ರಸ್ತೆ ಮಧ್ಯೆದಲ್ಲಿಯೇ ಕಳಚಿ ಬಿದ್ದ ಬಸ್​ ಟೈರ್: ಮುಂದೇನಾಯ್ತು?

ಚಲಿಸುತ್ತಿದ್ದ ಸರ್ಕಾರಿ ಬಸ್ಸಿನ ಹಿಂಬದಿ ಚಕ್ರದ ಒಂದು ಟೈರ್ ರಸ್ತೆ ಮಧ್ಯೆದಲ್ಲಿಯೇ ಕಳಚಿ ಬಿದ್ದ ಘಟನೆ ನಾಲತವಾಡದಲ್ಲಿ ನಡೆದಿದೆ.

ಮುದ್ದೇಬಿಹಾಳ(ವಿಜಯಪುರ):ಚಲಿಸುತ್ತಿದ್ದ ಸರ್ಕಾರಿ ಬಸ್ಸಿನ ಹಿಂಬದಿ ಚಕ್ರದ ಒಂದು ಟೈರ್ ರಸ್ತೆ ಮಧ್ಯೆಯೇ ಕಳಚಿ ಬಿದ್ದ ಘಟನೆ ತಾಲೂಕಿನ ನಾಲತವಾಡದಲ್ಲಿ ನಡೆದಿದೆ.

ಮುದ್ದೇಬಿಹಾಳ ಬಸ್ ಡಿಪೋಗೆ ಸೇರಿದ ಬಸ್ ನಂ KA28, F1951 ನಾಲತವಾಡ ಮಾರ್ಗವಾಗಿ ನಾರಾಯಣಪುರಕ್ಕೆ ತೆರಳುತ್ತಿತ್ತು. ಈ ವೇಳೆ ನಾಲತವಾಡ ಪಟ್ಟಣದ ಕೆಇಬಿ ಎದುರು ಟೈರ್ ಕಳಚಿ ಬಿದ್ದು 200 ಮೀಟರ್ ದೂರ ಉರುಳಿ ಹೋಗಿದೆ.

ಕೂಡಲೇ ಟೈರ್ ಕಳಚಿದ್ದನ್ನು ಗಮನಿಸಿದ ಬಸ್ ಚಾಲಕ ಬಸವರಾಜ್ ಅವರ ಸಮಯ ಪ್ರಜ್ಞೆಯಿಂದ ಭಾರೀ ಅನಾಹುತ ತಪ್ಪಿದೆ. ಬಸ್​ನಲ್ಲಿದ್ದ ಪ್ರಯಾಣಿಕರು ಪ್ರಾಣಾಪಾಯದಿಂದ ಬಚಾವ್ ಆಗಿದ್ದಾರೆ. ಇಳಿಜಾರಿನಲ್ಲಿ ಬಸ್ ಟೈರ್ ಕಳಚಿ ಬಿದ್ದರೂ ಸಿಂಗಲ್ ಟೈರ್​ ಮೇಲೆಯೇ ಬಸ್ಅನ್ನು ರಸ್ತೆಯ ಪಕ್ಕದಲ್ಲಿ ಚಾಲಕ ನಿಲುಗಡೆ ಮಾಡಿ ಸಂಭವನೀಯ ಅಪಘಾತ ತಪ್ಪಿಸಿದ್ದಾರೆ.