हत्या केली. मात्र, अखेर सत्याचा विजय झाला. उद्धव ठाकरे यांच्या नेतृत्वाखाली स्थापन होणारे सरकार राज्याला नवी दिशा देईल" असा विश्वास व्यक्त केला. तालुकाप्रमुख जयप्रकाश चव्हाण, उपजिल्हाप्रमुख भगवान कदम, बाळासाहेब वाकुळणीकर, युवासेना जिल्हाप्रमुख भाऊसाहेब घुगे आदींसह शिवसेना, काँग्रेस आणि राष्ट्रवादी काँग्रेसचे कार्यकर्ते यावेळी उपस्थित होते.