मुंबई -भारतावर इंग्रजांचे राज्य असताना मुंबईत अनेक ऐतिहासिक वास्तू ( Historical Place In Mumbai ) आणि शिल्प उभारण्यात आली. भारत देश स्वतंत्र झाल्यावर कालांतराने या वास्तू आणि शिल्प लुप्त झाली. मुंबईतील ऐतिहासिक ठेवा जतन करण्यासाठी पालिकेच्या पुरातन वास्तू जतन विभाग व उद्यान विभाग ( Mumbai Muncipal Corporation ) यांनी पुढाकार घेतला आहे. मुंबईकरांना आणि येणाऱ्या पर्यटकांना या ऐतिहासिक वास्तू पाहत्या याव्यात यासाठी जतन केल्या जात आहेत.
फ्लोरा फाऊंटन -मुंबई उच्च न्यायालयासमोर असलेल्या चौकात युकेमधील पोर्टलँड दगडापासून 1864 मध्ये फ्लोरा फाऊंटन (कारंजा) बांधण्यात आला. अभियांत्रिकी सेवेचा आणि शिल्पकलेचा उत्तम नमुना म्हणून फ्लोरा फाऊंटन ओळखले जाते. तीन लेअरच्या या कारंजामध्ये दोन्ही बाजूला असलेले सिंह आणि डॉल्फिन यांच्या तोंडातून पाणी खाली पडत असते. 2007पर्यंत पाण्याचे फवारे उडत होते. त्यानंतर हे कारंजे बिघडले व त्यातून पाणी यायचे बंद झाले. सुमारे अडीच कोटी रुपये खर्चून 2018-19 मध्ये याचे नूतनीकरण करण्यात आले होते.
ट्रॅमचे रूळ -मुंबईत ट्रॅम बंद झाल्यावर गेल्या काही दशकात विकास कामे, रस्त्याची कामे झाल्याने फोर्ट परिसरातील ट्रामचे रूळ रस्त्याखाली गेले. या विभागातील रस्ते सिमेंट काँक्रीटचे केले जात असताना खोदकाम करताना ट्रामचे रूळ आढळून आले. या रुळांचे जतन बेस्टच्या आणि डेपो येथील संग्रहालयात ठेवले जाणार होते. मात्र, नंतर हे रूळ लोकांना सहज पाहाता यावेत, यासाठी उच्च न्यायालयाच्या समोर फ्लोरा फाऊंटन जवळ जतन करण्यात आले आहेत.
ऐतिहासिक ट्रॅम -9 मे 1874 ला घोडाद्वारे ओढली जाणारी पहिली ट्रॅम मुंबईमध्ये धावली. सुरुवातीला ट्रॅमच्या तिकिटाचा दर हा तीन आणे होता. प्रवाशांच्या वाढता प्रतिसादानंतर तिकिटाचा दर दोन आणे करण्यात आला. सुरुवातीला ट्रॅमची छापील तिकिटे नव्हती, त्यानंतर काही महिन्यांनी तिकीटे छापण्यात आली 1905 मध्ये "बेस्ट" म्हणजेच 'बॉम्बे इलेक्ट्रिक सप्लाय अँड ट्रॅमवे' कंपनीची स्थापना करण्यात आली. 1907 मध्ये घोड्यांच्या सहाय्याने ओढल्या जाणाऱ्या ट्रॅम बंद करण्यात आल्या. त्यानंतर मुंबईमध्ये पहिली इलेक्ट्रिक ट्रॅम धावली. 1926मध्ये डबल डेकर ट्रॅमही शहरात धावली. 15 जुलै 1926 मध्ये शहरात पहिली बस अफगाण चर्च ते क्रॉफर्ड मार्केट या रस्त्यावर धावली. ही ऐतिहासिक ट्रॅम छत्रपती शिवाजी महाराज टर्मिनस जवळील भाटिया बागेत जतन करण्यात आले आहे.