ಆಭರಣ ಖರೀದಿಸಿ ಹಿಂತಿರುವಾಗ ಹುಷಾರು... ಮಂಗಳೂರಿನಲ್ಲಿ ಅರೆಸ್ಟ್​​​​ ಆದ ಆರೋಪಿಗಳ ಸ್ಟೋರಿ ಓದಿ

ಚಿನ್ನಾಭರಣ ಖರೀದಿಸಿ ಅಂಗಡಿಗಳಿಂದ ಹೊರಬರುವ ಜನರನ್ನು ಟಾರ್ಗೆಟ್‌ ಮೂಡುವ ಗುಂಪು ಹಲ್ಲೆ ನಡೆಸಿ ನಗ ನಾಣ್ಯ ದೋಚುತ್ತಿತ್ತು. ಈ ಮೂಲಕ ವಿಲಾಸಿ ಜೀವನ ನಡೆಸುತ್ತಿದ್ದ 6 ಜನ ಆರೋಪಿಗಳನ್ನು ಮಂಗಳೂರು ಪೊಲೀಸರು ಬಂಧಿಸಿದ್ದಾರೆ.

ಮಂಗಳೂರು: ಕಾರು ಮತ್ತು ಬೈಕ್​ಗಳಲ್ಲಿ ಆಭರಣಗಳ ಅಂಗಡಿಗಳಿಗೆ ಬಂದು ಚಿನ್ನ ಖರೀದಿಸಿ ಹೊರಬರುವ ಗ್ರಾಹಕರನ್ನು ಅಡ್ಡಗಟ್ಟಿ ಬೆದರಿಸಿ ಸುಲಿಗೆ ಮಾಡುವ ಆರು ಮಂದಿ ಆರೋಪಿಗಳನ್ನು ಪೊಲೀಸರು ಅರೆಸ್ಟ್ ಮಾಡಿದ್ದಾರೆ.

ಕಾರ್‌ಸ್ಟ್ರೀಟ್‌ನ ಬಿಇಎಂ ಹೈಸ್ಕೂಲ್ ಸಮೀಪ ಕೃತ್ಯ ಎಸಗಲು ಹೊಂಚು ಹಾಕುತ್ತಿದ್ದ ವೇಳೆ ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಪುತ್ತೂರು ತಾಲ್ಲೂಕಿನ ಉಪ್ಪಿನಂಗಡಿ ಗ್ರಾಮದ ಅಬ್ದುಲ್ ಮಜೀದ್ ಹೆಚ್(32), ಬಂಟ್ವಾಳ ತಾಲೂಕಿನ ಪುದು ಗ್ರಾಮದ ಸೈಯದ್ ಅಲಿಯಾಸ್ ಮೊಹಮ್ಮದ್‌ ಮೋನು(31),ಕೆದಿಲ ಗ್ರಾಮದ ಮೊಹಮ್ಮದ್ ಶಾಫಿ ಅಲಿಯಾಸ್ ಶಾಫಿ(24), ಕೂಲ್ನಾಡು ಗ್ರಾಮದ ಆಸೀಫ್ ಕೆ.(25), ಪೆರಾಜೆ ಗ್ರಾಮದ ಮೊಹಮ್ಮದ್ ನಾಸೀರ್(20),ಅಹಮ್ಮದ್ ಬಶೀರ್ ಅಲಿಯಾಸ್ ಬಶೀರ್(29), ಮನ್ಸೂರ್ ಅಲಿ ಅಲಿಯಾಸ್ ಮನ್ಸೂರ್ (30) ಬಂಧಿತ ಆರೋಪಿಗಳಾಗಿದ್ದಾರೆ.

ಆರೋಪಿಗಳಿಂದ ಕೃತ್ಯಕ್ಕೆ ಬಳಸಿದ ಮಾರುತಿ ಸ್ವಿಫ್ಟ್, ಮಾರುತಿ ರಿಡ್ಜ್, ಮಾರುತಿ ಸೆಲೆರಿಯೋ, ಟೋಯೋಟಾ ಗ್ಲಾಂಜಾ, ಬಜಾಜ್‌ ಕಂಪನಿಯ ಬೈಕ್, 5,12,000 ರೂ. ನಗದು ಮತ್ತು 140 ಗ್ರಾಂ ಚಿನ್ನ ಸಹಿತ ಸುಮಾರು 25 ಲಕ್ಷ ರೂ.ಗೂ ಅಧಿಕ ಮೌಲ್ಯದ ಸೊತ್ತನ್ನು ಸ್ವಾಧೀನ ಪಡಿಸಿಕೊಳ್ಳಲಾಗಿದೆ.

ಬಂಧಿತ ಆರೋಪಿಗಳನ್ನು ಪೊಲೀಸರು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ಇನ್ನುಳಿದವರಿಗಾಗಿ ಬಲೆ ಬೀಸಿದ್ದಾರೆ.