मुंबई : राज्याचे उपमुख्यमंत्री देवेंद्र फडणवीस यांच्या पत्नी अमृता फडणवीस यांनी प्रजासत्ताक दिनाच्या निमित्ताने त्यांच्या चाहत्यांना खास सरप्राईज दिले आहे. अमृत फडणवीस यांना 'आज मूड बना लिया' या गाण्याच्या उदंड प्रतिसादानंतर थेट चित्रपटात गाण्याचा ब्रेक मिळाला आहे. सध्या सगळीकडे अमृता फडणवीस यांच्या नव्या रिलची चर्चा जोरदार सुरू आहे. आगामी चित्रपटासाठी अमृता यांनी 'सारे जहाँसे अच्छा हिंदोस्तां हमारा' हे देश भक्तीपर गाण गायले आहे. 'भारतीयन्स' हा बहुभाषिक चित्रपट लवकरच प्रेक्षकांच्या भेटीला येणार आहे. गाण्याचा व्हिडिओ ट्रेलर अमृता फडणवीस यांनी सोशल मीडियावर शेअर केला आहे. या गाण्यात त्या पारंपारिक वेशभूषेत दिसत आहेत.
‘भारतीयन्स’ बहुभाषिक चित्रपट :या गाण्याचा व्हिडिओ शेअर करत अमृता फडणवीस यांनी लिहिले, 'तुम्हाला प्रजासत्ताक दिनाच्या खूप शुभेच्छा! आगामी ‘भारतीयन्स’ या बहुभाषिक चित्रपटासाठी ‘सारे जहाँ से अच्छा हिंदोस्ता हमारा’ हे देशभक्तीपर गाणे गायला मिळाले. हा मोठा सन्मान होता. सत्य कश्यप यांचे अंगावर शहारा आणणारे हे संगीत सर्वांनी ऐकायलाच हवे.' अमृता फडणवीस त्यांच्या अनोख्या फॅशन सेन्स आणि मधुर आवाजमुळे नेहमीच सोशल मीडियावर चर्चेत असतात. तसेच त्या राजकीय टोलेबाजीमुळेदेखील प्रसिद्ध आहेत. अमृता फडणवीस यांच्या नवीन गाण्याने सर्वांचे लक्ष वेधून घेतले आहे. राज्याचे उपमुख्यमंत्री देवेंद्र फडणवीस यांच्या पत्नी अमृता फडणवीस सामाजिक विषयांवर त्यांचे मत त्या परखडपणे मांडताना दिसतात.