ಧನರಾಜ್​ ಆಚಾರ್​ ಮನೆಗೆ ಗೋಲ್ಡ್​ ಸುರೇಶ್​ ಭೇಟಿ:ಮಾವನಾಗಿ ಕಂದಮ್ಮನಿಗೆ ತೊಟ್ಟಿಲು ಉಡುಗೊರೆ ಕೊಟ್ಟ ಮಾಜಿ ಸ್ಪರ್ಧಿ

ಗೋಲ್ಡ್​ ಸುರೇಶ್​​ ಅವರು ಧನರಾಜ್​ ಆಚಾರ್​ ಅವರ ಮನೆಗೆ ಭೇಟಿ ಕೊಟ್ಟು, ಮಗುವಿಗೆ ತೊಟ್ಟಿಲನ್ನು ಉಡುಗೊರೆಯಾಗಿ ನೀಡಿದ್ದಾರೆ.

ಕನ್ನಡ ಕಿರುತೆರೆಯ ಜನಪ್ರಿಯ ಕಾರ್ಯಕ್ರಮ 'ಬಿಗ್​ ಬಾಸ್​​ ಕನ್ನಡ ಸೀಸನ್​ 11' ಫಿನಾಲೆ ಹೊಸ್ತಿಲಿನಲ್ಲಿದೆ. ಮನೆಯಲ್ಲಿ ಉಳಿದುಕೊಂಡಿರುವ ಮತ್ತು ಹೊರಹೋಗಿರುವ ಪ್ರತಿ ಸ್ಪರ್ಧಿಗಳು ತಮ್ಮದೇ ಆದ ಜನಪ್ರಿಯತೆ ಸಂಪಾದಿಸಿದ್ದಾರೆ. ಸೋಷಿಯಲ್​ ಮೀಡಿಯಾದಲ್ಲಿ ಸದ್ದು ಮಾಡುವಲ್ಲಿ ಯಶ ಕಂಡಿದ್ದಾರೆ. ಅದರಲ್ಲಿ ಗೋಲ್ಡ್​ ಸುರೇಶ್​​ ಕೂಡಾ ಒಬ್ಬರು.

ಮಾಜಿ ಸ್ಪರ್ಧಿ ಗೋಲ್ಡ್​ ಸುರೇಶ್​​ ಅವರು ಸದ್ಯ ಬಿಗ್​ ಬಾಸ್​ ಮನೆಯಲ್ಲಿ ಉಳಿದುಕೊಂಡಿರುವ ಧನರಾಜ್​ ಆಚಾರ್​ ಮತ್ತು ಹನುಮಂತು ಅವರೊಂದಿಗೆ ಹೆಚ್ಚಿನ ಸಮಯ ಕಳೆಯುತ್ತಿದ್ದರು. ಅವರನ್ನು ಮಾವ ಅಂತಲೇ ಕರೆಯುತ್ತಿದ್ದರು. ಇದೀಗ ಮಾವನಾಗಿ, ಕಂದಮ್ಮನಿಗೆ ತೊಟ್ಟಿಲು ಉಡುಗೊರೆ ನೀಡೋ ಮೂಲಕ ಅಭಿಮಾನಿಗಳ ಗಮನ ಸೆಳೆದಿದ್ದಾರೆ. ಈ ಭೇಟಿಯ ಫೋಟೋ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​​ ಆಗಿದೆ.

ಸೋಷಿಯಲ್​ ಮೀಡಿಯಾದಲ್ಲಿ ಸದ್ದು ಮಾಡುತ್ತಿರುವ ವಿಡಿಯೋದಲ್ಲಿ, ಕೊಟ್ಟ ಮಾತಿನಂತೆ ನಡೆದುಕೊಂಡಿದ್ದೇನೆ ಧನರಾಜ. ಮನೆಗೆ ಹೋಗ್ತೀನಿ ಅಂತಾ ಹೇಳಿದ್ದೆ. ಬಂದಿದ್ದೇನೆ ಎಂದು ಗೋಲ್ಡ್​ ಸುರೇಶ್​ ತಿಳಿಸಿದ್ದಾರೆ. ಧನರಾಜ್​ ಮನೆಯವರೊಂದಿಗೆ ಮಾತನಾಡುತ್ತಾ, ಅವನು ತೊಟ್ಟಿಲನ್ನು ಸೋದರಮಾವ ಕೊಡಬೇಕೆಂದು ತಿಳಿಸಿದ್ದ. ನಿನಗೆ ಕೊಡಕ್ಕೆ ಬರುತ್ತೋ ಇಲ್ವೋ ಎಂಬುದನ್ನು ನೋಡು ಎಂದೂ ಕೂಡಾ ಹೇಳಿದ್ದ. ಅದಕ್ಕೆ ನಾನೇ ಸೋದರ ಮಾವ ಆಗುತ್ತೇನೆಂದು ಹೇಳ್ಬಿಟ್ಟು ಬಂದಿದ್ದೆ ಎಂದು ತಿಳಿಸಿದ್ದಾರೆ. ಮತ್ತೊಂದು ವಿಡಿಯೋದಲ್ಲಿ ಧನರಾಜ್​ ಮಗಳನ್ನು ಎತ್ತಿ ಮುದ್ದಾಡಿರೋದನ್ನು ಕಾಣಬಹುದು.

