ಕ್ಯಾಂಪಸ್ ಪೆಟ್ರೋಲಿಂಗ್​ಗೆ ಎನ್​ಐಟಿಕೆ ತಂಡದಿಂದ ತಯಾರಾಯಿತು ವಿಶೇಷ ಇ-ಬೈಕ್

ಎನ್​ಐಟಿಕೆ ಕ್ಯಾಂಪಸ್ ಮುನ್ನೂರು ಎಕರೆ ವಿಶಾಲ ಪ್ರದೇಶದಲ್ಲಿದೆ. ಇಲ್ಲಿನ ಸುರಕ್ಷತೆಯ ದೃಷ್ಟಿಯಿಂದ ಇಲ್ಲಿನ ಸೆಕ್ಯುರಿಟಿ ಸಿಬ್ಬಂದಿ ಗಸ್ತು ತಿರುಗುತ್ತಲೇ ಇರುತ್ತಾರೆ. ಇವರ ಅನುಕೂಲಕ್ಕಾಗಿ ಇ ಬೈಕ್ ಅಭಿವೃದ್ಧಿಪಡಿಸಲಾಗಿದೆ..

ಮಂಗಳೂರು :ಇತ್ತೀಚೆಗೆ ಪರಿಸರಕ್ಕೆ ಪೂರಕವಾದ ಎಲೆಕ್ಟ್ರಿಕ್ ವಾಹನಗಳು ಮಾರುಕಟ್ಟೆಗೆ ಬರುತ್ತಿವೆ. ಆದರೆ, ಇದೀಗ ಮಾರುಕಟ್ಟೆಯಲ್ಲಿ‌ ಬರುತ್ತಿರುವ ಎಲೆಕ್ಟ್ರಿಕ್ ವಾಹನಗಳಿಗಿಂತ ವಿಭಿನ್ನವಾಗಿ ತಮ್ಮದೇ ವಿಶಾಲ ಕ್ಯಾಂಪಸ್​ನ ಗಸ್ತು ತಿರುಗುವಿಕೆಗೆ ಮಂಗಳೂರಿನ ಎನ್‌ಐಟಿಕೆ ತಂಡ ಇ ಬೈಕ್‌ವೊಂದನ್ನು ಅಭಿವೃದ್ಧಿಗೊಳಿಸಿದೆ. ಮಂಗಳೂರಿನ ಸುರತ್ಕಲ್‌ನಲ್ಲಿರುವ ಎನ್​ಐಟಿಕೆ ಸದಾ ಹೊಸ ತಂತ್ರಜ್ಞಾನದ ಪ್ರಯೋಗ ಮಾಡುತ್ತಲೇ ಇರುತ್ತದೆ. ಇದೀಗ ವಿದ್ಯಾರ್ಥಿಗಳ ಮತ್ತು ಶಿಕ್ಷಕರ ತಂಡ ವಿದ್ಯುತ್​ ಇ ಮೊಬಿಲಿಟಿ ಸರಣಿಯಲ್ಲಿ ಇ ಬೈಕ್ ಅಭಿವೃದ್ದಿಪಡಿಸಿದೆ.

ಎನ್​ಐಟಿಕೆ ಕ್ಯಾಂಪಸ್ ಮುನ್ನೂರು ಎಕರೆ ವಿಶಾಲ ಪ್ರದೇಶದಲ್ಲಿದೆ. ಇಲ್ಲಿನ ಸುರಕ್ಷತೆಯ ದೃಷ್ಟಿಯಿಂದ ಇಲ್ಲಿನ ಸೆಕ್ಯುರಿಟಿ ಸಿಬ್ಬಂದಿ ಗಸ್ತು ತಿರುಗುತ್ತಲೇ ಇರುತ್ತಾರೆ. ಇವರ ಅನುಕೂಲಕ್ಕಾಗಿ ಇ ಬೈಕ್ ಅಭಿವೃದ್ಧಿಪಡಿಸಲಾಗಿದೆ. ಇಬ್ಬರು ಸೆಕ್ಯುರಿಟಿ ಸಿಬ್ಬಂದಿ ಬೈಕ್​ನಲ್ಲಿ ಕೂರಲು ಸಾಧ್ಯವಾಗುವಂತೆ ಅವರು ಬಳಸುವ ಲಾಠಿ, ಟಾರ್ಚ್, ಮೊಬೈಲ್, ವಾಕಿಟಾಕಿ ಮೊದಲಾದವುಗಳನ್ನು ಇಡಲು ಬೇಕಾದ ಸ್ಥಳವಕಾಶದೊಂದಿಗೆ ಇ- ಬೈಕ್ ತಯಾರು ಮಾಡಲಾಗಿದೆ.

ಇದರ ಕವಚಕ್ಕೆ ಅಲ್ಯುಮಿನಿಯಮ್ ಬಳಸಿದ್ದರಿಂದ ಬೈಕ್ ಹಗುರವಿದೆ. ಇದು ಎಲೆಕ್ಟ್ರಿಕ್ ವಾಹನವಾಗಿದ್ದು, ಮೂರು ಗಂಟೆ ಚಾರ್ಜ್ ಮಾಡಿದರೆ ಸುಮಾರು 70 ಕಿ. ಮೀ ಓಡುತ್ತದೆ. ಸದ್ದು ಮಾಡದೇ ವಾಹನ ಓಡುವುದರಿಂದ ಸೆಕ್ಯುರಿಟಿಗಳ ಗಸ್ತು ತಿರುಗುವಿಕೆಗೆ ಅನುಕೂಲವಾಗಿದೆ. ಈ ಬೈಕ್​ ಅನ್ನು ಎನ್​ಐಟಿಕೆಯ ಸೆಂಟರ್ ಫಾರ್ ಸಿಸ್ಟಮ್ ಡಿಸೈನ್‌ನ ಸಂಚಾಲಕ ಕೆ. ವಿ ಗಂಗಾಧರನ್ ಅವರ ಮಾರ್ಗದರ್ಶನದಲ್ಲಿ ಎನ್​ಐಟಿಕೆ ಸಹಾಯಕ ಪ್ರೊಫೆಸರ್ ಪ್ರಥ್ವಿರಾಜ್ ಅವರು ಶಿಕ್ಷಕರು, ಶಿಕ್ಷಕೇತರ ಸಿಬ್ಬಂದಿ ಮತ್ತು ವಿದ್ಯಾರ್ಥಿಗಳ ತಂಡದೊಂದಿಗೆ ನಿರ್ಮಾಣ ಮಾಡಲಾಗಿದೆ. ಇ ಬೈಕ್ ಅನ್ನು ಕೇವಲ ಕ್ಯಾಂಪಸ್​ನ ಸೆಕ್ಯುರಿಟಿ ಉಪಯೋಗಕ್ಕಾಗಿ ಡಿಸೈನ್ ಮಾಡಲಾಗಿದೆ‌ . ಈ ಬೈಕ್ 72 V 36 Ah li-on ಬ್ಯಾಟರಿಯಲ್ಲಿ ತಯಾರಿಸಲಾಗಿದೆ.

ಓದಿ:ಇದುವರೆಗೂ ಪರೀಕ್ಷಾ ಕೇಂದ್ರಗಳಲ್ಲಿ ಯಾರೂ ಹಿಜಾಬ್ ಹಾಕಿಲ್ಲ: ಸಚಿವ ಬಿ. ಸಿ. ನಾಗೇಶ್