ರಾಂಚಿ (ಜಾರ್ಖಂಡ್): ಚೆಕ್ ಬೌನ್ಸ್ ಮತ್ತು ವಂಚನೆ ಆರೋಪ ಪ್ರಕರಣಕ್ಕೆ ಸಂಬಂಧಿಸಿದಂತೆ ಚಲನಚಿತ್ರ ನಿರ್ಮಾಪಕ ಅಜಯ್ ಕುಮಾರ್ ಸಿಂಗ್ ಅವರಿಗೆ 2.75 ಕೋಟಿ ರೂ.ಗಳನ್ನು ಪಾವತಿಸುವುದಾಗಿ ಬಾಲಿವುಡ್ ನಟಿ ಅಮೀಶಾ ಪಟೇಲ್ ಒಪ್ಪಿಕೊಂಡಿದ್ದಾರೆ. ರಾಂಚಿ ನ್ಯಾಯಾಲಯವು ನಿರ್ದೇಶನದ ಮೇರೆಗೆ ಈ ಹಣ ಕಟ್ಟಲು ನಟಿ ಸಮ್ಮತಿಸಿದ್ದಾರೆ.
ಚಲನಚಿತ್ರ ನಿರ್ಮಾಣದ ಹೆಸರಿನಲ್ಲಿ ರಾಂಚಿಯ ಚಲನಚಿತ್ರ ನಿರ್ಮಾಪಕ ಅಜಯ್ ಕುಮಾರ್ ಸಿಂಗ್ ಅವರಿಂದ ಸುಮಾರು 3 ಕೋಟಿ ರೂಪಾಯಿ ಸಾಲವನ್ನು ನಟಿ ಅಮೀಶಾ ಪಟೇಲ್ ಪಡೆದಿದ್ದರು. ಆದರೆ, ಬಹಳ ದಿನಗಳಾದರೂ ಈ ಹಣವನ್ನು ಅಮೀಶಾ ಪಟೇಲ್ ಮರಳಿ ನೀಡಿರಲಿಲ್ಲ. ಆದ್ದರಿಂದ ಅಜಯ್‌ಕುಮಾರ್‌ ಕಾನೂನಿನ ಮೊರೆ ಹೋಗಿದ್ದರು.
ಈ ಪ್ರಕರಣದ ವಿಚಾರಣೆ ವೇಳೆ ನ್ಯಾಯಾಧೀಶ ಡಿ.ಎನ್.ಶುಕ್ಲಾ ಅವರ ಮುಂದೆ ಹಾಜರಾದ ಅಮೀಶಾ ಪಟೇಲ್ ಪರ ವಕೀಲರು, ನಿರ್ಮಾಪಕ ಅಜಯ್ ಕುಮಾರ್ ಸಿಂಗ್ ಅವರಿಂದ ಸುಮಾರು 3 ಕೋಟಿ ರೂಪಾಯಿ ಸಾಲವನ್ನು ನಟಿ ಅಮೀಶಾ ಪಟೇಲ್ ಪಡೆದಿರುವುದು ನಿಜ. ಸಾಲವಾಗಿ ಹಣ ಪಡೆದು ಚಿತ್ರ ನಿರ್ಮಿಸಿದ್ದರೂ, ಅದು ನಿರೀಕ್ಷೆಗೆ ತಕ್ಕಂತೆ ಬಾಕ್ಸ್ ಆಫೀಸ್‌ನಲ್ಲಿ ಬಿಡುಗಡೆಯಾಗಲು ಸಾಧ್ಯವಾಗಲಿಲ್ಲ. ಇದರಿಂದಾಗಿ ಚಿತ್ರದಿಂದ ಯಾವುದೇ ಆದಾಯ ಬರಲಿಲ್ಲ. ಹೀಗಾಗಿ ಹಣ ನೀಡಲು ನಿರಂತರ ವಿಳಂಬವಾಗುತ್ತಿದೆ ಎಂದು ಒಪ್ಪಿಕೊಂಡರು.