ಅಕಾಲಿಕವಾಗಿ ಬಿಳಿಯಾಗುತ್ತಿರುವ ಕೂದಲು : ಕಾರಣಗಳು, ತಡೆಗಟ್ಟುವಿಕೆ ಮತ್ತು ಆಯುರ್ವೇದ ಚಿಕಿತ್ಸೆ ಇಲ್ಲಿದೆ

ಒತ್ತಡ, ಮಾಲಿನ್ಯ, ಜೀವನಶೈಲಿ ಸೇರಿದಂತೆ ಅನೇಕ ಕಾರಣಗಳಿಂದ ಅಥವಾ ದೀರ್ಘಕಾಲದವರೆಗೆ ಕಾಯಿಲೆಯಿಂದ ಬಳಲುತ್ತಿರುವವರು ಅಕಾಲಿಕವಾಗಿ ಕೂದಲು ಬೆಳ್ಳಗಾಗುವ ಸಮಸ್ಯೆ ಅನುಭವಿಸುತ್ತಾರೆ. ಇದಕ್ಕೆ ಕಾರಣಗಳೇನು ಮತ್ತು ಹೇಗೆ ತಡೆಗಟ್ಟಬಹುದು ಎಂದು ಆಯುರ್ವೇದ ವೈದ್ಯರು ವಿವರಿಸಿದ್ದಾರೆ..

ಹೈದರಾಬಾದ್ :ವಯಸ್ಕರರು ಸಾಮಾನ್ಯವಾಗಿ ಎದುರಿಸುತ್ತಿರುವ ಸಮಸ್ಯೆ ಎಂದರೆ ಕೂದಲು ಬೆಳ್ಳಗಾಗುವುದು. ಕೆಲವರು ಅದನ್ನು ಒಪ್ಪಿಕೊಳ್ಳುತ್ತಾರೆ, ಇತರರು ಮರೆಮಾಡಲು ಸಾಧ್ಯವಿರುವ ಎಲ್ಲಾ ಮಾರ್ಗಗಳನ್ನು ಪ್ರಯತ್ನಿಸುತ್ತಾರೆ.

ಆದರೆ, ಹೆಚ್ಚಿನ ಜನರಿಗೆ ನಮ್ಮ ಕೂದಲು ಏಕೆ ಬಿಳಿಯಾಗುತ್ತಿದೆ ಮತ್ತು ಅದಕ್ಕೆ ಕಾರಣವಾದ ಅಂಶಗಳು ಯಾವುವು ಎಂದು ತಿಳಿದಿರುವುದಿಲ್ಲ. ಆಂಧ್ರಪ್ರದೇಶದ ಸಾಸಾಸ್ ಆಯುರ್ವೇದ ವೈದ್ಯಕೀಯ ಕಾಲೇಜಿನ ಸಹಾಯಕ ಪ್ರಾಧ್ಯಾಪಕ ಡಾ.ಎಸ್.ಯಾಸ್ಮಿನ್, ಎಂಡಿ ಆಯುರ್ವೇದ, ಇದರ ಬಗ್ಗೆ ನಮಗೆ ಹೆಚ್ಚಿನ ಮಾಹಿತಿ ನೀಡಿದ್ದಾರೆ.

"ಮೆಲನೊಸೈಟ್​ಗಳು ಕೂದಲಿನ ಬಣ್ಣಕ್ಕೆ ಕಾರಣವಾಗುವ ಕೋಶಗಳಾಗಿವೆ, ಪ್ರತಿ ಕೂದಲು ಕೋಶಕವು ಅದರಲ್ಲಿ ಮೆಲನೊಸೈಟ್​ಗಳನ್ನು ಹೊಂದಿರುತ್ತದೆ. ಮೆಲನೊಸೈಟ್​ಗಳು ಮೆಲನಿನ್‌ನ ಸ್ಟ್ರಾಂಡ್​ಗೆ ಚುಚ್ಚುತ್ತವೆ, ಅದು ಕೂದಲಿಗೆ ಅದರ ಬಣ್ಣವನ್ನು ನೀಡುತ್ತದೆ.

ಸಾಮಾನ್ಯವಾಗಿ, ನಾವು ವಯಸ್ಸಾದಂತೆ, ಮೆಲನೊಸೈಟ್​ಗಳು ನಿಧಾನವಾಗಿ ಮೆಲನಿನ್ ಉತ್ಪಾದನೆಯನ್ನು ನಿಲ್ಲಿಸುತ್ತವೆ. ಹೀಗಾಗಿ, ಕೂದಲಿನ ಎಳೆಗಳು ಬೂದು ಮತ್ತು ನಂತರ ಬಿಳಿ ಬಣ್ಣಕ್ಕೆ ತಿರುಗುತ್ತವೆ.

