ನೀಟ್​ ಯುಜಿ ಮರುಪರೀಕ್ಷೆಯ ಫಲಿತಾಂಶ ಪ್ರಕಟ - NEET UG Re Test Results

1,563 ಅಭ್ಯರ್ಥಿಗಳಿಗೆ ಮರು ಪರೀಕ್ಷೆ ನಡೆಸಲು ಸುಪ್ರೀಂ ಕೋರ್ಟ್​ ಅನುಮತಿ ನೀಡಿತ್ತು. ಆದರೆ, 813 ಅಭ್ಯರ್ಥಿಗಳು ಮಾತ್ರ ಪರೀಕ್ಷೆ ಎದುರಿಸಿದ್ದರು.

ನವದೆಹಲಿ: ನೀಟ್​​-ಯುಜಿ ಮರು ಪರೀಕ್ಷಾ ಫಲಿತಾಂಶದ ಪರಿಷ್ಕೃತ ಪಟ್ಟಿಯನ್ನು ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ಎನ್​ಟಿಎ) ಇಂದು ಪ್ರಕಟಿಸಿತು. ಹೊಸ ರ‍್ಯಾಂಕ್​ ವಿವರ ಬಿಡುಗಡೆ ಮಾಡಲಾಗಿದೆ.

ಮೇ 5ರಂದು ಆರು ಪರೀಕ್ಷಾ ಕೇಂದ್ರಗಳಲ್ಲಿ ಪರೀಕ್ಷೆ ವಿಳಂಬದಿಂದಾಗಿ ಗ್ರೇಸ್​ ಅಂಕ ಪಡೆದ ಅಭ್ಯರ್ಥಿಗಳಿಗೆ ಮರು ಪರೀಕ್ಷೆ ನಡೆಸಲಾಗಿದೆ. ಸುಪ್ರೀಂ ಕೋರ್ಟ್​ ಆದೇಶದಂತೆ ಏಳು ಕೇಂದ್ರದಲ್ಲಿ ಜೂನ್​ 13ರಂದು 1,563 ಅಭ್ಯರ್ಥಿಗಳಿಗೆ ಪರೀಕ್ಷೆ ನಡೆಸಲಾಗಿತ್ತು. ಆದರೆ, ಕೇವಲ 813 ಅಭ್ಯರ್ಥಿಗಳು ಹಾಜರಾಗಿದ್ದರು. ಉಳಿದವರು ಗ್ರೇಸ್​ ಅಂಕದ ಹೊರತಾದ ಮಾರ್ಕ್ಸ್​ ಆಯ್ಕೆ ಮಾಡಿದ್ದಾರೆ ಎಂದು ಎನ್‌ಟಿಎ ತಿಳಿಸಿದೆ.

ಕಠಿಣ ಪರೀಕ್ಷೆಗಳ ಪೈಕಿ ಒಂದಾಗಿರುವ ನೀಟ್​ನಲ್ಲಿ ಈ ಬಾರಿ ಗ್ರೇಸ್​ ಮಾರ್ಕ್ಸ್ ಮತ್ತು ಪತ್ರಿಕೆ ಸೋರಿಕೆ ಘಟನೆಗಳಿಂದ ದೇಶಾದ್ಯಂತ ವಿವಾದವೆದ್ದಿತ್ತು. ಹರಿಯಾಣದ ಒಂದೇ ಕೇಂದ್ರದಲ್ಲಿ ಆರು ವಿದ್ಯಾರ್ಥಿಗಳು 720 ಅಂಕ ಗಳಿಸಿದ್ದರು. ಈ ಹಿನ್ನೆಲೆಯಲ್ಲಿ ಗ್ರೇಸ್​ ಅಂಕಗಳನ್ನು ರದ್ದುಗೊಳಿಸಿದ ಸುಪ್ರೀಂ ಕೋರ್ಟ್​, ಗ್ರೇಸ್​ ಅಂಕ ಗಳಿಸಿದ ಅಭ್ಯರ್ಥಿಗಳಿಗೆ ಮರು ಪರೀಕ್ಷೆಗೆ ಅವಕಾಶ ನೀಡಿತ್ತು.

