सिद्धार्थ मल्होत्रा लवकरच 'शेरशाह' या आगामी चित्रपटात कारगिल नायक विक्रम बत्राच्या भूमिकेत दिसणार आहे. शहीद बत्रा यांच्या कोडनेमवरून शीर्षक असलेल्या या चित्रपटात कियारा अडवाणी हिने डिंपल चीमा ही व्यक्तीरेखा साकारली आहे.
धर्मा प्रोडक्शन्सच्या मार्फत बनलेल्या 'शेरशाह' या चित्रपटाचा ट्रेलर रविवारी लाँच झाला. या कार्यक्रमास चीफ ऑफ डिफेन्स स्टाफ जनरल बिपीन रावत, उत्तर आर्मी कमांडर लेफ्टनंट जनरल वाई के जोशी, चित्रपट निर्माते करण जोहर, अपूर्व मेहता आणि कारगिल युद्धातील दिग्गजांचे कुटुंबीय, अनेक सैनिक आणि अधिकारी उपस्थित होते.
अभिनेता सिध्दार्थ मल्होत्राने हा ट्रेलर आपल्या सोशल मीडियावर शेअर केला आहे. त्याने आपल्या ट्विटरवर ट्रेलर शेअर करताना कॅप्शनमध्ये लिहिलंय, ''हिरो हे त्यांच्या कथांमधून जीवंत असतात. कारगिल युध्दातील हिरो कॅप्टन विक्रम बत्रा यांची सत्यकथा घेऊन येताना आम्हाला अभिमान वाटत आहे. हा सिनेमा माझ्यासाठी एक दीर्घ प्रवास होता आणि खरी व्यक्तीरेखा साकारणे अभिमानास्पद होते. 'शेरशाह' प्राईम व्हिडिओवर 12ऑगस्टला येत आहे.''