ಆದರೆ, ಸರಿಯಾದ ಪೋಷಣೆಯ ಕೊರತೆ, ದೀರ್ಘಕಾಲದ ಕಾಯಿಲೆ ಅಥವಾ ಒತ್ತಡದಂತಹ ಅಂಶಗಳು ಕೂಡ ಕೂದಲು ಬಿಳಿಯಾಗಲು ಕಾರಣವಾಗಿವೆ. ಈ ಅಂಶಗಳು ಚಿಕ್ಕ ವಯಸ್ಸಿನಲ್ಲಿಯೇ ಕೂದಲನ್ನು ಬಿಳಿ ಮಾಡಲು ಕಾರಣವಾಗಬಹುದು" ಎಂದು ಅವರು ಹೇಳಿದ್ದಾರೆ.

ಕೂದಲು ಬಿಳಿಯಾಗಲು ಸಾಮಾನ್ಯ ಮತ್ತು ಆಯುರ್ವೇದ ಅಂಶಗಳು :

ಆಯುರ್ವೇದದ ಪ್ರಕಾರ ಕೆಲವು ಅಂಶಗಳು ಇಲ್ಲಿದ್ದು, ಡಾ. ಯಾಸ್ಮಿನ್ ವಿವರಿಸಿದಂತೆ, ಇವು ಕೂದಲು ಉದುರುವಿಕೆಗೆ ಕಾರಣವಾಗುತ್ತದೆ. ಇವುಗಳನ್ನು ನಾಲ್ಕು ವಿಭಾಗಗಳಾಗಿ ವಿಂಗಡಿಸಲಾಗಿದೆ:

1. ಆಹಾರ (ಆಹಾರದ ಅಂಶಗಳು):

ಅತಿಯಾದ ಅಥವಾ ತುಂಬಾ ಬಿಸಿ, ಮಸಾಲೆಯುಕ್ತ, ಎಣ್ಣೆಯುಕ್ತ, ಉಪ್ಪು ಮತ್ತು ಹುಳಿ ಆಹಾರ, ಆಮ್ಲೀಯ, ಹುರಿದ ಮತ್ತು ಹುದುಗುವ ಆಹಾರಗಳ ಬಳಕೆ, ಹೆಚ್ಚಿನ ಪ್ರಮಾಣದಲ್ಲಿ ಮಾಂಸ ಸೇವನೆ, ಆಲ್ಕೊಹಾಲ್, ಚಹಾ ಮತ್ತು ಕಾಫಿಯನ್ನು ಆಗಾಗ್ಗೆ ಮತ್ತು ನಿಯಮಿತವಾಗಿ ಸೇವಿಸುವುದು ಅಕಾಲಿಕವಾಗಿ ಕೂದಲು ಬೆಳ್ಳಗಾಗುವುದಕ್ಕೆ ಕಾರಣವಾಗಬಹುದು. ಅಲ್ಲದೆ, ಕಡಿಮೆ ತೇವಾಂಶ ಮತ್ತು ಕೂದಲು ಬುಡಕ್ಕೆ ಪೋಷಕಾಂಶಗಳು ತಲುಪದೇ ಇರುವುದು ಇದಕ್ಕೆ ಕಾರಣವಾಗಬಹುದು.

2. ವಿಹಾರ: (ಬಾಹ್ಯ ಮತ್ತು ವರ್ತನೆಯ ಅಂಶಗಳು / ಜೀವನಶೈಲಿ)

ಇದು ಕೆಲವು ಪರಿಸರೀಯ ಅಂಶಗಳಿಗೆ ಒಡ್ಡಿಕೊಳ್ಳುವುದು, ಜೀವನಶೈಲಿಯ ಬದಲಾವಣೆಗಳು ಮತ್ತು ಕಟ್ಟುಪಾಡುಗಳನ್ನು ಒಳಗೊಂಡಿದೆ. ಈ ಕೆಲವು ಅಂಶಗಳು ಹೀಗಿವೆ:

