ಮೈಸೂರು:ಬಡತನವೆಂದು ಕುಗ್ಗದೆ, ಸ್ವಂತ ಉದ್ಯೋಗ ಮಾಡಬೇಕೆಂಬ ಹಂಬಲದಿಂದ ಎಲೆಕ್ಟ್ರಿಕ್ ಆಟೋ ಡ್ರೈವಿಂಗ್ ಕಲಿತು ಸಂಸಾರದ ನೊಗ ಹೊತ್ತಿರುವ ಮಹಿಳಾ ಆಟೋ ಚಾಲಕಿಯ ಯಶೋಗಾಥೆ ಇಲ್ಲಿದೆ...
ಮಹಿಳಾ ಆಟೋ ಚಾಲಕಿಯ ಸಾಹಸಗಾಥೆ
ಕುಟುಂಬದ ಕಲಹದಿಂದ ಮನನೊಂದಿದ್ದ ಗೀತಾ ಎಂಬ ಮಹಿಳೆ ಐದು ವರ್ಷಗಳ ಕಾಲ ಒಡನಾಡಿ ಸಂಸ್ಥೆಯಲ್ಲಿದ್ದರು. ನಂತರ ಮೂರು ವರ್ಷಗಳ ಕಾಲ ಪೊಲೀಸ್ ಇಲಾಖೆಯಲ್ಲಿ ಹೋಂಗಾಡ್೯ ಆಗಿ ಕೆಲಸ ಮಾಡುತ್ತಿದ್ದರು. ಅಲ್ಲಿ ಸರಿಯಾಗಿ ಸಂಬಳ ಸಿಗುತ್ತಿರಲಿಲ್ಲ, ಕೆಲ ದಿನಗಳಿಂದ ಹೋಂ ಗಾಡ್೯ ಕೆಲಸದಿಂದ ರಿಲೀವ್ ಮಾಡಿದರು.
ತಂದೆ-ತಾಯಿ ಜೊತೆ ಜೀವನ ಸಾಗಿಸುತ್ತಿರುವ ಗೀತಾಗೆ, ಒಂದರ ಮೇಲೆ ಒಂದು ಕಷ್ಟಗಳು ಆರಂಭವಾಗತೊಡಗಿದವು. ಒಡನಾಡಿ ಸಂಸ್ಥೆಯ ಬಳಿ ತನ್ನ ಕಷ್ಟಗಳನ್ನು ಹೇಳಿಕೊಂಡಾಗ, ಅವರು ಧೈರ್ಯ ತುಂಬಿ ಎಲೆಕ್ಟ್ರಿಕ್ ಆಟೋವನ್ನು ಲೋನ್ ಮೇಲೆ ಕೊಡಿಸಿದ್ದಾರೆ. ಸ್ಕೂಟರ್ ಓಡಿಸಿ ಅಭ್ಯಾಸ ಮಾಡಿಕೊಂಡಿದ್ದ ಗೀತಾ, ಒಂದು ವಾರದಲ್ಲಿಯೇ ಆಟೋ ಚಾಲನೆ ಮಾಡುವುದನ್ನು ಕಲಿತುಕೊಂಡು ವೃತ್ತಿಪರ ಆಟೋ ಚಾಲಕರಿಗಿಂತ ಕಮ್ಮಿ ಇಲ್ಲವೆಂಬಂತೆ ಆಟೋ ಓಡಿಸುತ್ತಿದ್ದಾರೆ.