ಮರು ಪರೀಕ್ಷೆ ನಡೆದ ಏಳು ಕೇಂದ್ರದಲ್ಲಿ ಚಂಢೀಗಢದಲ್ಲಿ ಅಭ್ಯರ್ಥಿಗಳು ಗೈರಾಗಿದ್ದು, ಛತ್ತೀಸ್‌ಗಢದಿಂದ 291, ಗುಜರಾತ್‌ನಲ್ಲಿ ಓರ್ವ, ಹರಿಯಾಣದಿಂದ 287 ಮತ್ತು ಮೇಘಾಲಯದಿಂದ 234 ಅಭ್ಯರ್ಥಿಗಳು ಮರು ಪರೀಕ್ಷೆ ಎದುರಿಸಿದ್ದಾರೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಮೇ 5ರಂದು ದೇಶದ 4,750 ಕೇಂದ್ರಗಳಲ್ಲಿ ಅಂದಾಜು 24 ಲಕ್ಷ ಅಭ್ಯರ್ಥಿಗಳು ನೀಟ್​ ಯುಜಿ ಪರೀಕ್ಷೆ ಎದುರಿಸಿದ್ದರು. ಜೂನ್​ 14ರಂದು ಪ್ರಕಟವಾಗಬೇಕಿದ್ದ ಫಲಿತಾಂಶ ಬೇಗನೆ ಮೌಲ್ಯಮಾಪನಗೊಂಡ ಪರಿಣಾಮ ಜೂನ್​ 4ಕ್ಕೆ ಪ್ರಕಟವಾಗಿತ್ತು. ನೀಟ್​ ಇತಿಹಾಸದಲ್ಲೇ ಮೊದಲ ಬಾರಿಗೆ 67 ಅಭ್ಯರ್ಥಿಗಳು 720 ಅಂಕ ಪಡೆಯುವ ಮೂಲಕ ದಾಖಲೆ ನಿರ್ಮಿಸಿದ್ದರು.

ಎಂಬಿಬಿಎಸ್​, ಆಯುಷ್​ ಮತ್ತು ಬಿಡಿಎಸ್​ ಕೋರ್ಸ್ ಸೇರಬಯಸುವ ಅಭ್ಯರ್ಥಿಗಳು ಈ ಪರೀಕ್ಷೆ ಎದುರಿಸಬೇಕಿದೆ.

ಮರು ಪರೀಕ್ಷೆಯ ಫಲಿತಾಂಶ ಹೀಗೆ ಚೆಕ್ ಮಾಡಿ: ಮರು ಪರೀಕ್ಷೆ ಎದುರಿಸಿದ್ದ ಅಭ್ಯರ್ಥಿಗಳು ಫಲಿತಾಂಶ ವೀಕ್ಷಣೆಗೆ exams.nta.ac.in/NEET ಈ ಜಾಲತಾಣಕ್ಕೆ ಭೇಟಿ ನೀಡಬೇಕು. ಅಭ್ಯರ್ಥಿಗಳ ನೋಂದಣಿ ಸಂಖ್ಯೆ, ಹುಟ್ಟಿದ ದಿನ ದಾಖಲಿಸಿ ಫಲಿತಾಂಶ ವೀಕ್ಷಿಸಬಹುದು. ಸ್ಕೋರ್​​ಕಾರ್ಡ್​ ಡೌನ್​ಲೋಡ್​ ಮಾಡಿಕೊಳ್ಳಬಹುದು.

ಇದನ್ನೂ ಓದಿ: NEET ಪ್ರಶ್ನೆ ಪತ್ರಿಕೆ ಸೋರಿಕೆ ಪ್ರಕರಣ: ಆರೋಪಿ ಜಲೀಲ್ ಪಠಾಣ್​ ಬಳಿ ಇದೆ ದುಬಾರಿ ಬಂಗಲೆ; ನಕಲಿ ಅಂಗವಿಕಲ ಪತ್ರವೂ ಬಯಲು