• ರಾತ್ರಿ ಪಾಳಿಯಲ್ಲಿ ಕೆಲಸ ಮಾಡುವುದು, ಅತಿಯಾಗಿ ಚಲನಚಿತ್ರಗಳನ್ನು ನೋಡುವುದು, ಪುಸ್ತಕಗಳನ್ನು ಓದುವುದು, ಕಂಪ್ಯೂಟರ್ ಅಥವಾ ಮೊಬೈಲ್​ನಲ್ಲಿ ಕೆಲಸ ಮಾಡುವುದು
• ಹಗಲಿನ ವೇಳೆಯಲ್ಲಿ ಸೂರ್ಯ ಮತ್ತು ಹಾನಿಕಾರಕ ಯುವಿ ಕಿರಣಗಳಿಗೆ ಹೆಚ್ಚು ಒಡ್ಡಿಕೊಳ್ಳುವುದು
• ತಲೆಯ ಮೇಲೆ ಎಣ್ಣೆಯ ಮಸಾಜ್ ಇಲ್ಲದಿರುವುದು. ಇದು ನೆತ್ತಿ ಮತ್ತು ಕೂದಲು ಕಿರುಚೀಲಗಳ ಅಸಮರ್ಪಕ ಪೋಷಣೆಗೆ ಕಾರಣವಾಗುತ್ತದೆ.
• ಶುದ್ಧ, ಮೃದುವಾದ ನೀರಿನ ಅಲಭ್ಯತೆಯಿಂದಾಗಿ ಕಲುಷಿತ ಮತ್ತು ಗಡಸು ನೀರಿನಿಂದ ಕೂದಲು ತೊಳೆಯುವುದು.
• ಅತಿಯಾದ ಅಥವಾ ಶ್ರಮದಾಯಕ ತಾಲೀಮು ಮತ್ತು ದೀರ್ಘಾವಧಿಯವರೆಗೆ ಉಪವಾಸ ಇತ್ಯಾದಿ.

3. ಮಾನಸಿಕ ಹೆತು: (ಮಾನಸಿಕ ಅಂಶಗಳು)

ಕೋಪ, ದುಃಖ, ಒತ್ತಡ ಮತ್ತು ಆತಂಕದಂತಹ ಭಾವನೆಗಳೆಲ್ಲವೂ ಪಿತ್ತ ಮತ್ತು ವಾತ ದೋಷಗಳೆರಡನ್ನೂ ಉಲ್ಬಣಗೊಳಿಸುವುದಾಗಿ ಪರಿಗಣಿಸಲಾಗುತ್ತದೆ. ಇದು ಅಕಾಲಿಕವಾಗಿ ಕೂದಲು ಬೆಳ್ಳಗಾಗುವುದಕ್ಕೆ ಕಾರಣವಾಗಬಹುದು.

4. ಅನ್ಯ ಹೆತು: (ವಿವಿಧ ಅಂಶಗಳು)

• ದೇಹದಲ್ಲಿ ಪಿತ್ತದ ಅಂಶ ಅತಿಯಾಗಿರುವವರ ಕೂದಲು ನೈಸರ್ಗಿಕವಾಗಿ ಅಕಾಲಿಕವಾಗಿ ಬಿಳಿಯಾಗುತ್ತದೆ.
• ಆನುವಂಶಿಕವಾಗಿಯೂ ಕೂದಲೂ ಬೆಳ್ಳಗಾಗಬಹುದು.
• ಕೂದಲಿನ ಬಣ್ಣ ಮತ್ತು ವಿನ್ಯಾಸವು ವ್ಯಕ್ತಿ ವಾಸಿಸುವ ಪ್ರದೇಶದ ಮೇಲೆ ಅವಲಂಬಿತವಾಗಿರುತ್ತದೆ.
• ಅತಿಯಾದ ಮಾಲಿನ್ಯ

ಇತರ ಕೆಲವು ಅಂಶಗಳು :

• ಸರಿಯಾದ ಪೋಷಣೆಯ ಕೊರತೆ
• ಹಾರ್ಮೋನುಗಳ ಅಸಮತೋಲನ
• ರಾಸಾಯನಿಕ ಬಣ್ಣಗಳ ಬಳಕೆ
• ವಿಟಮಿನ್ ಬಿ 12, ಬಿ 5, ಡಿ 3, ಕಬ್ಬಿಣ, ತಾಮ್ರ, ಕ್ಯಾಲ್ಸಿಯಂ, ಜೊತೆಗೆ ಅಯೋಡಿನ್ ಕೊರತೆ.
• ವಿಟಮಿನ್ ಇ ಅಧಿಕವು ಅಕಾಲಿಕವಾಗಿ ಕೂದಲು ಬೆಳ್ಳಗಾಗುವುದಕ್ಕೆ ಕಾರಣವಾಗಬಹುದು.
• ಕೆಲವು ವೈದ್ಯಕೀಯ ಪರಿಸ್ಥಿತಿಗಳು ಮತ್ತು ಅವುಗಳ ಚಿಕಿತ್ಸೆ.

