ಹಾವೇರಿ:ಶಿವಮೊಗ್ಗ ಜಿಲ್ಲೆಯ ಸೊರಬ ತಾಲೂಕಿನ ಗುಡವಿ ಗ್ರಾಮದ ಶೃತಿ(ಹೆಸರನ್ನು ಬದಲಿಸಲಾಗಿದೆ) ತನಗೆ ವಂಚಿಸಿದ್ದಾಳೆ ಎಂದು ಆರೋಪಿಸಿ ಹಾವೇರಿ ಜಿಲ್ಲೆ ರಟ್ಟಿಹಳ್ಳಿಯ ಶಿವಾನಂದ ಹಳ್ಳೇರ ಆರೋಪಿಸಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ಪರಿಚಯವಾಗಿದ್ದ ಶೃತಿ ತನ್ನನ್ನು ಮದುವೆಯಾದಂತೆ ನಟಿಸಿ ಸುಮಾರು 8 ಲಕ್ಷ ರೂಪಾಯಿ ಲಪಟಾಯಿಸಿದ್ದಾಳೆ ಎಂದು ಶಿವಾನಂದ ಆರೋಪಿಸಿದ್ದಾರೆ. ಅಂತರ್ಜಾಲದಲ್ಲಿ ಸಿಕ್ಕಿದ್ದ ಶೃತಿ ದಾವಣಗೆರೆ ಜಿಲ್ಲೆಯ ಉಕ್ಕಡಗಾತ್ರಿಯ ಕರಿಬಸವೇಶ್ವರ ದೇವರ ಮುಂದೆ ಮದುವೆಯಾಗಿದ್ದಳಂತೆ. ನಂತರ ರಟ್ಟಿಹಳ್ಳಿಯಲ್ಲಿ ಪ್ರತ್ಯೇಕ ಮನೆ ಮಾಡಿ ತನ್ನ ನೋವು ಹೇಳಿಕೊಂಡಿದ್ದರಿಂದ ಅವಳಿಗೆ 8 ಲಕ್ಷ ರೂಪಾಯಿ ನೀಡಿದ್ದೆ. ಆರಂಭದಲ್ಲಿ ವಾಪಸ್ ನೀಡುವುದಾಗಿ ತಿಳಿಸಿದ್ದ ಶೃತಿ ಇದೀಗ ಬೇರೆ ರೀತಿಯ ಉತ್ತರ ನೀಡುತ್ತಿದ್ದಾಳೆ ಎಂದು ಶಿವಾನಂದ ದೂರಿದ್ದಾರೆ.
ಹಣ ಕೇಳುತ್ತಿದ್ದಂತೆ ನಿನ್ನ ಜೊತೆ ಮದುವೆಯಾಗಿರುವುದು ಇಷ್ಟವಿಲ್ಲ. ಹಾಗಾಗಿ ಇನ್ನೊಂದು ಮದುವೆಯಾಗಿದ್ದೇನೆ ಎಂದು ತಿಳಿಸಿದ್ದಾಳಂತೆ. ಈ ಕುರಿತಂತೆ ರಟ್ಟಿಹಳ್ಳಿ ಪೊಲೀಸರಿಗೆ ದೂರು ನೀಡಿದರೇ ಅವರು ಸಹ ಸರಿಯಾಗಿ ಸ್ಪಂದಿಸುತ್ತಿಲ್ಲ ಎಂದು ಶಿವಾನಂದ ಆರೋಪಿಸಿದ್ದಾರೆ.
ಗಂಡನಿಂದ 8 ಲಕ್ಷ ಲಪಟಾಯಿಸಿ ಪರಾರಿಯಾದ ಹೆಂಡತಿ ಶೃತಿ ಇದೇ ರೀತಿ ಹಲವರಿಗೆ ಮೋಸ ಮಾಡಿದ್ದಾಳೆ ಎನ್ನಲಾಗ್ತಿದೆ. ಆಕೆ ರಾಜಕೀಯದಲ್ಲಿದ್ದು, ಹಲವು ಗಣ್ಯನಾಯಕರ ಜೊತೆ ಫೋಟೊ ಸಹ ತೆಗೆಸಿಕೊಂಡಿದ್ದಾಳೆ. ಇವಳಿಂದ ತನಗೆ ಅನ್ಯಾಯವಾಗಿದ್ದು, ರಟ್ಟಿಹಳ್ಳಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದೇನೆ. ನನ್ನ ರೀತಿ ಮತ್ತೆ ಬೇರೆ ಯಾರು ಮೋಸ ಹೋಗಬಾರದು ಮತ್ತು ತನಗೆ ನ್ಯಾಯ ಬೇಕೆಂದು ಶಿವಾನಂದ ಆಗ್ರಹಿಸಿದ್ದಾರೆ. ಇತ್ತ ಮಹಿಳೆಯ ಪ್ರತಿಕ್ರಿಯೆ ಕೇಳಲು ಕರೆ ಮಾಡಿದರೆ ಆಕೆ ನೀಡಿದ ಮೊಬೈಲ್ ನಂಬರಗಳು ಸ್ವಿಚ್ ಆಫ್ ಆಗಿವೆ.