ಇದನ್ನೂ ಓದಿ:ತನ್ನೂರಿನ ಶಾಲೆಗೆ ಹೊಸ ರೂಪ ಕೊಟ್ಟ ಡಾಲಿ ಧನಂಜಯ್​: ಮದುವೆ ಸಂದರ್ಭವನ್ನು ಸಾರ್ಥಕಗೊಳಿಸಿದ ನಟ

ಬಿಗ್​ ಬಾಸ್​ ಕನ್ನಡ ಈಗಾಗಲೇ 90 ದಿನಗಳನ್ನು ಪೂರ್ಣಗೊಳಿಸಿಕೊಂಡಿದೆ. 12ನೇ ವಾರದ ಶುರುವಿನಲ್ಲೇ ಗೋಲ್ಡ್ ಸುರೇಶ್​ ಅವರ ಆಟಕ್ಕೆ ಬ್ರೇಕ್ ಬಿತ್ತು. ಅವರನ್ನು ಈ ಕೂಡಲೇ ಮನೆಗೆ ಹೊರಡುವಂತೆ ಬಿಗ್​ ಬಾಸ್​​ ಸೂಚಿಸಿದ್ದರು. ಅದರಂತೆ, ಅವರು ಆಟ ನಿಲ್ಲಿಸಿ ಮನೆಯಿಂದ ಹೊರಬಂದ್ರು. ಅವರ ವ್ಯವಹಾರದಲ್ಲಿ ಕೊಂಚ ಏರುಪೇರಾದ ಹಿನ್ನೆಲೆ, ಬಿಗ್​ ಬಾಸ್​ ಈ ನಿರ್ಧಾರ ಕೈಗೊಂಡಿದ್ರು.

ಇದನ್ನೂ ಓದಿ:ಅನುಮತಿಯಿಲ್ಲದೇ ತ್ರಿವಿಕ್ರಮ್ ಮಾತು: ಬಿಗ್​ ಬಾಸ್​ ವೇದಿಕೆಯಿಂದ ಹೊರನಡೆದ ಸುದೀಪ್​​

ಅಂದಿನ ಸಂಚಿಕೆಯಲ್ಲಿ ನಿಖರ ಕಾರಣ ಕೊಡದ ಹಿನ್ನೆಲೆ ಸಾಮಾಜಿಕ ಜಾಲತಾಣದಲ್ಲಿ ಇಲ್ಲಸಲ್ಲದ ವದಂತಿಗಳು ಹರಡಿತ್ತು. ಗೋಲ್ಡ್​ ಸುರೇಶ್ ಕುಟುಂಬದಲ್ಲಿ ಮರಣ ಎಂಬ ವದಂತಿ ಹುಟ್ಟಿಕೊಂಡಿತ್ತು. ಆದರೆ ಅಂಥ ಯಾವುದೇ ದುರ್ಘಟನೆ ಸಂಭವಿಸಿಲ್ಲ. ವ್ಯವಹಾರದಲ್ಲಿ ಕೊಂಚ ಏರುಪೇರಾದ ಹಿನ್ನೆಲೆ, ಈ ಕ್ರಮ ಕೈಗೊಳ್ಳಬೇಕಾಯಿತು ಎಂಬುದು ಬಿಗ್​ ಬಾಸ್​ ವೇದಿಕೆಯಲ್ಲೇ ಸ್ಪಷ್ಟಪಡಿಸಲಾಯಿತು. ವಾರಾಂತ್ಯದ ಸಂಚಿಕೆ ಒಂದಕ್ಕೆ ಅವರನ್ನು ಕರೆಸಿ ವೇದಿಕೆಯಲ್ಲಿ ಸುದೀಪ್​​ ಅವರು ಈ ಬಗ್ಗೆ ಮಾತನಾಡಿದ್ದರು. ಬ್ಯುಸಿನೆಸ್​​ ವಿಷಯ ಎಂಬುದನ್ನು ಗೋಲ್ಡ್​ ಸುರೇಶ್​ ಅವರೇ ಸ್ಪಷ್ಟಪಡಿಸಿದರು.