सचिन तेंडुलकरने घेतली पवारांची भेट, राजकीय चर्चांना उधाण
ही भेट क्रिकेटसंदर्भातील होती, अशी माहिती राष्ट्रवादीच्या खात्रीलायक सूत्रांकडून मिळत आहे.
मुंबई - मास्टर ब्लास्टर सचिन तेंडुलकरने आज सकाळी अकरा वाजण्याच्या सुमारास राष्ट्रवादीचे अध्यक्ष शरद पवार यांची भेट घेतली. ऐन निवडणुकीच्या वातावरणात ही भेट झाल्याने सर्वत्र राजकीय चर्चांना उधाण आले आहे. मात्र, ही भेट क्रिकेटसंदर्भातील होती, असे राष्ट्रवादीच्या गोटात बोलले जात आहे.
शरद पवार आणि सचिन तेंडुलकर यांची भेट लोकसभा निवडणुकीच्या तोंडावर झाल्याने राजकीय वर्तुळात चर्चा सुरू आहे. परंतु, अधिकृतपणे या चर्चेबाबत राष्ट्रवादीकडून किंवा सचिनकडून कोणतीही माहिती देण्यात आलेली नाही. ही भेट क्रिकेटसंदर्भात झालेली आहे, अशी माहिती राष्ट्रवादीच्या खात्रीलायक सूत्रांकडून मिळत आहे.