अमरावती - पोलंड येथे युथ वर्ल्ड आर्चरी चॅम्पियनशिप स्पर्धा होणार आहे. यासाठी मंजिरी आलोने हिची मुलींच्या भारतीय संघात धनुर्विद्या स्पर्धेसाठी प्रथम क्रमांकावर निवड झाली आहे. ही निवड चाचणी हरियाणा राज्यातील सोनिपत येथे पार पडली. मंजिरी ही अमरावती जिल्ह्यातील नांदगांव खंडेश्वर येथील एकलव्य धनुर्विद्या अकादमी तथा एकलव्य गुरुकुल स्कूलमधील नववीतील विद्यार्थ्यांनी आहे. मंजिरी सध्या सोनिपत (हरियाणा) येथे सुरु असलेल्या भारतीय संघाच्या सराव शिबिरात आंतरराष्ट्रीय स्पर्धेचा सराव करत आहे. येत्या ९ ते १५ ऑगस्टला पोलंड येथे होणाऱ्या धनुर्विद्या स्पर्धेसाठी ती भारतीय संघाचे प्रतिनिधित्व करणार आहे.
अमर जाधवांचीही भारतीय संघाचे प्रशिक्षक म्हणून निवड
विशेष म्हणजे एकलव्य धनुर्विद्या अकादमीमध्ये नियमित सराव घेणारे (एनआयएस) कोच अमर जाधव यांची सुद्धा भारतीय संघाचे प्रशिक्षक म्हणून निवड झाली आहे. ते भारतीय संघाला सोनिपत येथे मार्गदर्शन करत आहेत. ते पोलंड येथे होणाऱ्या स्पर्धेसाठी संघ घेऊन जाणार आहेत. नांदगावच्या इतिहासात प्रथमच आंतरराष्ट्रीय स्तरावर प्रशिक्षक म्हणून निवड झाली आहे.
मंजिरी सावनेरच्या शेतकरी कुटुंबातील
मंजिरी आलोने नांदगाव खंडेश्वर येथील सावनेर या खेडेगावातील शेतकरी कुटुंबातील आहे. तिचे वडिल वामन महाराज विद्यालय सावनेर येथे लिपिकाची नोकरी करतात. तिच्या आई रंजना आलोने गृहिणी आहेत.