ಕೂದಲು ಬಿಳಿಯಾಗುವುದನ್ನು ತಡೆಯಲು 10 ಮಾರ್ಗಗಳು:

ಡಾ.ಯಾಸ್ಮಿನ್ ಶಿಫಾರಸು ಮಾಡಿದಂತೆ ಕೂದಲು ಬೆಳ್ಳಗಾಗುವುದನ್ನು ತಡೆಯಲು ವಿಧಾನಗಳು ಇಲ್ಲಿವೆ -

1. ಎಳ್ಳು ಎಣ್ಣೆ ಅಥವಾ ಆಮ್ಲಾ ಎಣ್ಣೆಯಿಂದ 6 ತಿಂಗಳ ಕಾಲ ಮಸಾಜ್ ಮಾಡುವುದು ಸಹಾಯಕವೆಂದು ಪರಿಗಣಿಸಲಾಗುತ್ತದೆ. ಆಯುರ್ವೇದದಲ್ಲಿ ಬಳಸುವ ಅನೇಕ ಔಷಧೀಯ ಎಣ್ಣೆಗಳಿಗೆ ಎಳ್ಳು ಎಣ್ಣೆ ಮೂಲ ಎಣ್ಣೆಯಾಗಿದೆ. ನೆತ್ತಿಯನ್ನು ಮಸಾಜ್ ಮಾಡುವುದು ಬಿಳಿ ಕೂದಲನ್ನು ಕಡಿಮೆ ಮಾಡಲು ಅತ್ಯುತ್ತಮ ಮಾರ್ಗವಾಗಿದೆ.
2. ತೆಂಗಿನ ಎಣ್ಣೆ ಮತ್ತು ಕರಿಬೇವಿನ ಎಲೆಗಳು ಅತ್ಯಂತ ಸಾಮಾನ್ಯ ಮತ್ತು ಪರಿಣಾಮಕಾರಿ ಸಂಯೋಜನೆಯಾಗಿದ್ದು,ತಲೆಮಾರುಗಳಿಂದ ಇದನ್ನು ಬಳಸಲಾಗುತ್ತದೆ. ಕರಿಬೇವಿನ ಎಲೆಗಳು ಕ್ಯಾಲ್ಸಿಯಂ, ರಂಜಕ ಮೆಗ್ನೀಸಿಯಮ್ ಕಬ್ಬಿಣ ಮತ್ತು ತಾಮ್ರದ ನೈಸರ್ಗಿಕ ಮೂಲವಾಗಿದ್ದು, ಕೂದಲು ಮತ್ತು ಕೂದಲು ಕಿರುಚೀಲಗಳಿಗೆ ಪೋಷಣೆ ನೀಡುತ್ತದೆ. ಇದು ಮೆಲನಿನ್ ರಚನೆಯನ್ನು ಹೆಚ್ಚಿಸುತ್ತದೆ. ಇದನ್ನು ತಯಾರಿಸಲು, ಕರಿಬೇವಿನ ಎಲೆಗಳನ್ನು (ಸುಮಾರು 100 ಗ್ರಾಂ) ಮತ್ತು ತೆಂಗಿನ ಎಣ್ಣೆಯನ್ನು ಒಟ್ಟಿಗೆ ಕುದಿಸಿ ನಂತರ ತಣ್ಣಗಾಗಲು ಬಿಡಿ. ಅದು ತಣ್ಣಗಾದ ನಂತರ, ಕರಿಬೇವಿನ ಎಲೆಗಳನ್ನು ತೆಗೆದು ಹಾಕಿ ಅದನ್ನು ಫಿಲ್ಟರ್ ಮಾಡಿ. ಈಗ ನಿಮ್ಮ ನೆತ್ತಿಯ ಮೇಲೆ ಎಣ್ಣೆಯನ್ನು ಮಸಾಜ್ ಮಾಡಿ ನಂತರ ಗಿಡಮೂಲಿಕೆಗಳ ಶಾಂಪೂ ಬಳಸಿ ನಿಮ್ಮ ಕೂದಲನ್ನು ನೀರಿನಿಂದ ತೊಳೆಯಿರಿ.
