ಬಿಟ್ಟ ಹೋಗ್​ ಬೇಡಾ ನನ್ನ..! ವಿರಹ ವೇದನೆಗೆ ಕೈಮೇಲಿನ ಹಚ್ಚೆ ಕೊಯ್ದುಕೊಂಡ ಯುವಕ..

ಇಬ್ಬರು ಮದುವೆಯಾದ ವಿಚಾರ ತಿಳಿದ ಯುವತಿ ಮನೆಯವರು, ಪೊಲೀಸ್ ಠಾಣೆಯಲ್ಲಿ ಮಿಸ್ಸಿಂಗ್​ ಕಂಪ್ಲೇಂಟ್ ದಾಖಲಿಸಿದ್ದಾರೆ. ಪೊಲೀಸ್ ಠಾಣೆಯಿಂದ ಮನೆಗೆ ಹೋಗುತ್ತೇನೆ ಎಂದು ಹೇಳಿ ಯುವತಿ ಅಜಯ್​ನನ್ನು ಬಿಟ್ಟು ತೆರಳಿದ್ದಾಳೆ. ಆಕೆ ಇಲ್ಲದೇ ನಾನು ಬದುಕುವುದಿಲ್ಲ. ನನಗೆ ನನ್ನ ಹೆಂಡತಿ ಬೇಕು ಎಂದು ಸಂಕಟ ಪಡುತ್ತಿದ್ದಾನೆ ಅಜಯ್​.

ಹಾಸನ: ಪ್ರೀತಿ ಒಂದು ಮಾಯೆ. ಈ ಮಾಯೆಯ ಬಲೆಯೊಳಗೆ ಬಿದ್ದ ಅದೆಷ್ಟೋ ಜೀವಗಳು ತಮ್ಮ ಜೀವನವನ್ನೇ ಹಾಳು ಮಾಡಿಕೊಂಡ ಉದಾಹರಣೆಗಳಿವೆ. ಒಂದೊಮ್ಮೆ ನೀನೆ ನನ್ನ ಜಗತ್ತು ಎಂದವಳು ಬಿಟ್ಟು ಹೋದಾಗ ಪ್ರಿಯತಮನ ಸ್ಥಿತಿ ದಿಕ್ಕು ತೋಚದಂತಾಗುತ್ತದೆ.

ಅವರಿಬ್ಬರು 5 ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದ ಪ್ರೇಮಿಗಳು. ಆದರೆ, ಮನೆಯವರ ಒಪ್ಪಿಗೆ ಸಿಗದಿದ್ದಾಗ, ಕುಟುಂಬದ ವಿರುದ್ಧವಾಗಿಯೇ ಅಜಯ್​ ಮತ್ತು ಆತನ ಪ್ರಿಯತಮೆ ವಿವಾಹ ಜೀವನಕ್ಕೆ ಕಾಲಿಟ್ಟಿದ್ದರು. ಮದುವೆಯಾಗಿ ವಾರವೂ ಕಳೆದಿರಲಿಲ್ಲ. ಮನ ಮೆಚ್ಚಿದ ಮಡದಿ ತನ್ನ ಹೆತ್ತವರ ಕಣ್ಣೀರಿಗೆ ಕರಗಿ ಗಂಡನನ್ನು ತೊರೆದಿದ್ದಾಳೆ. ಪ್ರಿಯತಮೆಯನ್ನು ಕಳೆದುಕೊಂಡ ವಿರಹ ವೇದನೆ ಪ್ರಿಯತಮನನ್ನು ಚುಚ್ಚಿ ಕೊಲ್ಲುತ್ತಿದೆ. ತನ್ನವಳನ್ನು ತನಗೆ ಮರಳಿ ಕೊಡಿಸುವಂತೆ ಯುವಕ ಗೋಗರೆಯುತ್ತಿದ್ದಾನೆ. ಹಾಸನ ಜಿಲ್ಲೆಯ ಅರಸಿಕೆರೆ ತಾಲೂಕಿನ ಹಾರನಹಳ್ಳಿ ತಾಂಡಾ ನಿವಾಸಿಯಾಗಿರುವ ಅಜಯ್​, ಸದ್ಯ ಫ್ಲವರ್ ಡೆಕೋರೇಟರ್ ಕೆಲಸ ಮಾಡಿಕೊಂಡಿದ್ದಾನೆ.

