ನೀರಿನಲ್ಲಿ ಸರ್ವಾಂಗಾಸನ, ಕಾಲಿಂದಲೇ ಬಿಡ್ತಾರೆ ಬಾಣ.. ಹಾಸನದಲ್ಲೋರ್ವ ವಿಶಿಷ್ಟ ಯೋಗಪಟು

ಯೋಗಾಸನ ಅಂದ್ರೆ ದೇಹ ಮತ್ತು ಮನಸ್ಸನ್ನು ಸುಸ್ಥಿತಿಯಲ್ಲಿಡುವ ಪ್ರಕ್ರಿಯೆ. ಇದರಲ್ಲಿ ಹಲವು ಭಂಗಿಗಳಿವೆ. ಆದರೆ ಇಲ್ಲೊಬ್ಬರು ವಿಭಿನ್ನ ಎಂಬಂತೆ ಯೋಗ ಮಾಡುವ ಮೂಲಕ ನೋಡುಗರನ್ನು ನಿಬ್ಬೆರಗಾಗಿಸಿದ್ದಾರೆ. ಇವರು ನೀರಿನ ಒಳಗೆ ತಲೆಕೆಳಗಾಗಿ ನಿಂತು ಯೋಗ ಮಾಡುವ ಅದ್ಭುತ ಯೋಗಪಟುವಾಗಿದ್ದಾರೆ. ಅಷ್ಟೇ ಅಲ್ಲ, ತಲೆಕೆಳಗಾದ ಬಳಿಕ ತಮ್ಮ ಕಾಲುಗಳಿಂದ ಬಿಲ್ಲು ಬಾಣ ಸಹ ಬಿಡುತ್ತಾರೆ.

ಹಾಸನ: ಮಂಜುನಾಥ್​ ವೃತ್ತಿಯಲ್ಲಿ ವಕೀಲರಾಗಿದ್ದು, ಪ್ರವೃತ್ತಿಯಲ್ಲಿ ಯೋಗಪಟುವಾಗಿದ್ದಾರೆ. ಇವರು ಕಳೆದ ಒಂದೂವರೆ ವರ್ಷದಿಂದ ಈ ಒಂದು ಸರ್ವಾಂಗಾಸನವನ್ನು ಮಾಡಲು ಪ್ರಯತ್ನಿಸಿದ್ದು, ಕೊನೆಗೂ ಛಲಬಿಡದೆ ಅದ್ಭುತ ಸಾಧನೆಗೈದಿದ್ದಾರೆ. 30 ಸೆಕೆಂಡ್​​ನಿಂದ ಮೂರು ನಿಮಿಷಗಳ ತನಕ ನೀರಿನಲ್ಲಿಯೇ ಉಸಿರನ್ನ ಬಿಗಿದಿಟ್ಟುಕೊಂಡು ಸರ್ವಾಂಗಾಸನ ಮೂಲಕ ಎಲ್ಲರೂ ಬೆರಗಾಗುವಂತೆ ಮಾಡಿದ್ದಾರೆ. ಅಷ್ಟೇ ಅಲ್ಲದೇ, ಕಾಲುಗಳಿಂದ ಬಾಣವನ್ನು ಸಹ ಬಿಡುತ್ತಾರೆ.