3. ಕೆಲವು ಕರಿಬೇವಿನ ಎಲೆಗಳು ಮತ್ತು ಒಂದು ಕಪ್ ಮಜ್ಜಿಗೆಯೊಂದಿಗೆ ಪೇಸ್ಟ್ ತಯಾರಿಸಿ ಅದನ್ನು ನಿಮ್ಮ ನೆತ್ತಿಗೆ ಹಚ್ಚಿ. ಇದನ್ನು 30 ನಿಮಿಷಗಳ ಕಾಲ ಇರಿಸಿ ನಂತರ ಸೌಮ್ಯವಾದ ಶಾಂಪೂ ಬಳಸಿ ತೊಳೆಯಿರಿ.
4. ಎಳ್ಳು ಬೀಜಗಳನ್ನು ಸೇವಿಸುವುದರಿಂದ ಸಹಕಾರಿಯಾಗುತ್ತದೆ. ನೀವು ಹುರಿದ ಒಣಗಿಸಿ ಅವುಗಳನ್ನು ಸೇವಿಸಬಹುದು. ಅಲ್ಲದೆ, ಬೆಳಗ್ಗಿನ ಜಾವ ಸ್ವಲ್ಪ ಕಪ್ಪು ಎಳ್ಳು ಬೀಜಗಳನ್ನು ಸೇವಿಸಿ ಒಂದು ಲೋಟ ನೀರು ಕುಡಿದರೆ ಅದು ಕೂದಲಿಗೆ ಅತ್ಯುತ್ತಮವಾದ ಪೌಷ್ಠಿಕಾಂಶವನ್ನು ನೀಡುತ್ತದೆ. ಇದನ್ನು ಉಪಾಹಾರದ ಭಾಗವಾಗಿ ವಾರಕ್ಕೆ ಎರಡು ಬಾರಿ ಮಾಡಬಹುದು.
5. ಬಿಳಿ ಕೂದಲಿನ ಚಿಕಿತ್ಸೆಗೆ ಭೃಂಗರಾಜ್ (ಎಕ್ಲಿಪ್ಟಾ ಆಲ್ಬಾ) ಅತ್ಯುತ್ತಮ ನೈಸರ್ಗಿಕ ಪರಿಹಾರವಾಗಿದೆ. ಇದು ಚಯಾಪಚಯವನ್ನು ಹೆಚ್ಚಿಸುತ್ತದೆ ಮತ್ತು ಕೂದಲಿನ ನೈಸರ್ಗಿಕ ಬಣ್ಣವನ್ನು ಪುನಃಸ್ಥಾಪಿಸುವ ಪ್ರಕ್ರಿಯೆಯನ್ನು ಪ್ರಾರಂಭಿಸುತ್ತದೆ. ಇದನ್ನು ಕೇಶರಂಜನ್ (ಕೂದಲಿಗೆ ಬಣ್ಣ ಮಾಡುವ ಏಜೆಂಟ್) ಎಂದೂ ಕರೆಯುತ್ತಾರೆ. ಬಣ್ಣವನ್ನು ಉಳಿಸಿಕೊಳ್ಳಲು, ಕೂದಲು ಉದುರುವಿಕೆಯನ್ನು ಕಡಿಮೆ ಮಾಡಲು ಮತ್ತು ಕೂದಲಿನ ಬೆಳವಣಿಗೆಯನ್ನು ಉತ್ತೇಜಿಸಲು ಭೃಂಗರಾಜ್ ಪುಡಿಯನ್ನು ಹೇರ್ ಪ್ಯಾಕ್‌ಗಳಲ್ಲಿ ಸೇರಿಸಬಹುದು.
6. ಪ್ರತಿದಿನ ಒಂದು ಆಮ್ಲಾ (ಭಾರತೀಯ ನೆಲ್ಲಿಕಾಯಿ) ಹಣ್ಣನ್ನು ತಿನ್ನುವುದು ಕೂದಲಿನ ಅಕಾಲಿಕ ಬಿಳಿ ಬಣ್ಣಕ್ಕೆ ಚಿಕಿತ್ಸೆ ನೀಡುವುದು ಮಾತ್ರವಲ್ಲದೇ, ಇದು ಚಯಾಪಚಯ ಕ್ರಿಯೆಯನ್ನು ಸರಿಪಡಿಸುತ್ತದೆ. ವಿಷವನ್ನು ನಿವಾರಿಸುತ್ತದೆ ಮತ್ತು ಅತ್ಯುತ್ತಮ ಪುನರ್ಯೌವನಗೊಳಿಸುವ ಔಷಧಿಗಳಲ್ಲಿ ಒಂದಾಗಿದೆ.
