ಪಾರ್ಕಿಂಗ್​ಗೋಸ್ಕರ ದೇವರಾಜ ಮಾರುಕಟ್ಟೆ ಒಡೆಯುವುದು ಸರಿಯಲ್ಲ: ಪ್ರಮೋದಾ ದೇವಿ ಒಡೆಯರ್​

ದೇವರಾಜ ಮಾರುಕಟ್ಟೆ ಉಳಿಸಿಕೊಳ್ಳಲು ಪ್ರಯತ್ನಿಸಬೇಕು ಎಂದು ರಾಜ ವಂಶಸ್ಥೆ ಪ್ರಮೋದಾದೇವಿ ಒಡೆಯರ್ ಹೇಳಿದ್ದಾರೆ.

ಮೈಸೂರು: ಆಧುನಿಕ ಮಾಲ್​ಗಳಿಗೆ ದೇವರಾಜ ಮಾರುಕಟ್ಟೆ ಸ್ಪೂರ್ತಿಯಾಗಿದ್ದು, ಇಂತಹ ಮಾರುಕಟ್ಟೆಯನ್ನು ಉಳಿಸಿಕೊಳ್ಳಲು ಪ್ರಯತ್ನಿಸಬೇಕು ಎಂದು ರಾಜ ವಂಶಸ್ಥೆ ಪ್ರಮೋದಾದೇವಿ ಒಡೆಯರ್ ಹೇಳಿದ್ದಾರೆ.
ನಗರದ ಖಾಸಗಿ ಹೋಟೆಲ್​ನಲ್ಲಿ ನಡೆದ ಕೆಪಿಎಲ್ ಮೈಸೂರು ಆವೃತ್ತಿಯ ಕಪ್ ಅನಾವರಣದ ನಂತರ ಮಾತನಾಡಿದ ಅವರು, ದೇವರಾಜ ಮಾರುಕಟ್ಟೆಯ ಬಗ್ಗೆ ಹಲವಾರು ಮಾತುಗಳು ಕೇಳಿಬರುತ್ತಿದೆ. ಇದೊಂದು ಪಾರಂಪರಿಕ ಕಟ್ಟಡವಾಗಿದ್ದು ಇದನ್ನು ಪಾರ್ಕಿಂಗ್​ಗೋಸ್ಕರ ಶಿಥಿಲಗೊಂಡಿದೆ ಎಂದು ಒಡೆದು ಹಾಕುವುದು ಸರಿಯಲ್ಲ ಎಂಬುದು ನನ್ನ ವೈಯಕ್ತಿಕ ಅಭಿಪ್ರಾಯ. ಇದನ್ನು ದುರಸ್ತಿಗೊಳಿಸಿ ಪಾರ್ಕಿಂಗ್​ ಅನ್ನು ಬೇರೆ ಕಡೆ ಸ್ಥಳಾಂತರಿಸಿದರೆ ಎಲ್ಲವೂ ಸರಿ ಹೋಗುತ್ತದೆ. ಈಗ ಇರುವ ಎಲ್ಲಾ ಮಾಲ್​ಗಳಿಗೂ ಮೂಲ ವಿನ್ಯಾಸ ಎಂದರೆ ದೇವರಾಜ ಮಾರುಕಟ್ಟೆ ಎಂದರು.

ಅಂದಿನ ಕಾಲದ ಅಗತ್ಯಕ್ಕೆ ತಕ್ಕಂತೆ ಇದನ್ನು ನಿರ್ಮಿಸಲಾಗಿದ್ದು, ಇಲ್ಲಿ ಪ್ರತಿಯೊಬ್ಬರಿಗೂ ಎಲ್ಲಾ ವಸ್ತುಗಳು ದೊರೆಯುತ್ತವೆ ಆದ್ದರಿಂದ ದೇವರಾಜ ಮಾರುಕಟ್ಟೆ ಆಧುನಿಕ ಮಾಲ್​ಗಳಿಗೆ ಮೂಲ ಎನ್ನಬಹುದು. ಈ ಬಾರಿ ದಸರಾವನ್ನು ಸರಳವಾಗಿ ಆಚರಿಸುತ್ತಾರೆ ಎಂಬ ಬಗ್ಗೆ ನಾನು ಪ್ರತಿಕ್ರಿಯೆ ನೀಡುವುದಿಲ್ಲ. ಈಗಾಗಲೇ ಆನೆಗಳು ನಗರಕ್ಕೆ ಆಗಮಿಸಿದ್ದು, ದಸರಾ ಸರಳ ಅಥವಾ ಅದ್ದೂರಿಯಾಗಿ ನಡೆಯುತ್ತದೆಯೋ ಎಂಬ ಬಗ್ಗೆ ನನಗೆ ಮಾಹಿತಿ ಇಲ್ಲ. ಈ ಬಗ್ಗೆ ಸರ್ಕಾರ ಸಲಹೆ ಕೇಳಿದರೆ ಮಾತ್ರ ಕೊಡುತ್ತೇವೆ ಎಂದು ಪ್ರಮೋದಾದೇವಿ ತಿಳಿಸಿದ್ದಾರೆ.