ಹೋಟೆಲ್ ಹಾಗೂ ಮಿಲ್ಕ್ ಬೂತ್​​ ಒಳಗೆ ನುಗ್ಗಿದ ಖಾಸಗಿ ಬಸ್....​​ ಭಯಾನಕ ದೃಶ್ಯ ಸಿಸಿಟಿವಿಯಲ್ಲಿ ಸೆರೆ

ಚಾಲಕನ ನಿಯಂತ್ರಣ ತಪ್ಪಿ ಕಾರ್ಕಳದಿಂದ ಉಡುಪಿಗೆ ಬರುತ್ತಿದ್ದ ಖಾಸಗಿ ‌ಬಸ್​ ಹೋಟೆಲ್ ಹಾಗೂ ಮಿಲ್ಕ್ ಬೂತಿಗೆ‌ ನುಗ್ಗಿದೆ.

ಉಡುಪಿ: ಚಾಲಕನ ನಿಯಂತ್ರಣ ತಪ್ಪಿದ ಖಾಸಗಿ ‌ಬಸ್​​ ಹೋಟೆಲ್ ಹಾಗೂ ಮಿಲ್ಕ್ ಬೂತಿಗೆ‌ ಗುದ್ದಿದ ಘಟನೆ ನಗರದ ಕಡಿಯಾಳಿಯಲ್ಲಿ ನಡೆದಿದೆ.

ಕಾರ್ಕಳದಿಂದ ಉಡುಪಿಗೆ ಬರುತ್ತಿದ್ದ ಗಣೇಶ್ ಎಕ್ಸ್​ಪ್ರೆಸ್ ಬಸ್​​ ಕಡಿಯಾಳಿ ತಲುಪುತ್ತಿದ್ದಂತೆ ರಸ್ತೆಯಿಂದ ರಸ್ತೆ ಬದಿಯಲ್ಲಿದ್ದ ಮೀನು‌ ಹೋಟೆಲ್ ಹಾಗೂ ಮಿಲ್ಕ್ ಬೂತಿಗೆ ಗುದ್ದಿದೆ. ಘಟನೆಯಲ್ಲಿ ಮಿಲ್ಕ್ ಬೂತ್ ಹಾಗೂ ಹೋಟೆಲ್ ಸಿಬ್ಬಂದಿ ಅಲ್ಪಸ್ವಲ್ಪ ಗಾಯಗಳಿಂದ ಪಾರಾಗಿದ್ದಾರೆ. ಇನ್ನು ಹೋಟೆಲ್ ಹಾಗೂ ಮಿಲ್ಕ್ ಬೂತ್ ಬಳಿ ಗ್ರಾಹಕರಿಲ್ಲದ ಕಾರಣ ಅನಾಹುತ ತಪ್ಪಿದೆ.

ಬಸ್ ಬ್ರೇಕ್ ಫೇಲ್ ಆಗಿ ಈ‌ ಅವಘಡ ಸಂಭವಿಸಿದೆ ಎಂದು ಚಾಲಕ ಸಮಜಾಯಿಷಿ ನೀಡಿದ್ದಾನೆ. ಈ ಬಗ್ಗೆ ಉಡುಪಿ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಅಪಘಾತದ ದೃಶ್ಯಾವಳಿ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.