7. ತಾಜಾ ಆಮ್ಲಾ ರಸದೊಂದಿಗೆ ಸಂಸ್ಕರಿಸಿದ ತೆಂಗಿನ ಎಣ್ಣೆಯನ್ನು ನೆತ್ತಿಯ ಮಸಾಜ್‌ಗೆ ಬಳಸಬಹುದು ಅಥವಾ ಆಮ್ಲಾವನ್ನು ಒಳಗೊಂಡಿರುವ ವಿವಿಧ ಕೂದಲು ಎಣ್ಣೆಗಳನ್ನು ಬಳಸಬಹುದು. ಹೇರ್ ಮಾಸ್ಕ್ / ಹೇರ್ ಪ್ಯಾಕ್‌ಗಳಿಗೆ ಆಮ್ಲಾ ಪೌಡರ್ ಕೂಡ ಸೇರಿಸಬಹುದು.
8. ನೀವು ಪ್ರತಿದಿನ 30 ಮಿ.ಲೀ. ತಾಜಾ ಆಮ್ಲಾ ರಸವನ್ನು ಸಹ ಕುಡಿಯಬಹುದು.
9. ಕೂದಲನ್ನು ಅಕಾಲಿಕವಾಗಿ ಬಿಳಿ ಮಾಡಲು ಒತ್ತಡವು ಒಂದು ಪ್ರಮುಖ ಕಾರಣವಾಗಿದೆ. ಆದ್ದರಿಂದ, ಒತ್ತಡಕ್ಕೆ ಚಿಕಿತ್ಸೆ ನೀಡಲು ಬ್ರಾಹ್ಮಿ ಅತ್ಯುತ್ತಮ ಗಿಡಮೂಲಿಕೆಗಳಲ್ಲಿ ಒಂದಾಗಿದೆ. ಕೂದಲಿನ ಅಕಾಲಿಕ ಬಿಳಿ ಬಣ್ನವನ್ನು ನಿಲ್ಲಿಸಲು ಬ್ರಾಹ್ಮಿ ಉತ್ತಮವಾಗಿ ಸಹಾಯ ಮಾಡುತ್ತದೆ ಮತ್ತು ಒತ್ತಡದಿಂದ ಕಳೆದುಹೋದ ನೈಸರ್ಗಿಕ ಬಣ್ಣವನ್ನು ಪುನಃಸ್ಥಾಪಿಸಲು ಸಹಾಯ ಮಾಡುತ್ತದೆ. ಪಿತ್ತವನ್ನು ಸಮತೋಲನದಲ್ಲಿಡಲು ನಿಮ್ಮ ಕೂದಲು ಮತ್ತು ನೆತ್ತಿಯನ್ನು ಬ್ರಾಹ್ಮಿ ಎಣ್ಣೆಯಿಂದ ಮಸಾಜ್ ಮಾಡಿ ಅಥವಾ ಹೇರ್​ಮಾಸ್ಕ್​ಗೆ ಬ್ರಾಹ್ಮಿ ಪುಡಿಯನ್ನು ಸೇರಿಸಿ.
10. ಹೆನ್ನಾ ಅಪ್ಲಿಕೇಶನ್ ಅತ್ಯುತ್ತಮ ಚಿಕಿತ್ಸೆಯಾಗಿದೆ. ಹೇರ್ ಮಾಸ್ಕ್ ತಯಾರಿಸಲು ಹೆನ್ನಾವನ್ನು ಕಬ್ಬಿಣದ ಪಾತ್ರೆಗಳಲ್ಲಿ ರಾತ್ರಿಯಿಡೀ ನೆನೆಸಿ ಮತ್ತು ಅದರ ಗುಣಗಳನ್ನು ಹೆಚ್ಚಿಸಲು ಇತರ ಗಿಡಮೂಲಿಕೆಗಳನ್ನು ಸೇರಿಸಿ. ನಿಮ್ಮ ಕೂದಲನ್ನು ತೊಳೆಯುವ ಮೊದಲು ಸ್ವಲ್ಪ ಸಮಯದವರೆಗೆ ಇದನ್ನು ಹಚ್ಚಿರಿ.