ಮಂಜುನಾಥ್​ ಹಾಸನ ಜಿಲ್ಲೆಯ ಹೊಳೆನರಸಿಪುರ ತಾಲೂಕಿನ ಹಳ್ಳಿ ಮೈಸೂರಿನವರು. ಈ ಒಂದು ಸರ್ವಾಂಗಾಸನವನ್ನು ಅವರು ಪ್ರತಿನಿತ್ಯ ಆರು ಗಂಟೆಗೆ ಎದ್ದು ರಾಮನಾಥಪುರದ ಕಾವೇರಿ ನದಿಯ ಜಪದ ಕಟ್ಟೆಯ ಬಳಿ ಅಭ್ಯಾಸ ಮಾಡುತ್ತಿದ್ದರು. ಎಂಟನೇ ವಿಶ್ವ ಯೋಗ ದಿನದ ಅಂಗವಾಗಿ ಮತ್ತು ನರೇಂದ್ರ ಮೋದಿ ಅವರ ಕರ್ನಾಟಕ ಪ್ರವಾಸದ ಹಿನ್ನೆಲೆ ಇಂದು ಸರ್ವಾಂಗಾಸನ ಮಾಡುವ ಮೂಲಕ ಹೊಸದೊಂದು ಮುನ್ನುಡಿ ಬರೆದಿದ್ದಾರೆ. ಈ ಯೋಗಾಸನವನ್ನು ಪ್ರಧಾನಿ ನರೇಂದ್ರ ಮೋದಿಯವರಿಗೆ ಅರ್ಪಣೆ ಮಾಡುತ್ತೇನೆ ಎಂದು ಅವರು ಹೇಳುತ್ತಾರೆ.

ವಿಶಿಷ್ಟವಾಗಿ ಯೋಗಾಸನ ಮಾಡಿ ಎಲ್ಲರ ಗಮನಸೆಳೆದ ಹಾಸನ ವ್ಯಕ್ತಿ

ನಾನು ಆರ್​ಎಸ್​ಎಸ್ ಸಂಘಪರಿವಾರದಿಂದ ಬೆಳೆದುಬಂದವ. ವಿಶ್ವ ಯೋಗ ದಿನವನ್ನ ಪ್ರಧಾನಿ ಮೋದಿಯವರು ಆಚರಣೆಗೆ ತಂದ ಬಳಿಕ ಅದರಿಂದ ಪ್ರೇರಿತನಾದ ನಾನು ಪ್ರತಿನಿತ್ಯ ಯೋಗ ಮಾಡುತ್ತಿದ್ದೆ. ಆರ್​ಎಸ್​ಎಸ್​​ನಿಂದ ನಾನು ಈ ರೀತಿಯ ಸಾಹಸ ಪ್ರಕ್ರಿಯೆಗಳಿಗೆ ಒಳಗಾಗಿದ್ದು, ಇದರ ಜೊತೆಗೆ ನಮ್ಮ ತಂದೆ ಹಾಗೂ ನಮ್ಮ ತಾತ ದೇಹವನ್ನು ಸದೃಢವಾಗಿ ಇಟ್ಟುಕೊಳ್ಳಲು ಹಲವು ರೀತಿಯ ಯೋಗವನ್ನು ಮಾಡುತ್ತಿದ್ದರು. ಇದರಿಂದ ನಾನು ಸಹ ಪ್ರೇರಿತನಾಗಿ, ಈ ಒಂದು ಸಾಹಸ ಮಾಡಲು ಸಾಧ್ಯವಾಗಿದೆ. ಪ್ರತಿದಿನ ನಾನು ಎರಡೂವರೆಯಿಂದ ಮೂರುವರೆ ನಿಮಿಷಗಳ ಕಾಲ ಈ ರೀತಿ ಸರ್ವಾಂಗಾಸನ ಅಭ್ಯಾಸ ಮಾಡುತ್ತಿದ್ದು, ಈಗ ನಿರರ್ಗಳವಾಗಿ ನೀರಿನ ಒಳಗಡೆ ತಲೆಕೆಳಗಾಗಿ ಯೋಗಾಸನ ಮಾಡುತ್ತಿದ್ದೇನೆ ಅಂತಾರೆ ಮಂಜುನಾಥ್.

ಇದನ್ನೂ ಓದಿ:ಪ್ರಧಾನಿ ಜೊತೆ ಯೋಗ ಮಾಡಿದ್ದು ಜೀವನದಲ್ಲಿ ಮರೆಯಲು ಸಾಧ್ಯವಿಲ್ಲ: ಯೋಗಪಟು