ಮಂಗಳೂರು:ರಾಹುಲ್ ಗಾಂಧಿ ಪಿಎ ಹೆಸರಿನಲ್ಲಿ ವಿಧಾನಸಭೆ ವಿರೋಧ ಪಕ್ಷದ ಉಪನಾಯಕ ಯು ಟಿ ಖಾದರ್ ಅವರಿಗೆ ಇಂದು ನಕಲಿ ಕರೆ ಬಂದಿದೆ. ಈ ಬಗ್ಗೆ ಯು ಟಿ ಖಾದರ್ ಅವರು ತನಿಖೆ ನಡೆಸುವಂತೆ ಮಂಗಳೂರು ನಗರ ಪೊಲೀಸ್ ಕಮೀಷನರ್ ಅವರಿಗೆ ದೂರು ನೀಡಿದ್ದಾರೆ.
ಯು ಟಿ ಖಾದರ್ ಅವರ ಮೊಬೈಲ್ ಸಂಖ್ಯೆಗೆ ಸೋಮವಾರ ಮಧ್ಯಾಹ್ನ 1.33 ರ ಸಮಯದಲ್ಲಿ ನಕಲಿ ಕರೆ ಬಂದಿತ್ತು. ಖಾದರ್ ಅವರು ಸಭೆಯೊಂದರಲ್ಲಿ ಭಾಗವಹಿಸಿದ್ದ ಕಾರಣ ಕರೆ ಸ್ವೀಕರಿಸಿರಲಿಲ್ಲ. ಸಭೆ ಮುಗಿಸಿ ಮೊಬೈಲ್ ನೋಡುವಾಗ ಇದೇ ಸಂಖ್ಯೆಯಿಂದ ಸಂದೇಶವೊಂದು ಬಂದಿತ್ತು. ‘‘ಶುಭ ಮಧ್ಯಾಹ್ನ ಈ ಕಡೆಯಿಂದ ಕನಿಷ್ಕ ಸಿಂಗ್, ಶ್ರೀ ರಾಹುಲ್ ಗಾಂಧಿ ಜೀ ಪಿಎ ನನಗೆ ಕರೆ ಮಾಡಿ’’ ಎಂದು ಸಂದೇಶದಲ್ಲಿ ಬರೆದಿತ್ತು.
ಟ್ರುಕಾಲರ್ ಮೂಲಕ ಪರಿಶೀಲಿಸಿದಾಗ ಈ ಮೊಬೈಲ್ ಸಂಖ್ಯೆ ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಕೆ.ಸಿ.ವೇಣುಗೋಪಾಲ್ ಹೆಸರಲ್ಲಿ ಸೇವ್ ಮಾಡಲಾಗಿರುವುದು ತಿಳಿದು ಬಂದಿದೆ. ಬಳಿಕ ಈ ಕುರಿತು ಮಾಹಿತಿ ಕಲೆ ಹಾಕಿದಾಗ ಇದು ನಕಲಿ ಹೆಸರಲ್ಲಿ ಬಂದ ಕರೆ ಎಂದು ಮನವರಿಕೆಯಾಗಿದೆ.
ಕೂಡಲೇ ಮಂಗಳೂರು ನಗರ ಪೊಲೀಸ್ ಕಮೀಷನರ್ ಅವರಿಗೆ ದೂರು ನೀಡಿ ಈ ಕುರಿತು ತನಿಖೆ ನಡೆಸಿ ಕರೆ ಮಾಡಿದವರು ಯಾರು ಮತ್ತು ಯಾಕಾಗಿ ಎಂದು ತಿಳಿಯುವುದರ ಜತೆಗೆ ಈ ಕುರಿತು ಸೂಕ್ತ ತನಿಖೆ ನಡೆಸಿ ಕಾನೂನು ಕ್ರಮಗಳನ್ನು ಕೈಗೊಳ್ಳುವಂತೆ ವಿನಂತಿಸಿದ್ದಾರೆ. ಈ ಬಗ್ಗೆ ನಗರದ ಸೈಬರ್ ಕ್ರೈಮ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ:ಚಿನ್ನ, ದುಡ್ಡಲ್ಲ.. 40 ಕೆಜಿ ತೂಕದ 24 ಕೋಳಿಗಳಿಗೆ ಕನ್ನ ಹಾಕಿದ ಖದೀಮರು
