ಪ್ಯಾರಿಸ್ (ಫ್ರಾನ್ಸ್):ಈ ಬಾರಿಯ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಭಾರತೀಯ ಕುಸ್ತಿ ತಂಡಕ್ಕೆ ಒಂದರ ಮೇಲೊಂದು ಆಘಾತ ಎದುರಾಗುತ್ತಿದೆ. ನಿನ್ನೆಯಷ್ಟೇ ಮಹಿಳೆಯರ 50 ಕೆಜಿ ಕುಸ್ತಿ ವಿಭಾಗದ ಫೈನಲ್ ಪಂದ್ಯದಿಂದ ವಿನೇಶ್ ಫೋಗಟ್ ಅವರನ್ನು ಅನರ್ಹಗೊಳಿಸಲಾಗಿತ್ತು. ಇದೀಗ ಆಂಟಿಮ್ ಪಂಗಲ್ ಮತ್ತು ಅವರ ಸಹಾಯಕ ಸಿಬ್ಬಂದಿಯನ್ನು ಪ್ಯಾರಿಸ್ನಿಂದ ಗಡಿಪಾರು ಮಾಡಲು ನಿರ್ಧರಿಸಲಾಗಿದೆ.
ಮಹಿಳೆಯರ 53 ಕೆಜಿ ಕುಸ್ತಿ ವಿಭಾಗದ ಮೊದಲ ಪಂದ್ಯದಲ್ಲಿ ಸೋಲನುಭವಿಸಿದ್ದ ಆಂಟಿಮ್ ಪಂಗಲ್ಗೆ ಕಂಟಕ ಎದುರಾಗಿದೆ. ಒಲಿಂಪಿಕ್ಸ್ ಶಿಸ್ತು ನಿಯಮ ಉಲ್ಲಂಘಿಸಿದ್ದಕ್ಕಾಗಿ ಅಂತಿಮ್ ಪಂಗಲ್ ಮತ್ತು ಅವರ ಇಡೀ ತಂಡವನ್ನು ಪ್ಯಾರಿಸ್ನಿಂದ ಗಡಿಪಾರು ಮಾಡಲಾಗುತ್ತಿದೆ. ಈ ಬಗ್ಗೆ ಭಾರತೀಯ ಒಲಿಂಪಿಕ್ ಅಸೋಸಿಯೇಷನ್ ಗಮನಕ್ಕೂ ತರಲಾಗಿದೆ.
ಏನಿದು ಘಟನೆ:ಆಂಟಿಮ್ ಅವರು ಕುಸ್ತಿ ಪಂದ್ಯದ ನಂತರ ಗೇಮ್ಸ್ ವಿಲೇಜ್ ತೊರೆದು ತನ್ನ ಸಹೋದರಿ ಮತ್ತು ತರಬೇತುದಾರರು ತಂಗಿದ್ದ ಹೋಟೆಲ್ಗೆ ಭೇಟಿ ನೀಡಿದ್ದರು. ಬಳಿಕ ಹೊಟೆಲ್ನಲ್ಲಿದ್ದ ತನ್ನ ಸಹೋದರಿಗೆ ಒಲಿಂಪಿಕ್ಸ್ ಕ್ರೀಡಾಪಟುಗಳಿಗೆ ನೀಡಲಾಗುವ ಮಾನ್ಯತ ಕಾರ್ಡ್ (ಐಡಿ ಫ್ರೂಫ್) ನೀಡಿ ಗೇಮ್ಸ್ ವಿಲೇಜ್ನಲ್ಲಿರುವ ತನಗೆ ಸಂಬಂಧಿಸಿದ ವಸ್ತುಗಳನ್ನು ತೆಗೆದುಕೊಂಡು ಬರುವಂತೆ ತಿಳಿಸಿ ಕಳುಹಿಸಿದ್ದಾರೆ.
ಅದರಂತೆ ಗೇಮ್ಸ್ ವಿಲೇಜ್ ಒಳಗೆ ಪ್ರವೇಶಿಸಿದ ಆಂಟಿಮ್ ಸಹೋದರಿ ಬಳಿಕ ವಾಪಸ್ ಆಗುವಾಗ ಭದ್ರತಾ ಕೈಗೆ ಸಿಕ್ಕಿಬಿದ್ದಿದ್ದಾರೆ. ಈ ವೇಳೆ ಒಲಿಂಪಿಕ್ಸ್ ನಿಯಮ ಉಲ್ಲಂಘನೆ ಮಾಡಿರುವುದು ಬೆಳಕಿಗೆ ಬಂದಿದೆ. ಕೂಡಲೇ ಆಂಟಿಮ್ ಸಹೋದರಿಯನ್ನು ಪೊಲೀಸ್ ಠಾಣೆಗೆ ಕರೆದೊಯ್ದು ಹೇಳಿಕೆಗಳನ್ನು ದಾಖಲಿಸಿಕೊಂಡಿದ್ದಾರೆ . ಇದರ ಬೆನ್ನಲ್ಲೆ ಆಂಟಿಮ್ ಅವರ ಮಾನ್ಯತೆ ರದ್ದುಗೊಳಿಸುವುದರ ಜೊತೆಗೆ ಇದರಲ್ಲಿ ಭಾಗಿಯಾಗಿರುವ ಸಹಾಯಕ ಸಿಬ್ಬಂದಿಗಳಿಗೆ ಮನೆಗೆ ಕಳುಹಿಸುವುದಾಗಿ ಭಾರತೀಯ ಒಲಿಂಪಿಕ್ ಅಸೋಸಿಯೇಶನ್ಗೆ ತಿಳಿಸಿಲಾಗಿದೆ. ಆಂಟಿಮ್ ಅವರ ಈ ನಡುಗೆಯಿಂದ ಭಾರತಕ್ಕೆ ಮುಜುಗರ ಉಂಟಾಗಿದೆ.
ಇದನ್ನೂ ಓದಿ:ವೇಟ್‌ ಲಿಪ್ಟಿಂಗ್ನಲ್ಲಿ ಭಾರತಕ್ಕೆ ಕಂಚಿನ ಪದಕ ಜಸ್ಟ್ಮಿಸ್: 1 ಕೆಜಿಯಿಂದಾಗಿ 4ನೇ ಸ್ಥಾನಕ್ಕೆ ಇಳಿದ ಮೀರಾಬಾಯಿ ಚಾನು - 4th place in weight lifting
