ಶಿಡ್ಲಘಟ್ಟಕ್ಕೆ ಟಿಕೆಟ್​ ಕೊಡಪ್ಪ.. ನಾಗರಹಾವು ಕಂಡು ಎದ್ದುಬಿದ್ದು ಓಡಿ ಹೋದ ಬಸ್​ ಪ್ರಯಾಣಿಕರು

ನಾಗರಹಾವೊಂದು ಕೆಎಸ್​ಆರ್​ಟಿಸಿ ಬಸ್​ ಏರಿ ಅವಾಂತರ ಸೃಷ್ಟಿಸಿರುವ ಘಟನೆ ಚಿಕ್ಕಬಳ್ಳಾಪುರ ಜಿಲ್ಲೆಯ ನಗರ ಶಿಡ್ಲಘಟ್ಟ ವೃತ್ತದಲ್ಲಿ ನಡೆದಿದೆ. ನಿನ್ನೆ ಸಂಜೆ ನಾಗರಹಾವೊಂದು ಗಾಬರಿಯಲ್ಲಿ ದಾರಿ ಕಾಣದೆ ಚಿಕ್ಕಬಳ್ಳಾಪುರದಿಂದ ಶಿಡ್ಲಘಟ್ಟ ಮಾರ್ಗವಾಗಿ ಹೋಗುತ್ತಿದ್ದ ಕೆಎಸ್​ಆರ್​ಟಿಸಿ ಬಸ್​ ಹತ್ತಿದ್ದು, ಹಾವು ನೋಡಿದ ಪ್ರಯಾಣಿಕರು ಹಾಗೂ ಚಾಲಕ ಗಾಬರಿಗೊಂಡು ಬಸ್​ನಿಂದ ಇಳಿದು ಓಡಿದ್ದಾರೆ. ನಂತರ ಚಾಲಕ ಮತ್ತು ಸ್ಥಳೀಯರು ಉರಗ ತಜ್ಞ ಪೃಥ್ವಿರಾಜ್​ಗೆ ಕರೆ ಮಾಡಿ ವಿಷಯ ತಿಳಿಸಿದ್ದಾರೆ. ಸ್ಥಳಕ್ಕೆ ಬಂದ ಉರಗ ತಜ್ಞ ಪೃಥ್ವಿರಾಜ್ ಹಾಗೂ ಸ್ಥಳೀಯರು ಬಸ್​ನಲ್ಲಿ ಇದ್ದ ನಾಗರಹಾವಿಗಾಗಿ ಹುಡುಕಾಟ ನಡೆಸಿದರು. ಬಸ್​ ಇಂಜಿನ್ ಮೇಲಿದ್ದ ಬ್ಯಾನೆಟ್​ನಲ್ಲಿ ಹಾವು ನುಗ್ಗಿರುವುದು ಗೊತ್ತಾಗಿದೆ. ಬಸ್​ ಚಾಲಕ ಹಾಗು ಸ್ಥಳೀಯರ ಸಹಾಯ ಪಡೆದು ಉರಗತಜ್ಞ ಪೃಥ್ವಿರಾಜ್ ಹರಸಾಹಸದಿಂದ ನಾಗರಹಾವನ್ನು ರಕ್ಷಿಸುವ ಕಾರ್ಯ ಮಾಡಿದ್ದಾರೆ. ಹಾವನ್ನು ರಕ್ಷಿಸಿದ ಪೃಥ್ವಿರಾಜ್​ಗೆ ಪ್ರಯಾಣಿಕರು ಹಾಗು ಸ್ಥಳೀಯರು ಅಭಿನಂದನೆ ಸಲ್ಲಿಸಿದರು.