बेंगळुरू : कर्नाटक काँग्रेसने आज एक मोठा निर्णय घेतला आहे. राज्यातील आगामी विधानसभा निवडणुकीसाठी पक्षाने 124 उमेदवारांची पहिली यादी जाहीर केली आहे. या यादीत माजी मुख्यमंत्री सिद्धरामय्या आणि डीके शिवकुमार यांच्या नावांचा समावेश आहे. कर्नाटकमध्ये यावर्षी मे महिन्यात विधानसभेच्या निवडणुका होण्याची शक्यता आहे. कर्नाटक विधानसभेची मुदत 24 मे 2023 रोजी संपत आहे. येथे विधानसभेच्या एकूण 224 जागा आहेत. कर्नाटक राज्यातील शेवटची विधानसभा निवडणूक 2018 मध्ये झाली होती.
पराभूत नेत्यांना तिकीट नाही : यापूर्वी ही यादी या महिन्याच्या 22 तारखेला उगादी उत्सवात जाहीर होणार असल्याचे सांगण्यात आले होते, मात्र काही कारणास्तव ती पुढे ढकलण्यात आली होती. अखेर आज शनिवारी ही यादी जाहीर करण्यात आली आहे. कॉंग्रेस अध्यक्ष मल्लिकार्जुन खरगे यांच्या अध्यक्षतेखाली नवी दिल्ली येथे झालेल्या केंद्रीय निवडणूक समितीच्या बैठकीत प्रदीर्घ चर्चेनंतर 224 मतदारसंघांपैकी 124 उमेदवारांची नावे निश्चित करण्यात आली आहेत. पक्षाच्या बैठकीत निवडणुकीत पराभूत झालेल्या काही नेत्यांना तिकीट न देण्याचा निर्णय घेण्यात आला आहे.