पुणे-सिंहगड परिसरात असलेल्या तुकाई नगरमध्ये कोयते धारी टोळक्याने दहशत माजवत दहा ते बारा या वाहनांची तोडफोड करत नागरिकांनाही मारहाण केल्याचा प्रकार घडला आहे. पुण्यातील तुकाई नगर भागात मंगळवारी रात्री हा प्रकार घडला.
या भागातील एक तडीपार गुंड जामिनावर बाहेर आला होता. या तडीपार गुंडाचा काही तरुणांशी वाद होता आणि या टोळक्याने तुकाईनगरमध्ये येऊन दहशत माजवण्याचा प्रयत्न केला. हातात कोयते घेऊन हे टोळके रस्त्यावर दहशत माजवत होते. या टोळक्याने रस्त्यावर दिसेल त्या वाहनाची तोडफोड केली. तसेच काही नागरिकांनादेखील मारहाण केल्याने परिसरात एकच खळबळ उडाली.
या प्रकारामुळे नागरिकांमध्ये घबराट पसरली होती. तोडफोड करून हे टोळके पसार झाले. हे सगळे तरुण हडपसर भागातील असल्याचे समोर आले असून यासंदर्भात सिंहगड पोलीस अधिक तपास करत आहेत.