50 ಸಾವಿರ ದಂಡ ಕಟ್ಟಿ ಮದುವೆಯಾಗಿದ್ದರು :

ತಾಂಡಾಗಳಲ್ಲಿ ವಾಸಿಸುವ ಲಂಬಾಣಿ ಜನಾಂಗದವರು ತಮ್ಮ ಜಾತಿಯವರನ್ನಲ್ಲದೇ ಬೇರೆಯವರನ್ನ ಮದುವೆಯಾಗುವಂತಿಲ್ಲ. ಹಾಗೇನಾದ್ರೂ ಮದುವೆಯಾಗಿ ಬಂದ್ರೆ ಊರಿನ ಪಂಚಾಯತ್‌ಗೆ 50 ಸಾವಿರ ರೂ. ದಂಡ ಕಟ್ಟಬೇಕು. ಹಾಗಾಗಿ ಅಜಯ್ ಮನೆಯವರು ಊರಿನ ಪಂಚಾಯತ್‌ಗೆ 50 ಸಾವಿರ ರೂ. ದಂಡ ಕಟ್ಟಿ ಗ್ರಾಮಸ್ಥರ ಸಮ್ಮುಖದಲ್ಲಿಯೇ ಮದುವೆಯಾಗಿದ್ದರು.

ಒಪ್ಪಿಕೊಂಡವಳು ಕೈಕೊಟ್ಟು ಹೋದಳು :

ಇಬ್ಬರು ಮದುವೆಯಾದ ವಿಚಾರ ತಿಳಿದ ಯುವತಿ ಮನೆಯವರು, ಪೊಲೀಸ್ ಠಾಣೆಯಲ್ಲಿ ಮಿಸ್ಸಿಂಗ್​ ಕಂಪ್ಲೇಂಟ್ ದಾಖಲಿಸಿದ್ದಾರೆ. ಪೊಲೀಸ್ ಠಾಣೆಯಿಂದ ಮನೆಗೆ ಹೋಗುತ್ತೇನೆ ಎಂದು ಹೇಳಿ ಯುವತಿ ಅಜಯ್​ನನ್ನು ಬಿಟ್ಟು ತೆರಳಿದ್ದಾಳೆ. ಆಕೆ ಇಲ್ಲದೇ ನಾನು ಬದುಕುವುದಿಲ್ಲ. ನನಗೆ ನನ್ನ ಹೆಂಡತಿ ಬೇಕು ಎಂದು ಸಂಕಟ ಪಡುತ್ತಿದ್ದಾನೆ ಅಜಯ್​.

ಈ ಸಂಬಂಧ ಅಜಯ್ ಕೂಡ ಅರಸಿಕೆರೆ ಮತ್ತು ಹಾಸನ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳಿಗೆ ದೂರು ನೀಡಿದ್ದಾನೆ. ಮನವಿಗೆ ಸ್ಪಂದಿಸಿದ ಎಸ್ಪಿ ಸಹ ಮತ್ತೊಮ್ಮೆ ಯುವತಿಯನ್ನು ಠಾಣೆಗೆ ಕರೆಸಿ ವಿಚಾರಿಸಿ ನ್ಯಾಯ ದೊರಕಿಸಿಕೊಡುವ ಭರವಸೆಯನ್ನ ನೀಡಿದ್ದಾರೆ.

ಕೈ ಕೊಯ್ದುಕೊಂಡು ಆಸ್ಪತ್ರೆಗೆ ದಾಖಲು :

ಆದರೆ, ನೊಂದ ಯುವಕ ತನ್ನ ಕೈಮೇಲೆ ಹಾಕಿಕೊಂಡಿದ್ದ ಆಕೆಯ ಹೆಸರಿನ ಹಚ್ಚೆ ಮೇಲೆ ಚಾಕುವಿನಿಂದ ಕುಯ್ದುಕೊಂಡು ಆಸ್ಪತ್ರೆಗೆ ದಾಖಲಾಗಿದ್ದಾನೆ.