ಸೆಲ್ಫಿ ದುಸ್ಸಾಹಸ: ನಿಟ್ಟೆ ಅರ್ಬಿ ಫಾಲ್ಸ್​ನಿಂದ ಜಾರಿ ಬಿದ್ದ ಯುವಕ ಶವವಾಗಿ ಪತ್ತೆ

ಜಲಪಾತದ ಬಳಿ ಸೆಲ್ಫಿ ತೆಗೆಯಲು ಹೋಗಿ ಆಯತಪ್ಪಿ ಬಿದ್ದ ಯುವಕನೋರ್ವ ಶವವಾಗಿ ಪತ್ತೆಯಾದ ಘಟನೆ ಉಡುಪಿ ಜಿಲ್ಲೆ ನಿಟ್ಟೆ ಸಮೀಪದ ಅರ್ಬಿ ಫಾಲ್ಸ್​ನಲ್ಲಿ ನಡೆದಿದೆ.

ಉಡುಪಿ: ಸೆಲ್ಫಿ ತೆಗೆಯುವ ವೇಳೆ ಆಯತಪ್ಪಿ ಜಲಪಾತಕ್ಕೆ ಬಿದ್ದ ಯುವಕ ಶವವಾಗಿ ಪತ್ತೆಯಾದ ಘಟನೆ ಜಿಲ್ಲೆಯ ನಿಟ್ಟೆ ಸಮೀಪದ ಅರ್ಬಿ ಫಾಲ್ಸ್ ನಡೆದಿದೆ.

ನಂದಳಿಕೆ ಕುಂಟಲಗುಂಡಿ ನಿವಾಸಿ ಸುದೇಶ್ (18 ) ಮೃತ ಯುವಕ. ಸುದೇಶ್ ತನ್ನ ಸ್ನೇಹಿತರ ‌ಜತೆ ಸೇರಿ ನಿಟ್ಟೆ ಸಮೀಪದ ಅರ್ಬಿ ಫಾಲ್ಸ್​ಗೆ ಬಂದಿದ್ದ. ಜಲಪಾತದ ಬಳಿ ಸೆಲ್ಫಿ ತೆಗೆಯುವ ಭರಾಟೆಯಲ್ಲಿ ಸುದೇಶ್ ಹಾಗೂ ಆತನ ಗೆಳೆಯ‌ ಭರತ್ ಅಯತಪ್ಪಿ ನೀರಿಗೆ ಬಿದ್ದಿದ್ದರು‌. ಭರತ್ ಪ್ರಾಣಪಾಯದಿಂದ ಪಾರಾದರೆ, ಸುದೇಶ್ ನೀರಿನ ರಭಸಕ್ಕೆ ಕೊಚ್ಚಿ ಹೋಗಿದ್ದ.

ಹೆಚ್ಚಿನ ಓದಿಗಾಗಿ:

ಕೊಚ್ಚಿ ಹೋದ ಸುದೇಶ್​ಗಾಗಿ ಎಷ್ಟೇ ಹುಡುಕಿದರೂ ಪತ್ತೆಯಾಗಿರಲಿಲ್ಲ. ಈ ಹಿನ್ನಲೆ, ಪೊಲೀಸರು ಹಾಗೂ ಅಗ್ನಿಶಾಮಕ ಸಿಬ್ಬಂದಿ ಕಾರ್ಯಾಚರಣೆ ನಡೆಸಿ ಶವ ಪತ್ತೆ ಹಚ್ಚಿದ್ದಾರೆ.